សិល្បៈជាតិ៖ បើគ្រាន់តែឆឹម សក្កដា បង្ហោះរូបភាពយ៉ាងផ្អែមល្ហែមក្រសោបឱបនារីម្នាក់នៅលើបណ្ដាញសង្គម មិនមែនជារឿងចម្លែកនោះឡើយ ព្រោះលោកជាតារាសម្ដែងដូច្នេះរូបនោះអាចដកស្រង់ពីការសម្ដែងណាមួយរបស់លោក។ ប៉ុន្តែនៅពេលដែលគូដណ្ដឹងដ៏ស្រស់សោភារបស់លោកគឺអ្នកនាង ពេជ្រ សោភា សួរដេញដោលពីអត្តសញ្ញាណរបស់នារីនោះ ទើបធ្វើឱ្យរឿងដែលធម្មតាមួយនេះក្លាយជាប្រធានបទក្ដៅនៅលើបណ្ដាញសង្គម។
រូបភាពដែលបានបង្ហោះដោយ ឆឹម សក្កដានៅថ្ងៃទី៣ ខែមករា ឆ្នាំ២០២៣ មានខ្លឹមសារថា៖ «ខែរងាគេថតរូបចឹងឯង។ ធម្មតាៗ ហាមគិតផ្ដេសផ្ដាស» នេះ បានក្លាយជាប្រធានបទដែលហ្វេនៗចូលមកដេញដោលនិងឆ្លើយតបភ្លាមៗនៅពេល ម្ចាស់បេះដូងរបស់បុរសសង្ហារូបនេះបានចូលមកសាកសួរចង់ដឹងពីអត្តសញ្ញាណនារីបែរខ្នងនៅក្នុងរង្វង់ដៃឱបរបស់លោក ឆឹម សក្កដា ថា៖ «ម្នាក់ស្រីនឹងអ្នកណាគេ?»
ហ្វេនៗដែលជាអ្នកគាំទ្រតារាទាំងពីរដួងនេះបានចូលមកឆ្លើយតបអ្នកនាងពេជ្រ សោភា ដូចៗគ្នាថា មនុស្សដែលស្ថិតក្នុងរង្វង់ដៃរបស់ ឆឹម សក្កដា គឺគ្មានអ្នកណាផ្សេងនោះឡើយ ប៉ុន្តែគឺជាកញ្ញា ពេជ្រ សោភា ហ្នឹងឯង។
ស្នេហាដ៏ទុំជោររហូតដល់សម្រេចចិត្តដឹកដៃគ្នាភ្ជាប់ពាក្យនេះកាន់តែផ្អែមល្ហែមឡើងៗ ព្រោះគូស្នេហ៍មួយគូនេះឧស្សាហ៍មានអ្វីថ្មីៗសំរាប់ចែកឱ្យអ្នកគាំទ្របានរំភើបនិងរីករាយជាមួយខ្លួនជានិច្ច។
ហ្វេនដែលដឹងច្បាស់ថានារីក្នុងដៃលោក ឆឹម សក្កដា គឺជាអ្នកនាង ពេជ្រ សោភា បានចូលមកអបអរសាទរចំពោះស្នេហាអ្នកទាំងពីរ ដោយមានអ្នកខ្លះថែមទាំងនិយាយលេងសើចទៀតថា៖ ច្រណែន ស្វីតណាស់ អត់អាណិតអ្នកអត់គូទេពូ ជាដើម៕
