ក្រោយសារព័ត៌មានក្នុងស្រុកមួយបានធ្វើការចុះផ្សាយថា អ្នកម្ដាយដ៏ល្បីពីររូបគឺអ្នកនាង ឌី សូនីត្តា និង អ្នកនាង គង់ ចាន់ស្រីមុំ ឈ្លោះគ្នារហូតដល់ថ្នាក់មើលមុខលែងចំនោះ ពេលនេះសាមីខ្លួនទាំងពីរបានចេញមកច្រានចោលនូវការចុះផ្សាយព័ត៌មាននោះទាំងស្រុង ព្រមទាំងបង្ហោះរូបភាពស្និទ្ធស្នាលឱបគ្នាមុនពេលមានជំងឺកូវីដ-១៩ ថែមទៀតផង។
នាព្រឹកថ្ងៃទី ១៥ ខែ មិថុនា ឆ្នាំ២០២១ អ្នកនាង ឌី សូនីត្តា បានចេញមកធ្វើការបកស្រាយពីបញ្ហារសើបនេះតាមរយៈហ្វេសប៊ុករបស់អ្នកនាងផ្ទាល់ ព្រោះអស់សំណើចនឹងព័ត៌មានដែលបានធ្វើការចុះផ្សាយពាក់ព័ន្ធនឹងរឿងទំនាស់រហូតឈានដល់ពាក់មុខដាក់គ្នាជាមួយនឹងអ្នកនាង គង់ ចាន់ស្រីមុំ។
បន្ទាប់ពីអ្នកម៉ាក់របស់អូនស្មាយល៍បានចេញមករៀបរាប់បែបហួសចិត្តហើយនោះ អ្នកម៉ាក់របស់ម៉ូម៉ូគឺអ្នកនាង គង់ ចាន់ស្រីមុំ ក៏បានចូលមកឆ្លងឆ្លើយក្រោមផុសខាងលើនោះហាក់បង្ហាញពីការហួសចិត្តនិងអស់សំណើចយ៉ាងដូច្នេះថា៖ «ហួសចិត្តម៉ងមីអូន មកពីអូនឯងមិនអោយបងជួបក្មួយចឹងហើយ អាឡែងតែខ្លាច មី កូវិតពេក គេឃើញបាត់យូរក៏ដាក់អោយយើងល្បីមួយទៅ»។
ងាកមកអ្នកនាង ឌី សូនីត្តាវិញ ក៏បានចូលមកតប ខមមិន របស់អ្នកនាង គង់ ចាន់ស្រីមុំដែរថា៖«ចាំពេលយើងបានជួបគ្នា យើងថតឱ្យណែនទូរស័ព្ទតាម្រ៉ង់ណាអ្នកបង»។
ក្រោយតារាល្បីទាំងពីរស្រាយនូវមន្ទិលសង្ស័យខាងលើរួច ហ្វេនៗបានចូលមកនិយាយរៀបរាប់ក្រោមផុសនោះ សម្ដែងការរីករាយដែលតារាទាំងពីរដួង មិនបានមានបញ្ហាទាស់ទែងខ្វែងគំនិតគ្នា ដូចអ្វីដែលសារព័ត៌មានបានលើកឡើង៕