នៅថ្ងៃនេះ សហព័ន្ធកីឡាបាល់ទាត់អាស៊ី (AFC) បានសម្រេចចិត្តកែប្រែរូបមន្តប្រកួតថ្មី នៅក្នុងកម្មវិធីជម្រុះជើងឯកប្រចាំទ្វីប 2023 AFC Asian Cup China ស្របពេលដែលក្រុមជម្រើសជាតិកម្ពុជា ត្រូវស្ថិតនៅក្នុងវគ្គជម្រុះសិន។
រូបមន្តប្រកួតពានរង្វាន់ជើងឯកប្រចាំទ្វីបមាន៖
១) វគ្គជម្រុះ៖ កម្ពុជា, ឥណ្ឌូណេស៊ី, កោះហ្គាម និងតៃវ៉ាន់។
ក្រុមកម្ពុជា និងឥណ្ឌូណេស៊ី ស្ថិតនៅ Pot 1 ហើយកោះហ្គាម និងតៃវ៉ាន់ ស្ថិតនៅ Pot 2។ ដូច្នេះកម្ពុជា អាចជួបកោះហ្គាម ឬ តៃវ៉ាន់។ Pot ទាំង២នេះ ត្រូវចាប់ឆ្នោតជ្រើសរើសគូនៅថ្ងៃទី២៤ខែមិថុនា ហើយការប្រកួតធ្វើឡើងជើងទី១ នៅថ្ងៃទី៧ ខែ កញ្ញា និង ជើងទី២ធ្វើឡើងនៅថ្ងៃទី ១២ ខែ តុលា ឆ្នាំ២០២១។ អ្នកឈ្នះ២ក្រុមមានឈ្មោះឡើងទៅលេងនៅវគ្គចែកពូលជុំទី២។
២) វគ្គជម្រុះជុំទី២៖ មានក្រុម២២ នៅរង់ចាំ ដោយត្រូវបែងចែកជា៦ពូល (១ពូលមាន៤ក្រុម)។ ក្រុមចំណាត់ថ្នាក់ល្អចំនួន១១ក្រុមមានឈ្មោះកក់សំបុត្រយន្តហោះទៅប្រទេសចិន។
ក្រុមនៅរង់ចាំនៅវគ្គជុំទី២នេះមានអ៊ូប៊ែគីស្ថាន, ហ្សកដានី, បារ៉ែន,ជីគីស្ថាន, ប៉ាឡេស្ទីន,ឥណ្ឌា, ថៃ, គីហ្ស៊ីស្ថាន, ហ្វីលីពីន, ទួរមេនីស្ថាន, មីយ៉ាន់ម៉ា, ហុងកុង, យេមែន, គុយវ៉ែត, អាហ្វហ្គានីស្ថាន, ម៉ាឡេស៊ី, ម៉ាល់ឌីវ,សិង្ហបុរី, នេប៉ាល់, បង់ក្លាដេស, ម៉ុងហ្គោលី និងស្រីលង្កា។
អត្ថបទពាក់ព័ន្ធ៖ជម្រុះ World Cup៖វៀតណាម តំណាងអាស៊ាន ឡើងទៅជុំទី៣ប្រចាំទ្វីបជាមួយ១១ប្រទេសផ្សេងទៀត
៣) វគ្គប្រកួតចុងក្រោយ២៤ក្រុមនៅប្រទេសចិន៖
ពេលនេះមានក្រុមចំនួន១៣ក្រុមទៅហើយមានឈ្មោះទៅប្រកួតមុនគេ ដោយក្នុងនោះមានចិន (ម្ចាស់ផ្ទះ) ជប៉ុន,ស៊ីរី,កាតារ,កូរ៉េខាងត្បូង,អូស្ត្រាលី,អ៊ីរ៉ង់,អារ៉ាប់រួម,អារ៉ាប៊ីសាអ៊ូឌីត,អ៊ីរ៉ង់,អូម៉ង់,វៀតណាមនិងលីបង់។
ដូច្នេះបើបូកទាំងក្រុមខ្លាំងទាំង១១ក្រុមមកពីវគ្គជម្រុះជុំទី២ ធ្វើឱ្យវគ្គនេះមានក្រុមសរុប២៤ក្រុម ដោយត្រូវបែងចែកជាពូលដើម្បីប្រកួតជម្រុះជាបន្ត។
ការបែងចែករូបមន្តប្រកួតថ្មីនេះគឺឱ្យស្របតាមបរិបទកូវីដ-១៩ផង និងជ្រើសរើសក្រុមនេះស្របតាមលទ្ធផលនៃការប្រកួតវគ្គជម្រុះតាមពូលជុំទី២ នៃពានរង្វាន់បាល់ទាត់ជើងឯកពិភពលោក 2022 FIFA World Cup Qatar កាលពីពេលថ្មីៗនេះផង។
សូមបញ្ជាក់ថាក្រុមជម្រើសជាតិកម្ពុជា ធ្លាប់ឡើងដល់វគ្គពាក់កណ្ដាលផ្ដាច់ព្រ័ត្រពានរង្វាន់បាល់ទាត់ជើងឯកប្រចាំទ្វីបនេះបាន១លើកកាលពីឆ្នាំ១៩៧២ ដែលកាលនោះធ្វើឡើងនៅរាជធានីបាងកក ប្រទេសថៃ។ កម្ពុជា បានចាញ់អ៊ីរ៉ង់ ២ទល់១ នៅវគ្គពាក់កណ្ដាលផ្ដាច់ព្រ័ត្រនៅគ្រានោះ ហើយបានបន្តចាញ់ម្ចាស់ផ្ទះថៃ នៅវគ្គដណ្តើមចំណាត់ថ្នាក់លេខ៣ ដោយបាល់ប៉េណាំងទីកាត់សេចក្តី៥ទល់៣ ក្រោយប្រកួតគ្នាពេញម៉ោងស្មើ ២ទល់២៕
