បទ «មនុស្សពិសេស» លាតត្រដាងពីស្នេហាផ្អែមល្ហែមកូនប្រុស លោក ចា រិទ្ធី កំពុងល្បីល្បាញពេញបណ្ដាញសង្គម

សិល្បៈជាតិ៖ «I believe in destiny, you believe in forever,» គ្រាន់តែជាឃ្លាដំបូងនៃបទចម្រៀងមានចំណងជើងថា «មនុស្សពិសេស» ដែលបទនេះកំពុងតែល្បីល្បាញនៅគ្រប់បណ្ដាញសង្គមទាំង TikTok , Facbook , Youtube និង Instagram។ ប៉ុន្តែអ្នកលេងបណ្ដាញសង្គមគ្រប់គ្នាមានចម្ងល់ថា តើតួឯកប្រុសស្រីជាគូស្នេហ៍ផ្អែមល្ហែមមួយគូ បានសម្ដែងនៅក្នុងបទចម្រៀងនេះ គឺជាអ្នកណា? បើមើលទៅពួកគេមិនមែនជាតារាសិល្បៈទេ តែដូចជាធ្វើឱ្យអ្នកទស្សនាលើសជាតិស្ករ។

យោងតាមការបង្ហោះផ្សាយនៅលើយូធូបឆាណែលឈ្មោះ Olicaztc ដែលមានអ្នកតាមដានជាង 54,1 ពាន់ បានបញ្ចេញបទចម្រៀងមានចំណងជើងថា «មនុស្សពិសេស» នេះ នៅថ្ងៃទី ១០ ខែមីនា ឆ្នាំ ២០២៣ ដែលបានបកស្រាយដោយតារាចម្រៀងយុវវ័យពីររូបសហការគ្នាគឺ Glomyy Vincent និង Olica។ តាមការប្រកាសប្រាប់មហាជន មួយបទនេះត្រូវបានរៀបរៀង និងសរសេរទំនុកច្រៀងរៀបរាប់ពីអត្ថន័យស្នេហាស៊ីជម្រៅដោយ លោក Glomyy Vincent ដែលត្រឹមរយៈពេល ១០ ថ្ងៃនៃការបញ្ចេញបទនេះនៅលើបណ្ដាញសង្គមជាលើកដំបូង គឺមានអ្នកទស្សនាដល់ទៅ ១ លានដងនៃអត្រាទស្សនា។ តើបទនេះលោកបានសរសេរពីរឿងរ៉ាវស្នេហ៍របស់អ្នកណា?

បើមើលឱ្យចំ បទនេះគឺហៅថា ជាចម្រៀងសម្រាប់អបអរអាពាហ៍ពិពាហ៍ជូនចំពោះកូនកំឡោះនិងកូនក្រមុំ ដែលកូនកំឡោះក្នុងបទនេះឈ្មោះ ចា សេរីវុឌ្ឍ និងកូនក្រមុំឈ្មោះ ស៊ីដា សាគូរ៉ា បានរៀបមង្គលការនឹងគ្នានៅថ្ងៃទី ៣ ខែមីនា ឆ្នាំ ២០២៣។ ចុះគូស្នេហ៍មួយគូនេះមានជាប់ឈាមជ័រអ្នកសិល្បៈមែនទេ?

ច្បាស់ណាស់ សាវតា លោក ចា សេរីវុឌ្ឍ គឺជាកូនប្រុសច្បងរបស់លោក ចា រិទ្ធី ដែលជាអតីតតារាសម្ដែង និងជាអ្នកដឹកនាំកម្មវិធីប្រគំតន្រ្ដីល្បីឈ្មោះប្រចាំទូរទស្សន៍អាស៊ីអាគ្នេយ៍ ដែលសព្វថ្ងៃលោកក៏ជាអ្នកជំនួញជោគជ័យមួយរូបផងដែរ។ នៅអំឡុងឆ្នាំ ២០១៧ កូនប្រុសច្បងរបស់លោក ចា រិទ្ធី បានរៀនចប់ថ្នាក់បរិញ្ញបត្រផ្នែកសេដ្ឋកិច្ច នៅសាកលវិទ្យាល័យលីមកុងវីង និងបានបញ្ចប់ថ្នាក់អនុបណ្ឌិតផ្នែកទំនាក់ទំនងអន្ដរជាតិ នៅប្រទេសអូស្រា្ដលីនៅឆ្នាំ ២០១៩។ លោកក៏មានកូនស្រីពៅម្នាក់ទៀតបានបញ្ចប់ការសិក្សាថ្នាក់អនុបណ្ឌិតនៅសកលវិទ្យាល័យ DEAKINUNIVERSITY ក្នុងទីក្រុងមែលប៊ន នៃប្រទេសអូស្ត្រាលីនៅឆ្នាំ ២០២២ផងដែរ។

កូនប្រុសលោក ចា រិទ្ធី វ័យប្រមាណ ៣០ ជាងរូបនេះ ត្រូវបានគេដឹងថា សព្វថ្ងៃគឺជាមន្ត្រីយោធាស័ក្ដមួយ បានសាងចំណងស្នេហាផ្អែមល្ហែមរហូតក្លាយជាប្ដីប្រពន្ធស្របច្បាប់ជាមួយភរិយាឈ្មោះ ស៊ីដា សាគូរ៉ា ដែលគេបានដឹងថា កញ្ញាជាសហស្ថាបនិកនៃក្រុមហ៊ុនរចនាផ្សព្វផ្សាយឈ្មោះ Bread Design Media និងបានបញ្ចប់ការសិក្សាពីទីក្រុងបាងកក ប្រទេសថៃ។

អ្វីដែលចាប់អារម្មណ៍ជាពិសេសទៀតនេះ ចំណងជើងបទចម្រៀងនេះជាភាសាអង់គ្លេស «Special Someone(SS)» ហើយឯគូស្នេហ៍ពិតមួយគូមានឈ្មោះឡើងផ្តើមដោយអក្សរ Sដូចគ្នា គឺ Sereyvuth និង Sakura ក៏បានចែករំលែកសារនៅលើហ្វេសប៊ុកទាក់ទងនឹងអត្ថន័យក្តីស្នេហ៍របស់ពួកគេតាមរយៈបទចម្រៀងមួយនោះផងដែរនៅមុនថ្ងៃចេញផ្សាយជាផ្លូវការ ដោយបានលើកឡើងខ្លះៗថា «Good Memories are still memories. Our current emotion and feeling are outcomes of those memories» ដែលមានន័យថា «ការចងចាំល្អនៅតែជាការចងចាំ។ មនោសញ្ចេតនា និងអារម្មណ៍របស់យើងពេលនេះ គឺជាលទ្ធផលនៃការចងចាំទាំងនោះ»។

ស្នេហាគូស្វាមីភរិយាមួយគូនេះបានធ្វើឱ្យអ្នកលេងបណ្ដាញសង្គម ជាពិសេសមជ្ឍដ្ឋានមហាជនទូទៅរំជើបរំជួលតាមរយៈបទ «មនុស្សពិសេស» ។ បើគិតមកត្រឹមថ្ងៃទី 28 ខែមីនា នេះ មានចំនួនអ្នកទស្សនានៅលើយូធូបចំនួន ១,5 លានដងក្នុងរយៈពេល ២សប្ដាហ៍។ ដូច្នោះហើយតើប្រិយមិត្តទាំងអស់ពេញចិត្តបទថ្មីមួយនេះកម្រិតណា?

អត្ថបទពាក់ព័ន្ធ