សិល្បៈជាតិ៖ ក្រោយរៀបការជាមួយស្វាមីសញ្ជាតិអាមេរិក គឺលោក Jovany Antonio នោះ អ្នកនាង ទឹម រដ្ឋា នាពេលនេះសម្រាលបានកូនស្រីម្នាក់ដែលមានមុខមាត់គួរឱ្យស្រឡាញ់ និងមានឈ្មោះពីរោះប្លែក។
តាមអ្នកនាង ទឹម រដ្ឋា បង្ហោះ កូនស្រីមានឈ្មោះ Haylie Apsara Antonio ហៅ អូនភ្លៀង បានកើតនៅថ្ងៃទី ២៧ ខែមីនា ឆ្នាំ ២០២៣ ម៉ោង ៧៖ ០១នាទីពេលព្រឹក។
អ្នកនាង ទឹម រដ្ឋា បានរៀបរាប់ប្រាប់មហាជននៅលើបណ្ដាកសង្គមហ្វេសប៊ុកថា ៖ «សូមស្វាគមន៍មកកាន់ពិភពលោកដ៏ស្រស់ស្អាត កូនទន្សាយ តូចរបស់ម៉ាក់ និងប៉ា ជម្រាបសួរលោកតាលោកយាយ អ៊ុំពូមីងនិងអ្នកគាំទ្ររបស់ mommy អូនទាំងអស់ អូនមានឈ្មោះ Haylie Apsara Antonio ហៅ ( អូនភ្លៀង )»។
ចំពេលាល្អនេះ គេឃើញមានមហាជន សាច់ញាតិ និងតារាសិល្បៈជាច្រើននាក់បានចូលរួមអបអរសាទរចំពោះអ្នកនាង ទឹម រដ្ឋា និងស្វាមី ថែមទាំងបានជូនពរឱ្យអ្នកនាងមានសុខភាពល្អប្រសើរទៀតផង។ ប៉ុន្តែយ៉ាងណាមិញ គេនៅមិនទាន់ច្បាស់ថា អ្នកនាង ទឹម រដ្ឋា នឹងទៅសហរដ្ឋអាមេរិកដើម្បីយកសញ្ជាតិឱ្យកូនស្រីនៅពេលណានោះទេ។
អ្នកនាង ទឹម រដ្ឋា ធ្លាប់លើកឡើងថា នាងមានបំណងនឹងចេញទៅរៀបការជាលើកទី២ នៅឯសហរដ្ឋអាមេរិក ដែលជាស្រុកកំណើតរបស់ស្វាមី និងឪពុកម្ដាយក្មេកនាងម្ដងទៀត។ ជាពិសេសគឺដើម្បីទទួលបានសញ្ជាតិ ឱ្យនាងអាចរស់នៅទីនោះដោយស្របច្បាប់។
យ៉ាងណាមិញ គេចាំបានថា អ្នកនាង ទឹម រដ្ឋា និងស្វាមី បានចាប់ដៃគ្នាចូលរោងការកាលពីថ្ងៃទី ២៦ ខែមីនា ឆ្នាំ ២០២២ ក្រោមវត្តមានសិល្បករ សិល្បការិនីល្បីជាច្រើនចូលរួមជាសក្ខីភាព និងអបអរអ្នកទាំងពីរ៕