សិល្បៈជាតិ៖ លោក អ៊ិន សុភិន បានចេញមកប្រកាសថា លោកបានលែងដៃពីការរៀបចំកម្មវិធី Miss Grand Cambodia ចាប់ពីឆ្នាំ ២០២៣ នេះតទៅហើយ បន្ទាប់ពីលោកបានដាច់កុងត្រា៣ឆ្នាំជាមួយស្ថាប័ន MGI។ ការប្រកាសរបស់អគ្គនាយកក្រុមហ៊ុនមហាហង្សរូបនេះបានផ្សាយឱ្យសាធារណជនដឹងកាលពីថ្ងៃទី ១៤ ខែធ្នូ ឆ្នាំ ២០២២នេះ។
លោក អ៊ិន សុភិន បានទិញសិទ្ធផ្ដាច់មុខផលិតកម្មវិធី Miss Grand Cambodia ពីស្ថាប័ន Miss Grand International អស់រយៈពេល៣ឆ្នាំ គឺចាប់តាំងពីឆ្នាំ២០២០, ២០២១ និងឆ្នាំ ២០២២ ដោយលោកបានធ្វើឱ្យកម្មវិធីមួយនេះ មានការគាំទ្រខ្លាំងនៅក្នុងស្រុកពីសំណាក់អ្នកស្រឡាញ់វិស័យប្រកួតបវរកញ្ញា។ ៣ឆ្នាំកន្លងមកនេះ លោកក៏បានសម្រិតសម្រាំង និងធ្វើឱ្យបវរកញ្ញាខ្មែរយើងឈានជើងចូលដល់ Top កំពូលៗ។ ជាក់ស្ដែងឆ្នាំចុងក្រោយនេះ Miss Grand Cambodia 2022 ពេជ្រ វត្តីសារ៉ាវឌ្ឍី ទទួលបានតំណែង 5th Runner Up។
កាន់តែធ្វើឱ្យអ្នកគាំទ្រធ្លាក់ថ្លើមក្ដុក នៅពេលដែលលោក អ៊ីន សុភិន ចេញមកប្រកាសបែបនេះ៖ «ខ្ញុំសុំឈប់ធ្វើ Miss Grand Cambodia ចាប់ពីឆ្នាំ2023តទៅដោយមូលហេតុចង់សម្រាកពីការងារផ្នែកមួយនេះ អរគុណសម្រាប់ការគាំទ្រកន្លងមក !»។
យ៉ាងណាមិញ ចំពោះព័ត៌មានដែលពាក់ព័ន្ធនឹងការបញ្ចប់កុងត្រាខាងលើនេះដែរ គឺបានបញ្ជាក់ថា នៅឆ្នាំ២០២៣ ការប្រកួតជ្រើសរើសបវរកញ្ញាដ៏អស្ចារ្យ Miss Grand Cambodia 2023 លែងស្ថិតក្នុងការគ្រប់គ្រងរបស់លោក អ៊ិន សុភិនទៀតហើយ។ លោកក៏បានប្រាប់អ្នកកាន់អ្នកគាំទ្រដែលថា លោកនឹងងាកមកផលិតភាពយន្តឡើងវិញ បន្ទាប់ពីលោកបានព្រលែងដៃអស់ ៣ឆ្នាំមកហើយ។
សូមជម្រាបថា ជាគួរឱ្យកត់សម្គាល់គេមើលឃើញថា លោក អ៊ិន សុភិន គឺបុគ្គលម្នាក់ជោគជ័យ៤វិស័យព្រមគ្នា ទាំងវិស័យភាពយន្ត (ដែលលោកមានផលិតកម្មមហាហង្ស) វិស័យជំនួញ (ក្រុមហ៊ុនរបស់លោកមានទទួលសេវាបញ្ញើក្នុង និងក្រៅប្រទេស និងមានម៉ៅការគូប្លង់ដេគ័រអគារធំៗ) វិស័យកីឡា ( Mahahang All Stars FC ) និងចុងក្រោយនេះលោកទទួលបានការជោគជ័យលើវិស័យប្រកួតបវរកញ្ញា Miss Grand Cambodia ៕
