សិល្បៈអន្តរជាតិ៖ Helmut Strebl (ហ៊ែលមេត ស្រ្តេប៊ល) គឺជាអ្នកលេងកាយវប្បកម្ម និងជាតារាម៉ូដែលជនជាតិអូស្ដា្រលីដែលត្រូវបានទទួលស្គាល់ថាមានសាច់ដុំណែនហាប់ជាងគេលើពិភពលោក ប្រៀបដូចជាតុក្កតាដែលផុសចេញពីរឿង Hanma Baki។
បើទោះបីជាមុខមាត់របស់តារាប្រុសរូបនេះមិនសូវមានភាពទាក់ទាញ ប៉ុន្តែបើយើងក្រឡែកមកមើលសាច់ដុំរបស់លោកវិញ គឺពោរពេញទៅដោយសាច់កង់ៗហាប់ណែនគ្រប់កន្លែងនៃរាងកាយ។ នេះអាចបញ្ជាក់ឱ្យឃើញថា មានមនុស្សតិចនាក់ណាស់ដែលមានសាច់ដុំកង់ៗហាប់ណែនដូចជាតារាប្រុសរូបនេះ ព្រោះថា សាច់ដុំរបស់លោកមានសភាពសមាមាត្រល្អ ដែលមើលទៅស្ទើរតែអាចមើលឃើញគ្រប់សរសៃសាច់ដុំតាំងពីលើដល់ក្រោមស្បែករបស់លោក ។
Helmut បានក្លាយជាតារាប្រុសដ៏មានប្រជាប្រិយភាពពេញនិយមនៅលើបណ្ដាញសង្គមអស់រយៈពេលជាង ៥ ឆ្នាំមកហើយ ជាពិសេសនៅលើផ្លែតហ្វ័ម Reddit, Facebook, Instagram និង Twitter ជាដើម។ តារាប្រុសរូបនេះបច្ចុប្បន្នមានអាយុ ៥៤ ឆ្នាំ ហើយ លោកអាចរក្សាសាច់ដុំរបស់លោកឱ្យមានសភាពតឹងណែនមិនប្រែប្រួល។
Helmut បានសម្រេចចិត្តចាប់ផ្តើមលើកទម្ងន់តាំងពីអាយុ១២ឆ្នាំមកម៉្លេះ ដែលកាលនោះលោកគឺជាក្មេងប្រុសស្លេកស្លាំង ទន់ខ្សោយ គ្មានកម្លាំង ហើយតែងតែត្រូវគេធ្វើបាប។ លោកទទួលបានការបំផុសគំនិតពីមិត្តរួមសាលាម្នាក់បង្រៀនឱ្យលោកចាប់ផ្តើមលើកទម្ងន់តាមកាដុងទឹកស្អាត។ ក្រោយមកដល់វ័យ១៦ឆ្នាំ លោកបានចាប់ផ្តើមហាត់ប្រាណយ៉ាងយកចិត្តទុកដាក់ ដោយមានការដាក់វិន័យ និងគោលដៅច្បាស់លាស់ ដើម្បីសម្រេចបានលទ្ធផលដូចអ្វីដែលលោកចង់បាន។
ដើម្បីឱ្យដងខ្លួនមើលទៅគ្មានខ្លាញ់ ដូចនៅក្នុងរូបភាពដែលបានឃើញនេះ Helmut បានព្យាយាមកាត់បន្ថយជាតិខ្លាញ់ក្នុងខ្លួនដល់ 4% ដែលជាកម្រិតទាបបំផុតគួរឱ្យជឿ និងពិបាកសម្រេចបាន។ ប៉ុន្តែលោកគិតថា វាជាការលះបង់ដ៏សក្តិសមដើម្បីទទួលបានរូបកាយដ៏អស្ចារ្យមានសាច់ដុំហាប់ណែនបែបនេះ។
ប្រភព៖ petmaya
