អគ្គិភ័យបានឆាបឆេះ រោងយាម ក្នុងវិទ្យាល័យ ជា ស៊ីម សង្កាត់បឹងកេងកង។ ហេតុការណ៍នេះកើតឡើងនៅវេលាម៉ោង១៧ និង១០នាទី ថ្ងៃទី០២ ខែកក្កដា ឆ្នាំ២០២១នេះ នៅចំណុតាមបណ្ដោយផ្លូវលេខ៦៣ កែងផ្លូវ៣៩២ ភូមិ១ សង្កាត់បឹងកេងកងទី១ ខណ្ឌបឹងកេងកង រាជធានីភ្នំពេញ។
លោកវរសេនីយ៍ឯក ព្រហ្ម យ៉ន នាយការិយាល័យបង្ការពន្លត់អគ្គិភ័យ និងសង្គ្រោះ នៃស្នងការដ្ឋាននគរបាលរាជធានីភ្នំពេញ បានប្រាប់ឲ្យដឹងថា រោងយាមនេះមានម្ចាស់ឈ្មោះ ស្រី ឡាក់ ភេទប្រុស អាយុ៨៧ឆ្នាំ ជាអ្នកយាមសាលា មូលហេតុដែលបណ្ដាលឲ្យមានអគ្គិភ័យនេះ ដោយសារឆ្លងចរន្តអគ្គិសនី ។
ក្នុងហេតុការណ៍មួយនេះបានបំផ្លាញផ្ទះឈើប្រក់សង្កសី មានទំហំ ៤ម៉ែត្រ គុណ ៥ម៉ែត្រ អស់ទាំងស្រុង និងពុំបណ្តាលឲ្យឆេះរាលដាលដល់ផ្ទះអ្នកជិតខាង និងអគារសាលាឡើយ ។
ក្នុងហេតុការណ៍នេះ សមត្ថកិច្ចប្រើប្រាស់រថយន្ដការិយាល័យបង្ការ និងពន្លត់អគ្គិភ័យ ចំនួន២គ្រឿង ប្រើប្រាស់ទឹកអស់ ២ឡាន និងរថយន្តក្រសួងមហាផ្ទៃ ចំនួន ១គ្រឿង ប្រើប្រាស់ទឹកអស់ ១ឡាន ទើបរលត់ទាំងស្រុង នៅវេលាម៉ោង១៧និង២០នាទី ថ្ងៃដដែល ៕
ប្រភព៖ អគ្គស្នងការនគរបាលជាតិ