កណ្តាល៖ នគរបាលប៉ុស្តិ៍ទឹកវិល បានស្រាវជ្រាវឃាត់ខ្លួនបានក្មេងទំនើងម្នាក់ ក្នុងចំណោមបក្ខពួក២នាក់ បន្ទាប់ពីជិះម៉ូតូយកដុំថ្មគប់ជនរងគ្រោះបែកក្បាល ខណៈកំពុងហែទីងមោងតាមផ្លូវ កាលពីថ្ងៃទី០៣ ខែកក្កដា ឆ្នាំ២០២៤ វេលាម៉ោង១៤:០០នាទី ស្ថិតនៅនៅចំណុច ភូមិសំប៉ានលើ ឃុំកោះធំខ ស្រុកកោះធំ ខេត្តកណ្ដាល។
ជនសង្ស័យឃាត់ខ្លួនបាន ឈ្មោះ វុឌ្ឍី ពិតា ភេទប្រុស អាយុ១៥ឆ្នាំ ជនជាតិខ្មែរ មុខរបរកសិករ មានទីលំនៅភូមិព្រែកពោធិ៍ ឃុំទឹកវិល ស្រុកស្អាង ខេត្តកណ្ដាល និងម្នាក់ទៀតកំពុងរត់គេចខ្លួនមាន ឈ្មោះ រ៉េត ធារិទ្ធ ភេទប្រុស អាយុ១៦ឆ្នាំ ជនជាតិខ្មែរ មុខរបរមិនពិតប្រាកដ មានទីលំនៅឃុំកោះខ្សាច់ទន្លា ស្រុកស្អាង ខេត្តកណ្តាល។
![](https://cdn.troryorng.com/wp-content/uploads/2024/07/05133456/736.jpg)
តាមសមត្ថកិច្ចបានឱ្យដឹងថា មុនកើតហេតុមានជនសង្ស័យទាំង០២នាក់ បានជិះម៉ូតូឌុបគ្នាដើម្បីទៅហែទីងមោង ដោយជិះម៉ូតូទៅជួបជុំគ្នានៅស្រុកកោះធំ ស្ថិតនៅវត្តសំប៉ានក្រោម និងបានហែពីទិសខាងត្បូងមកទិសខាងជើងឡើងមកវិញ លុះដល់ចំណុចវត្តសំប៉ាន ជនសង្ស័យជិះម៉ូតូហែទីងមោង ក៏បានឃើញជនរងគ្រោះកំពុងដើរហែទីងមោងដែរ រួចក៏បានយកដុំថ្មកាន់ជាប់នឹងដៃ បានជិះម៉ូតូគប់សំដៅជនរងគ្រោះបណ្តាលឱ្យចំក្បាលពីក្រោយបណ្តាលឱ្យរងរបួសបែកក្បាលហូរឈាម រួចជនសង្ស័យទាំង០២នាក់ បានជិះម៉ូតូគេចខ្លួនពីកន្លែងកើតហេតុបាត់។
![](https://cdn.troryorng.com/wp-content/uploads/2024/07/05133507/737.jpg)
លុះមកដល់ថ្ងៃទី០៤ ខែកក្កដា ឆ្នាំ២០២៤ វេលាម៉ោងប្រហែល១០:៤០នាទីព្រឹក ជនរងគ្រោះ ឈ្មោះ កុសល់ សុធារាជ្យ ភេទប្រុស អាយុ១៦ឆ្នាំ ជនជាតិខ្មែរ មានទីលំនៅភូមិក្បាលកោះកើត ឃុំកោះខ្សាច់ទន្លា ស្រុកស្អាង ខេត្តកណ្ដាល ។បានមកដាក់ពាក្យបណ្តឹងនៅប៉ុស្តិ៍នគរបាលរដ្ឋបាលទឹកវិល ឱ្យជួយអន្តរាគមន៍។
![](https://cdn.troryorng.com/wp-content/uploads/2024/07/05133514/734.jpg)
ក្រោយពីបានទទួលពាក្យបណ្តឹងរបស់ជនរងគ្រោះភ្លាម កម្លាំងប៉ុស្តិ៍នគរបាលរដ្ឋបាលទឹកវិល បានចុះស្រាវជ្រាវ នឹងបានកំណត់មុខសញ្ញាបាន រហូតដល់ឃាត់ខ្លួនជនសង្ស័យបាន នាំមកប៉ុស្តិ៍ធ្វើការសួរនាំ។ បច្ចុប្បន្នជនសង្ស័យបញ្ជូនមកអធិការដ្ឋាននគរបាលស្រុកស្អាង ដើម្បីចាត់ការតាមនីតិវិធី៕
អត្ថបទ៖ កណ្តាល
![](https://cdn.troryorng.com/wp-content/uploads/2024/04/27142737/Troryorng-Telegram-1-1024x126-1-1-1-1.jpg)