ចៅក្រមស៊ើបសួរសម្រេចចេញដីបង្គាប់ឱ្យឃុំខ្លួន តារាសម្ដែងភាពយន្តដ៏ល្បី លោក យិត មាសឧស្សាហ៍ ហៅ អេដវីន បញ្ជូនទៅឃុំខ្លួននៅពន្ធនាគារព្រៃស ទោះជាភាគីអ្នកនាង សុទ្ធ បញ្ចកា ជាដៃគូស្នេហ៍ព្យាយាមដកពាក្យបណ្ដឹងវិញក្ដី។
លោក អេដវីន ត្រូវបានសមត្ថកិច្ចជំនាញ នៃការិយាល័យប្រឆាំងការជួយដូរមនុស្ស ធ្វើការឃាត់ខ្លួនកាលពីថ្ងៃទី២០ ខែមិថុនា បន្ទាប់មកលោក ត្រូវបានតុលការសម្រេចចោទប្រកាន់ពីបទអំពើហិង្សាប្រព្រឹត្តដោយសហព័ន្ធ ឬអនីតិសង្វាសជន ដែលមានចែងក្នុងមាត្រា ២២២ នៃក្រមព្រហ្មទណ្ឌ។ នៅក្នុងថ្ងៃទី២០ ខែមិថុនា ដដែលនោះ អ្នកនាង សុទ្ធ បញ្ចកា បានប្ដូរចិត្តហើយសុំដកពាក្យបណ្ដឹង ឈប់ប្ដឹងលោក អេដវីន និងមិនមានទាមទារជាសំណងអ្វីទាំងអស់។
ថ្វីត្បិតតែអ្នកនាង សុទ្ធ បញ្ចកា បានដកពាក្យបណ្ដឹងក៏ពិតមែន តែលោក អេដវីន នៅជាបើបណ្ដឹងរបស់ម្ដាយបង្កើតអ្នកនាង សុទ្ធ បញ្ចកា ពីបទបំផ្លិចបំផ្លាញទ្រព្យសម្បត្តិ និង បណ្ដឹងរបស់លោក ហ៊ាង រតនា ពីបទបង្ករបួសស្នាម ដូច្នេះ សមត្ថកិច្ចអាវុធហត្ថរាជធានីភ្នំពេញ បានកសាងសំណុំរឿងបញ្ជូនជនសង្ស័យ ទៅកាន់តុលការដើម្បីផន្តាទោសតាមច្បាប់។
នៅថ្ងៃទី២៣ ខែមិថុនានេះ តុលាការបានបើកការស៊ើបសួរលោក អេដវីន ពីបទ ហិង្សាដោយអនីតិសង្វាសជន និង ធ្វើឱ្យខូចខាតដោយចេតនា។
គួរដឹងដែរថា អ្នកនាង សុទ្ធ បញ្ចកា បានព្យាយាមស្នើសុំដកពាក្យបណ្ដឹងម្ដងហើយម្ដងទៀត នៅអយ្យការអមសាលាដំបូងរាជធានីភ្នំពេញ តែលោក អេដវីន (យិត មាសឧស្សាហ៍) នៅថ្ងៃទី២៣ ខែមិថុនា ដដែលនេះ ត្រូវបានសាលាដំបូងរាជធានី សម្រេចដាក់ឱ្យស្ថិតនៅក្រោមការពិនិត្យ ពីបទ អំពើហិង្សាប្រពឹត្តដោយសហព័ទ្ធ ឬអនិតិសង្វាសជន និងបទធ្វើឱ្យខូចខាតដោយចេតនា សម្រេចឃុំខ្លួនជាបណ្ដោះអាសន្នតាមដីកាបង្គាប់ឱ្យឃុំខ្លួនដោយចៅក្រម ស៊ើបសួរ សាន ប៊ុនធឿន៕
