ឆ្លើយតបសំណូមពរពលរដ្ឋ! អភិបាលពោធិ៍សាត់ ឲ្យអាជ្ញាធរហៅម្ចាស់ក្រុមហ៊ុនទឹកស្អាតស្រុកក្រគរ មកសួរនាំបន្ទាន់រឿងបម្រើសេវាមិនបានល្អ

ពោធិ៍សាត់÷ ឯកឧត្តមខូយរីដា អភិបាលខេត្តពោធិ៍សាត់ បានជំរុញឲ្យស្ថាប័នពាក់ព័ន្ធ ត្រូវអញ្ជើញម្ចាស់ក្រុមហ៊ុនទឹកស្អាត ស្រុកក្រគរមកណែនាំនិងក្រែប្រែឲ្យបានឆាប់ចំពោះបញ្ហាការបម្រើសេវាជូនបងប្អូនប្រជាពលរដ្ឋមិនបានល្អស្របទៅនឹងលក្ខខណ្ឌផ្សេងៗ។ បើមិនដូច្នោះទេនិងត្រូវប្រឈមការបញ្ឈប់អាជ្ញាប័ណ្ណមិនឲ្យបន្តអាជីវកម្មតទៅមុខទៀតឡើយ។

ឯកឧត្តមថ្លែងបែបនេះ បន្ទាប់ពីសំណូមពរប្រជាពលរដ្ឋនៅក្នុងវេទិកាផ្សព្វផ្សាយនិងពិគ្រោះយោបល់របស់ក្រុមប្រឹក្សាខេត្តពោធិ៍សាត់ ឆ្នាំទី ២ អាណត្តិទី៤ ដែលរៀបចំឡើងនៅសាលាស្រុកក្រគរ ថ្ងៃទី២៦ ខែវិច្ឆិកា ឆ្នាំ២០២៥នេះ។

ឯកឧត្តមអភិបាលខេត្តលើកឡើងថា តម្រូវការប្រើប្រាស់ទឹកក្នុងជីវិតប្រចាំថ្ងៃរបស់បងប្អូនប្រជាពលរដ្ឋគឺជារឿងចាំបាច់មិនអាចខ្វះបាន ដូច្នេះក្រុមហ៊ុនដែលបានអាជ្ញាប័ណ្ណកំពុងធ្វើអាជីវកម្មត្រូវតែបំពេញឲ្យបានសមស្របទៅតាមលក្ខខណ្ឌ បម្រើនៃការប្រើប្រាស់ទឹកស្អាតរបស់បងប្អូនប្រជាពលរដ្ឋប្រកបដោយការទទួលខុសត្រូវ មិនអាចយកលេសផ្សេងៗមកដោះសារ ដូចជាកត្តាអាធម្មជាតិជាដើមមិនសមហេតុផលឡើយ។

ក្នុងន័យនេះឯកឧត្តមអភិបាលខេត្តបាន ប្រាប់អោយស្ថាប័នសមុី ត្រូវតែធ្វើការរឿងនេះភ្លាមៗដោយអញ្ជើញម្ចាស់ក្រុមហ៊ុនមកណែនាំ និងកែប្រែឲ្យបានឆាប់ ។បើមិនអញ្ចឹងទេឯកឧត្តមនិងស្នើបញ្ចប់អាជ្ញាប័ណ្ណហើយនិងរកម្ចាស់ក្រុមហ៊ុនផ្សេងមកជំនួសវិញជាមិនខានឡើយ។

ឯកឧត្តមខូយរីដាអភិបាលខេត្តពោធិ៍សាត់បានគូសបញ្ជាក់ថាវេទិកាផ្សព្វផ្សាយនិងពិគ្រោះឥយោបល់របស់ក្រុមប្រឹក្សាខេត្តពោធិ៍សាត់ឆ្នាំទី ២អាណត្តិទី៤ ដែលរៀបចំឡើងនៅសាលាស្រុកក្រគរ នាឱកាសនេះ ក្នុងគោលបំណងផ្ដល់ឱកាសដល់ប្រជាពលរដ្ឋនិងអ្នកពាក់ព័ន្ធទាំងអស់បានឆ្វេងយល់អំពីស្ថានភាពទូទៅនៃការអភិវឌ្ឍខេត្ត ស្រុក ក្រុងឃុំ សង្កាត់ និងបញ្ហាប្រឈមនានាដែលកើតមានឡើងជាមួយនឹងការផ្ដល់ឱកាសជូនបងប្អូនប្រជាពលរដ្ឋពាក់ព័ន្ធបានបញ្ចេញមតិរបស់ខ្លួនអំពីកង្វល់ផ្សេងៗក៏ដូចជាសំណូមពរនិងតម្រូវការជាក់ស្ដែងក្នុងមូលដ្ឋានផងដែរ។ ដោយក្នុងនោះ រាល់សំណូមពរ បញ្ហាប្រឈម និងការខ្វះចន្លោះដែលនៅសេសសល់ដោយអន្លឺនៅក្នុងមូលដ្ឋាន ដែលបងប្អូនប្រជាពលរដ្ឋបានលើកឡើងត្រូវបានដោះស្រាយប្រកបដោយប្រសិទ្ធភាពនិងតម្លាភាព។

ដោយឡែកចំពោះបញ្ហា ទឹកស្អាតបងប្អូនប្រជាពលរដ្ឋបានដាក់ចេញនៅសំណូមពរជូនដល់អង្គពិធីជាពិសេសឯកឧត្តមអភិបាលខេត្តដើម្បីជួយអន្តរាគមន៍ដោះស្រាយ ដោយសារតែបញ្ហានេះកើតមានជាច្រើនឆ្នាំកន្លងមកហើយ ជាពិសេសក្នុងរដូវប្រាំងតែងតែគ្មានទឹកប្រើប្រាស់រយៈពេលប្រមាណជាពីរខែឯណោះ ហើយទឹកប្រើប្រាស់នោះទៀតសោតក៏មិនបានស្អាតមានពេលខ្លះដោយទាំងភក់កខ្វក់ដោយមកតាមទុយោទឹកថែមទៀតផង៕

អត្ថបទ÷ពោធិ៍សាត់