យោងតាមការចុះផ្សាយរបស់ Main Stand សារព័ត៌មានប្រទេសថៃ បានឲ្យថាលោក Issara Sritaro គ្រូបង្គោលរបស់ក្រុមបាល់ទាត់ជម្រើសជាតិថៃ អាយុក្រោម២៣ឆ្នាំ រំពឹងឈ្នះមេដាយមាស ក្នុងព្រឹត្តិការណ៍កីឡាស៊ីហ្គេម លើកទី៣២ ឆ្នាំ២០២៣ ដែលកម្ពុជា ជាម្ចាស់ផ្ទះ។
លោក Issara Sritaro ធ្លាប់ដឹកក្រុមបាល់ទាត់ជម្រើសជាតិថៃ អាយុក្រោម១៨ឆ្នាំ នៃពានរង្វាន់ AFF U18 Championship 2019 ចាញ់ក្រោមថ្វីជើងកម្ពុជា ក្នុងលទ្ធផល ៤-៣ វគ្គជម្រុះពូល B នៅកីឡដ្ឋាន Thành Long ទីក្រុងហូជីមិញ ប្រទេសវៀតណាម។
៤គ្រាប់របស់ U18 កម្ពុជា ស៊ុតបញ្ចូលទីដោយ វុធ តុលា នៅនាទី៥៣’, Chatmongkol ស៊ុតចូលទីខ្លួនឯងនៅនាទី៧៥’ និង សៀង ចន្ធា ស៊ុត២គ្រាប់ម្នាក់ឯងនៅនាទី៨៧’,៨៨’។
ទស្សនាវីដេអូហាយឡាយ Thailand 3-4 Cambodia | AFF U18 Championship 2019៖
ទស្សនាវីដេអូហាយឡាយ Cambodia 2-1 Thailand | AFC U-19 Championship 2020 នៅពហុកីឡដ្ឋានជាតិ៖
សម្រាប់វិញ្ញាសាបាល់ទាត់ផ្នែកបុរស ក្នុងព្រឹត្តិការណ៍កីឡាស៊ីហ្គេម លើកទី៣២ ឆ្នាំ២០២៣ នឹងមានក្រុមចូលរួមចំនួន១០ប្រទេស តែពុំមានវត្តមានក្រុមជម្រើសជាតិប្រ៊ុយណេ អាយុក្រោម២២ឆ្នាំឡើយ។
នេះមិនមែនជាលើកដំបូងឡើងដែលប្រ៊ុយណេ មិនចូលរួមក្នុងព្រឹត្តិការណ៍កីឡាស៊ីហ្គេម ដោយគឺនៅឆ្នាំ២០២២ ស៊ីហ្គេមលើកទី៣១ នៅប្រទេសវៀតណាម ក៏ប្រ៊ុយណេ មិនបានបញ្ចូលអត្តពលិកចូលរួមដូចគ្នា។
ពិធីចាប់ឆ្នោតវគ្គចែកពូលទាំងវិញ្ញាសាបាល់ទាត់ផ្នែកបុរស, បាល់ទាត់នារី, បាល់ទះក្នុងសាល, បាល់ទះឆ្នេរខ្សាច់បុរស, បាល់ទះឆ្នេរខ្សាច់នារី, បាល់បោះបុរស, បាល់បោះនារី និងកីឡាគ្រីឃីត ក្នុងព្រឹត្តិការណ៍កីឡាសុីហ្គេម ឆ្នាំ២០២៣ នឹងធ្វេីឡេីងនៅថ្ងៃទី៥ ខែមេសា ឆ្នាំ២០២៣ ដំណាលគ្នា នៅពហុកីឡដ្ឋានជាតិមរតកតេជោ។
ក្រុមចូលរួមចំនួន១០ប្រទេស មានដូចខាងក្រោម៖
១.កម្ពុជា
២.ថៃ
៣.ឥណ្ឌូនេស៊ី
៤.មីយ៉ាន់ម៉ា
៥.ម៉ាឡេស៊ី
៦.សិង្ហបុរី
៧.វៀតណាម
៨.ហ្វីលីពីន
៩.ទីម័រខាងកើត
១០.ឡាវ។
សម្រាប់ស៊ីហ្គេមលើកទី៣១ ឆ្នាំ២០២២ ដែលប្រទេសវៀតណាម ធ្វើជាម្ចាស់ផ្ទះ ម្ចាស់មេដាយមាសវិញ្ញាសាបាល់ទាត់ផ្នែកបុរស បានទៅលើក្រុមវៀតណាម ក្រោយឈ្នះថៃ ក្នុងលទ្ធផល ១-០ នៅវគ្គផ្តាច់ព្រ័ត្រ កីឡាដ្ឋាន My Dinh។
គួរដឹងថាព្រឹត្តិការណ៍កីឡាស៊ីហ្គេម លើកទី៣២ ដែលកម្ពុជា ទទួលរៀបចំធ្វើជាម្ចាស់លើកដំបូងក្នុងរយ:ពេល ៦៤ឆ្នាំ នឹងប្រព្រឹត្តទៅចាប់ពីថ្ងៃទី៥ ដល់ថ្ងៃទី១៧ ខែឧសភា ឆ្នាំ២០២៣ ខណ:កីឡាអាស៊ានប៉ារ៉ាហ្គេម លើកទី១២ ឆ្នាំ២០២៣ នឹងចាប់ពីថ្ងៃទី៣ ដល់ថ្ងៃទី៩ ខែមិថុនា ឆ្នាំ២០២៣៕
