«ទិវាដឹងគុណឪពុក» មានការរៀបចំឡើងនៅក្នុងបណ្ដាប្រទេសជាច្រើននៅក្នុងពិភពលោក នៅថ្ងៃនេះកូនៗ ឬក្រុមគ្រួសារនិមួយប្រាកដជាមានកាដូ ឬ Plan រៀបចំសម្រាប់ Surprise ប៉ាៗ តែបើឆ្នាំនេះគិតមិនទាន់ចេញទេ អាចបបួលគ្រួសារ ប៉ាម៉ាក់បងប្អូនទស្សនាភាពយន្តរ៉ូមែនទិច ៥រឿងនេះ ដើម្បីរឹតចំណងគ្រួសារ។
សូមចុចអាន កុំភ្លេចត្រៀមកន្សែង! ទិវាអ្នកម្ដាយស្អែក មើល៥រឿងនេះល្អបំផុត
១. Like Father
Like Father គឺជាភាពយន្តខ្នាតធំរបស់ Netflix ដែលសម្ដែងដោយ Kriten Bell និង Kelsey Grammer ជាភាពយន្តបរិយាយពី Bell មនុស្សស្រីដែលឆ្កួតនឹងការងារជាទីបំផុត សូម្បីតែនៅក្នុងថ្ងៃរៀបការ រហូតវិនាទីចុងក្រោយកូនកំលោះរបស់នាងបានប្រកាសបែកគ្នានៅក្នុងថ្ងៃរៀបការនោះតែម្ដង។ រឿងមិនចប់ត្រឹមនេះនោះទេ ព្រោះតែផឹកស្រវឹងជោគជាំដោយសារតែខូចចិត្តខ្លាំងធ្វើឱ្យ Bell ជាប់ក្នុងនាវាកម្សាន្តដែលឆ្ពោះទៅសមុទ្រ Caribbean ជាមួយនឹងប៉ារបស់នាងគឺ Harry ឪពុកដែលនាងខានបានជួបមុខដ៏សែនយូរ។ សេចក្ដីព្យាយាមរបស់ Harry ដើម្បីផ្ដល់កម្លាំងចិត្តឱ្យកូនស្រី និងកែប្រែសម្ព័ន្ធភាពដ៏ផុយស្រួយរបស់ពួកគេ ត្រូវបានបង្ហាញយ៉ាងស្រស់ស្អាត ថ្វីត្បិតតែរឿងនេះត្រូវបានចាត់ចូលក្នុងភាពយន្តអារម្មណ៍ល្អ បែបកំប្លែងក្ដី។ Like Father នឹងធ្វើឱ្យអ្នកទស្សនារំជួលអារម្មណ៍ ពិសេសមនុស្សដែលមានក្ដី្ប្រាថ្នាចង់បានភាពកក់ក្ដៅរវាងឪពុកនិងកូន។
២. Hotel Transylvania 2
Hotel Transylvania 2 ភាពយន្តតុក្កតា (Animation) ដែលបរិយាយពីរឿងរ៉ាវរបស់គ្រួសារ Dracula ក្រោយពីកូនស្រីរបស់គេ Mavis បានរៀបការជាមួយនឹង Jonathan រហូតមានកូនតូចឈ្មោះ Dennis។ ដោយសារតែ Dracula ចង់បន្តពូជពង្ស Dracula បន្តទៅចៅប្រុស Dennis ធ្វើឱ្យចៅប្រុសរបស់គេមើលទៅដូចជាស្ថិតក្នុងរូបភាពគ្រោះថ្នាក់មួយ ថែមរឿងនេះធ្វើឱ្យប៉ះទង្គិចសម្ព័ន្ធភាពឪពុកកូនរវាង Dracula និងកូនស្រី Mavis ថែមទៀតផង។ ចំណុចសំខាន់ដែលរឿងនេះផ្ដល់ឱ្យអ្នកទស្សនាគឺ ការបង្ហាញឱ្យឃើញថាលោកឪពុកតែតែមានក្ដីសង្ឃឹមចង់ឱ្យកូនខ្លួនធ្វើអ្វីមួយ តែចុងក្រោយលោកឪពុកគ្រាន់តែប្រាថ្នាចង់ឱ្យកូនមានក្ដីសុខ និងព្រមទទួលយកបានគ្រប់យ៉ាងដែលកូនត្រូវការ។
៣. Cargo
បើសិនអ្នកនិងលោកឪពុករបស់អ្នកជាអ្នកនិយមទស្សនាភាពយន្ត Zombie មិនគួររំលងរឿង Cargo ជាដាច់ខាតព្រោះរឿងនេះ បរិយាយពី Andy ឪពុកម្នាក់ដែលបានឆ្លងរោគខ្មោចឆៅ Zoombie តែបែរជាត្រូវមករស់នៅចំកណ្ដាលជុំរំខ្មោចឆៅ Zombie ជាមួយនឹងកូនស្រីតូចនាតំបន់ជនបទដាច់ស្រយាលរបស់ប្រទេសអូស្ត្រាលី។ Highlight សំខាន់របស់រឿងនេះគឺភាពតានតឹងបានកើតឡើងនៅពេលដែល Andy ត្រូវរិះរកគ្រប់វិធី គ្រប់យ៉ាង ដើម្បីការពារកូនស្រីឱ្យផុតភ័យអន្តរាយពីគេខ្លួនឯង។
៤. Finding Nemo
បើនិយាយពីភាពយន្តប្រហែលមិនមានអ្នកណាមិនស្គាល់នោះទេ ព្រោះរឿងនេះល្បីល្បាញណាស់។ Finding Nemo និយាយពីតុក្កតាឈ្មោះ Marlin ដែលជាអ្នកចាំថែរក្សាការពារកូនរបស់គេ Nemo គ្រប់ទីកន្លែង តែនៅពេលដែល Nemo បាត់ខ្លួន Marlin ត្រូវហែលទឹកឆ្លងមហាសមុទ្រដ៏សែនធំល្វឹងល្វើយ ត្រូវប្រឈមមុខនឹងគ្រោះថ្នាក់ជាមួយនឹងសត្វចម្លែកៗក្នុងសមុទ្រទឹកជ្រៅ ក្នុងគោលបំណងស្វែងរកកូនប្រុសនិងការពារកូនប្រុសរបស់គេឱ្យរួចផុតពីគ្រប់មហន្តរាយ។
៥. The Game Plan
The Game Plan គឺជារឿងដែលបរិយាយពី Joe Kingman ( Dwayne Johnson) Quarter Back Team Football ដែលកំពុងតែរីករាយក្នុងជីវិតជាទីបំផុតព្រោះអាជីពកំពុងតែជោគជ័យ តែថ្ងៃមួយជីវិតគេចាប់ផ្ដើមផ្លាស់ប្ដូរព្រោះថ្ងៃមួយមានក្មេងស្រីវ័យប្រហែល៧ឆ្នាំ បានលេចមុខឡើងនៅមុខផ្ទះរបស់គេហើយបានអះអាងប្រាប់គេថា ខ្លួនគឺជាកូនស្រីរបស់ Joe ។រឿងនេះ The Rock សម្ដែងជាតួអង្គលោកប៉ាបានយ៉ាងល្អ ថែមទាំងធ្វើឱ្យអ្នកទស្សនាសើច ដោយសេចក្ដីសុខ ស័ក្តិសមបំផុតសម្រាប់ទស្សនាក្នុងគ្រួសារនៅថ្ងៃពិសេសបែបនេះ៕
ថ្វីត្បិតតែរឿងទាំង៥នេះបង្ហាញពីមិត្តភាព សម្ព័ន្ធភាពគ្រួសារ តែកូនៗក៏មិនត្រូវភ្លេចដែរថា ថ្ងៃនេះគឺជាថ្ងៃដ៏ពិសេស ក្រៅពីនាំប៉ាប៉ា ទស្សនាភាពយន្តហើយនោះ គួរតែមានកម្មវិធីពិសេសអ្វីផ្សេងទៀតដូចជាពិសារអាហារល្ងាចជុំគ្នា ហើយជជែកពីរឿងរ៉ាវផ្សេង ដើម្បីទុកជាអនុស្សាវរីយ៍ល្អមួយក្នុងគ្រួសារផងដែរ៕
