សិល្បៈជាតិ៖ តារាចម្រៀងល្បីៗប្រចាំព្រះរាជាណាចក្រកម្ពុជាបាននិងកំពុងត្រៀមបង្ហាញវត្តមានជាមួយនឹងបទចម្រៀងថ្មីរបស់ខ្លួននៅក្នុងព្រឹត្តិការណ៍ «ចូលឆ្នាំបន្ទាយឆ្មារ» រយៈពេលពីរថ្ងៃពេញនៅក្នុងបរិវេណសាលាបឋមសិក្សាបន្ទាយឆ្មារ ក្នុងឃុំបន្ទាយឆ្មារ ស្រុកថ្មពួក ដោយចាប់ពីថ្ងៃទី ១៥ និង ១៦ ខែមេសា ឆ្នាំ ២០២៣ ខាងមុខនេះ។
ការប្រគំតន្រ្តីដ៏អស្ចារ្យនេះ មានការចូលរួមសម្តែងពីតារាចម្រៀងល្បីៗ ដូចជា លោក ឆន សុវណ្ណរាជ កញ្ញា ចំរើន សុភ័ក្រ កញ្ញា សុវត្ថិឌី ធារិកា លោក ឃុន វុត្ថា លោក នួន សុធារ័ក្ស លោក ម៉ៅ ហាជី លោក រិន សាវ៉េត កញ្ញា ម៉ង់ ចាន់កញ្ញា កញ្ញា ណាក់ ស្រីណា លោក ហង្ស សម្បើមស័ក្ដ កញ្ញា TEY$ កញ្ញា ណូម័រ លោក ខាត់ សម្បត្តិកិត្យា និងDJ ល្បីៗជាច្រើនរូបទៀត។ ពួកគេនឹងសម្តែងបទចម្រៀងថ្មីៗ និងក្បាច់រាំប្លែកៗសប្បាយៗនៅផ្ទាល់ពីមុខមហាជនរាប់ពាន់នាក់ចូលរួមកម្សាន្ត។
សូមជម្រាបថា ក្រៅពីការសប្បាយរីករាយជាមួយកំពូលតារាល្បីៗប្រចាំព្រះរាជាណាចក្រកម្ពុជាហើយនោះព្រឹត្តិការណ៍ «ចូលឆ្នាំបន្ទាយឆ្មារ» ក៏មាននូវកម្មវិធីកម្សាន្តជាច្រើនដូចជា ការលេងល្បែងប្រជាប្រិយ ការសម្ដែងល្ខោនខោល ការប្រឡងបវរកញ្ញាវ័យចំណាស់ ការរាំសប្បាយនៅតំបន់ត្រជាក់ចិត្ត ការរាំសប្បាយរាំវង់ស្គរដៃ ការបណ្ដែតគោមទឹកនៅកសិន្ធប្រាសាទបន្ទាយឆ្មារ និងការតាំងបង្ហាញពិព័រណ៍ផលិតផលទំនិញដ៏សម្បូរបែបថែមទៀត។ ព្រឹត្តិការណ៍ «ចូលឆ្នាំបន្ទាយឆ្មារ» នឹងធ្វើឡើងនៅលើទឹកដីនៃប្រាសាទបន្ទាយឆ្មារ ស្ថិតនៅស្រុកថ្មពួក ខេត្តបន្ទាយមានជ័យ រយៈពេល៤ថ្ងៃ គិតចាប់ពីថ្ងៃទី១៣,១៤,១៥ និង១៦ ខែមេសា ឆ្នាំ២០២៣ ខាងមុខនេះ៕
