ក្លិបបាល់ទាត់បឹងកេត បានប្រកាសនៅរសៀលថ្ងៃអង្គារ ទី២៧ ខែធ្នូ អំពីការចែកផ្លូវជាមួយខ្សែការពារកណ្តាល Taher Jahanbakksh ក្រោយចប់លីគកំពូលកម្ពុជា Cambodian Premier League រដូវកាល ២០២២។
ខ្សែការពារ Taher Jahanbakksh បច្ចុប្បន្នមានវ័យ៣២ឆ្នាំ កម្ពស់១.៨៤ម៉ែត្រ ធ្លាប់លេងឲ្យក្លិបជាច្រើននៅលីគកំពូលអ៊ីរ៉ង់ និងក្លិបនៅលីគកំពូលហ្វីលីពីន មុនចូលរួមជាមួយបឹងកេត នៅដើមរដូវកាល២០២២។
ក្រៅពីនេះកាលពីថ្ងៃទី៨ ខែធ្នូ កន្លងទៅ ក្លិបបាល់ទាត់បឹងកេត ក៏បានប្រកាសចែកផ្លូវគ្នាជាមួយកីឡាករពីររូបផ្សេងទៀតផងដែរ គឺអ្នកចាំទី ហ៊ុល គឹមហ៊ុយ និងខ្សែការពារ សេត រ៉ស៊ីប។
បឹងកេត បានបញ្ចប់រដូវកាលឆ្នាំ២០២២ នេះក្នុងពានរង្វាន់លីគកំពូលកម្ពុជា Cambodian Premier League ឈរលេខ៤ ក្នុងតារាងរួមដែលមានសមាជិក៨ក្រុម ខណៈក្នុងពានរង្វាន់សម្តេចតេជោ ហ៊ុន សែន ឆ្នាំ២០២២ ក្រុមនេះបានត្រឹមជើងឯករង និងក្នុងពានរង្វាន់ Cambodian League Cup 2022 បឹងកេត ធ្លាក់ចេញត្រឹមវគ្គ៨ក្រុមចុងក្រោយ បន្ទាប់ពីចាញ់វិសាខា ២-០៕