ខេត្តសៀមរាប៖ លោកឧត្តមសេនីយ៍ទោ ហួត សុធី ស្នងការនៃស្នងការដ្ឋាននគរបាលខេត្តសៀមរាប បានដាក់បទបញ្ជាឱ្យកងកម្លាំងនគរបាលទាំងអស់ បន្តយកចិត្តទុកដាក់ខ្ពស់លើការថែរក្សាសន្តិសុខ សណ្តាប់ធ្នាប់ ជាពិសេសត្រូវអនុវត្តវិធានការបង្ក្រាបក្មេងទំនើង គ្រឿងញៀន និងល្បែងស៊ីសងឱ្យមានប្រសិទ្ធភាពខ្ពស់។
ការថ្លែងបែបនេះ បានធ្វើឡើងក្នុងកិច្ចប្រជុំបូកសរុបលទ្ធផលការងារឆ្នាំ២០២៥ និងលើកទិសដៅឆ្នាំ២០២៦ របស់អធិការដ្ឋាននគរបាលស្រុកពួក កាលពីព្រឹកថ្ងៃចន្ទ ទី១២ ខែមករា ឆ្នាំ២០២៦។
ចំណុចសំខាន់ៗនៃអនុសាសន៍ដឹកនាំ៖
- ពង្រឹងសន្តិសុខមូលដ្ឋាន៖ បន្តជំរុញការផ្សព្វផ្សាយគោលនយោបាយ «ភូមិ ឃុំ សង្កាត់មានសុវត្ថិភាព» ដើម្បីធានាសុវត្ថិភាពជូនប្រជាពលរដ្ឋ។
- ការផ្តល់សេវាសាធារណៈ៖ ត្រូវយកចិត្តទុកដាក់បម្រើសេវាជូនប្រជាពលរដ្ឋនៅតាមមូលដ្ឋានឱ្យបាន «ឆាប់រហ័ស និងមានប្រសិទ្ធភាព»។
- សាមគ្គីភាពផ្ទៃក្នុង៖ បន្តពង្រឹងសាមគ្គីភាព និងសមត្ថភាពជំនាញ ដើម្បីដោះស្រាយបញ្ហាប្រឈមនានាដែលនៅសេសសល់។
ក្នុងឱកាសនោះ លោកស្នងការបានសម្ដែងនូវការកោតសរសើរដល់កងកម្លាំងនគរបាលស្រុកពួក ដែលបានខិតខំបំពេញភារកិច្ចការពារសុវត្ថិភាពសង្គមនាពេលកន្លងមកបានយ៉ាងល្អប្រសើរ។ លោកក៏បានផ្ដាំផ្ញើឱ្យមន្ត្រីគ្រប់ផ្នែក និងតាមប៉ុស្តិ៍នគរបាលរដ្ឋបាល ត្រូវរួមគ្នាដកស្រង់បទពិសោធន៍ ដើម្បីកំណត់ទិសដៅការងារឆ្នាំ២០២៦ ឱ្យកាន់តែរឹងមាំថែមទៀត។
ជាកិច្ចបញ្ចប់ លោកឧត្តមសេនីយ៍ទោ ហួត សុធី ក៏បាននាំយកអំណោយដ៏ថ្លៃថ្លារបស់ ឯកឧត្តមអភិសន្តិបណ្ឌិត ស សុខា ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ និងលោកជំទាវ កែ សួនសុភី ស សុខា ចែកជូនដល់កងកម្លាំងនៃអធិការដ្ឋាននគរបាលស្រុកពួក ដើម្បីជាការលើកទឹកចិត្តដល់ការបំពេញការងារផងដែរ៕
អត្ថបទ៖ក្រសួងមហាផ្ទៃ