ភ្នំពេញ ៖ បុរសម្នាក់បានស្លាប់ ចំណែកស្ត្រីម្នាក់ និងបុរសម្នាក់ទៀតរងរបួសធ្ងន់ធ្ងរ ក្នុងហេតុការណ៍ ជនដៃដល់ប្រើប្រាស់អាវុធខ្លីចូលទៅបាញ់ដល់ក្នុងផ្ទះ សង្ស័យផ្តើមចេញពីទំនាស់រឿង ស្នួហាលខោអាវ និងព្រំដី ជាមួយអ្នកជិតខាង រហូតដល់ហៅបក្ខពួក មកធ្វើសកម្មភាពបាញ់ប្រហារតែម្តង ។
ហេតុការណ៍ខាងលើកើតឡើងកាលពីវេលាម៉ោង៣និង៤៥នាទីរសៀលថ្ងៃទី១៧ ខែមិថុនា ឆ្នាំ២០២៤ នៅក្នុងបុរីប៉េងហួតបឹងស្នោ គម្រោងទី៧ សង្កាត់និរោធ ខណ្ឌច្បារអំពៅ រាជធានីភ្នំពេញ ។
ករណីខាងលើ បណ្តាលឱ្យបុរសម្នាក់ស្លាប់ភ្លាមៗនៅកន្លែង ចំណែកស្ត្រីម្នាក់ត្រូវជាគូដណ្តឹង និងបុរសម្នាក់ជាបុគ្គលិក រងរបួសធ្ងន់ធ្ងរ ។
តាមប្រភពពីបុគ្គលិក បម្រើការងារនៅផ្ទះកើតហេតុបានឱ្យដឹងថា កន្លងមកថៅកែប្រុស និងថៅកែស្រី ត្រូវជាគូដណ្តឹងនឹងគ្នា កើតមានទំនាស់ជាមួយអ្នកជិតខាង រឿងស្នួហាលខោអាវ ដាក់មុខផ្ទះ និងព្រំដី រហូតដល់គូទំនាស់ដែលនៅផ្ទះជាប់នោះ កើតជាគនុំ គម្រាមច្រើនលើកច្រើនសារ ស្រាប់តែនៅរសៀលថ្ងៃនេះ ខណៈដែលនៅក្នុងផ្ទះមានគ្នា៤នាក់ លេចមុខជនសង្ស័យ២នាក់ជិះម៉ូតូZOOMER មួយគ្រឿង ពណ៌ក្រហម ពាក់ស្លាកលេខ ភ្នំពេញ 1GX-9541 សង្ស័យជាបក្ខពួករបស់គូទំនាស់ បានទៅដល់ចូលដល់ក្នុងផ្ទះ ឈ្លោះរករឿង សួររឿងព្រំដី រឿងស្នួហាលខោអាវ ហើយដកកាំភ្លើងបាញ់ច្រើគ្រាប់ បណ្តាលឱ្យស្លាប់ម្នាក់ ចំណែកស្ត្រីជាគូដណ្តឹង និងបុគ្គលិកម្នាក់រងរបួសធ្ងន់ រួចជនដៃដល់ជិះម៉ូតូគេចខ្លួនទៅបាត់ ។
ជនរងគ្រោះរបួសធ្ងន់២នាក់ ប្រុស១នាក់ ស្រី១នាក់ ត្រូវបានរថយនហតសង្គ្រោះរបស់មន្ទីរពេទ្យបង្អែកច្បារអំពៅដឹកបញ្ជូនទៅមន្ទីរពេទ្យកាល់ម៉ែត្រ ។
ហេតុការណ៍ខាងលើកើតឡើងភ្លាមៗ កម្លាំងសមត្ថកិច្ចមូលដ្ឋាន សមត្ថកិច្ចជំនាញចុះទៅ ពិនិត្យ សាកសួរ ស្រាវជ្រាវ មកដល់វេលាម៉ោង៥ល្ងាចថ្ងៃដដែល កម្លាំងជំនាញកំណត់បានមុខសញ្ញា រហូតដល់ឃាត់ខ្លួនជនសង្ស័យម្នាក់ ជាអ្នកបើកម៉ូតូ និងបន្តស្វែងតាមចាប់ខ្លួនជនដៃដល់ម្នាក់ទៀត កំពុងគេចខ្លួន ។
អត្ថបទ÷តាតុងសែនជ័យ