ស្រុកល្វាឯម ៖ យុវជន២នាក់ ត្រូវរថយន្តតូយូតា វីហ្គោបុកស្លាប់ភ្លាមៗ ខណៈជិះម៉ូតូរេចង្កូត ចូលគន្លងផ្លូវម្ខាងទៀត កាលពីថ្ងៃទី១៧ ខែ មករា ឆ្នាំ២០២៣ វេលាម៉ោង២២:០៨ នាទី នៅកំណាត់ផ្លូវលេខ៧០B ស្ថិតក្នុងភូមិ វាលធំឃុំ ពាមឧកញ៉ាអុង ស្រុកល្វាឯមខេត្តកណ្តាល។
ជនរគ្រោះទី១ ឈ្មោះ កើត វិចិត្រ ភេទប្រុស អាយុ 16 ឆ្នាំ ជាអ្នកបើកម៉ូតូ ស្លាប់នៅកន្លែងកើតហេតុ។ ទី២ ឈ្មោះ សុន ផានុត ភេទ ប្រុស អាយុ ១៥ ឆ្នាំ ជាអ្នករួមដំណើរស្លាប់នៅកន្លែងកើតហេតុ។ ទាំងពីរនាក់រស់នៅភូមិកោះរះលើ ឃុំ កោះរះ ស្រុក ល្វាឯម ខេត្ត កណ្តាល ។
តាមប្រភពព័ត៌មានបានឲ្យដឹងថា មុនពេលកើតហេតុមានម៉ូតូមួយគ្រឿងម៉ាក Honda Dream C125 ពណ៌ខ្មៅពាក់ស្លាកលេខភ្នំពេញ1GD-5598 បើកបរដោយពុំមានពាក់មួកសុវត្ថិភាពនិងមានកញ្ចក់មើលក្រោយ រួមដំណើរដោយបុរសម្នាក់ បើកបរក្នុងទិសដៅពីលិចទៅកើត (ពីឃុំពាមឧកញ៉ាអុងទៅឃុំកោះរះ ) ពេលបើកមកដល់ចំណុចកើតហេតុក៏បានវេចង្កូតចូលទៅចំណែកផ្លូវរបស់ភាគីម្ខាងទៀត បណ្តាលអោយបុកចំពេញទំហឹងជាមួយរថយន្តម៉ាក Toyota Vigo ពណ៌ទឹកប្រាក់ ពាក់ស្លាកលេខភ្នំពេញ1BF-8968 កំពុងបើកបរលើផ្លូវអទិភាពរបស់ខ្លួន ក្នុងទិសដៅបញ្ច្រាសគ្នា បណ្តាលឲ្យ ស្លាប់ទាំង២នាក់នៅនឹងកន្លែងភ្លាមៗ។
ក្រោយកើតហេតុ សមត្ថកិច្ចនគរបាលចរាចរណ៍បានចុះទៅទីទាំងកើតហេតុ ធ្វើការវាស់វែង រួចបាននាំយកម៉ូតូ និងរថយន្ត រួមទាំងអ្នកបើកបររថយន្ត ទៅអធិការដ្ឋាននគរបាលស្រុកល្វាឯមដើម្បី ចាត់ការ តាមនិតិវិធី។ ចំណែកសាកសពត្រូវបានប្រគល់ជូនក្រុមគ្រូសារធ្វើបុណ្បតាមប្រពៃណី៕
អត្ថបទ៖ ផ្នែកសង្គម