សិល្បៈជាតិ៖ កូនស្រីអតីតតារាសម្ដែងជើងចាស់ អ្នកនាង កែវ កល្យាណ គឺស្រីស្អាត កែវ ឡាវីញ បានចូលរោងការនៅថ្ងៃទី ១៥ ខែធ្នូ ឆ្នាំ ២០២២នេះ ជាមួយកូនកំឡោះសង្ហា ហម លាងហេង អាយុ ២៥ ឆ្នាំ ជាអ្នកជំនាញខាងផ្នែក IT។
អ្នកនាង កែវ កល្យាណ បានប្រាប់អ្នកសារព័ត៌មានថា មង្គលការកូនរបស់នាងត្រៀមនឹងធ្វើនៅគេហដ្ឋានម្ដុំឈូកមាស ខណ្ឌសែនសុខ ដែលអ្នកនាងនិងគ្រួសារគ្រៀងអញ្ជើញភ្ញៀវកិត្តិយសសរុបខ្ទង់ជាង៩០តុ។ តារាសម្ដែង កែវ ឡាវីញ និងគូស្នេហ៍បានមើលចិត្តថ្លើមគ្នាអស់រយៈពេលយូរដែរហើយ ទើបមេបាទាំងសងខាងសម្រេចឱ្យមានពិធីមង្គលនោះឡើង។
យ៉ាងណាមិញ កូនក្រមុំវ័យ ២៣ គឺជាតារាសម្ដែងដ៏មានប្រជាប្រិយភាពនាពេលបច្ចុប្បន្ននេះ រីឯកូនកំឡោះមាន២៥ ឆ្នាំ ជាអ្នកជំនាញខាងផ្នែក IT។ ទោះជំនាញនិងអាជីពផ្សេងគ្នាក៏ពិតមែន តែរឿងស្នេហាវិញគឺមិនប្រកាន់អាជីពឡើយដោយពួកគេចាប់ផ្ដើមបើកចំហរទំនាក់ទំនងតាំងអំឡុងឆ្នាំ២០១៩ មកម្ល៉េះ។ អ្នកនាង កល្យាណ បានឱ្យដឹងថា មង្គលការកូនស្រីនឹងមានតារាសិល្បៈជាច្រើនដួងចូលរួមអបអរ ជាពិសេសតារាសម្ដែងដែលនៅជំនាន់ស្រករអ្នកនាងផងដែរ។
គួររំលឹកដែរថា តារាស្រី កែវ ឡាវីញ មានប្រជាប្រិយភាពខ្លាំងនៅពេលភាពយន្ដរឿង «រសជាតិអ្នកមាន» ដែលមានបញ្ចាំងនៅលើកញ្ចក់ទូរទស្សន៍ PNN។ បើទោះជាកន្លងមកការសម្ដែងនោះធ្វើឱ្យហ្វេន មានការយល់ច្រឡំថានាងនិងកញ្ញាយ៉ា សុផាន់ម៉ៃ មានទំនាក់ទំនងស្រឡាញ់ភេទដូចគ្នា ទាំងក្នុងនិងក្រៅឆាកក្ដី ប៉ុន្ដែការសម្រេចចិត្តចូលរោងការរបស់ កញ្ញា ឡាវីញ នាពេលនេះ បញ្ជាក់ឱ្យគ្រប់គ្នាលែងយល់ច្រឡំបន្តទៀត។ ហើយថ្មីៗនេះ កញ្ញា ឡាវីញ ក៏បានចូលរួមសម្ដែងក្នុងភាពយន្ដភាគបុរណរបស់ទូរទស្សន៍ហង្សមាស គឺរឿង«ម្ចាស់កីតម្បាញ» ផងដែរ។
