សិល្បៈជាតិ៖ កំពូលតារាចម្រៀងរ៉េប G-Devith បានចំណាយថវិការផ្ទាល់ខ្លួនលុយទិញម៉ោងពីរោងភាពយន្តមួយ Hall ដើម្បីបញ្ចាំងភាពយន្ត «ទេពហត្ថា» ឱ្យមហាជនទស្សនាឥតគិតថ្លៃ។ លោកចូលរួមបែបនេះ បន្ទាប់ពីទទួលដំណឹងថា ភាពយន្តឯកសារដែលលើកស្ទួយពីរបាំព្រះរាជទ្រព្យខ្មែរមួយនេះ មិនសូវមានអ្នកគាំទ្រ ពោលគឺសល់កៅអីទំនេរច្រើន។
លោក G-Devith បង្ហោះសារទាំងស្រុងដូច្នោះ ៖ «ជាមូលដ្ឋានគ្រឹះក្នុងការចូលរួមគាំទ្រអ្វីមួយ យើងគួរយល់ដឹងពីចំនុចចាប់ផ្ដើម និងការវិវត្តន៍អំពីរបស់នោះអោយបានច្បាស់! ទេពហត្ថា (The Perfect Motion) គឺជាខ្សែភាពយន្ដរៀបរាប់យ៉ាងលំអិតអំពីប្រវត្តិ និងការចងចាំនៃរបាំបុរាណខ្មែរ ឬរបាំព្រះរាជទ្រព្យ ជាពិសេសមនោសញ្ចេតនា និងអានុស្សាវរីយ៍ ដែលមិនអាចកាត់ថ្លៃបានរវាងគ្រូ និងសិស្ស។ ជាកូនខ្មែរមួយរូបមិនគួររំលង ភាពយន្តដ៏ល្អឯកមួយនេះទេ។ ដើម្បីកុំឱ្យឱកាសនេះកន្លងផុត សូមអញ្ជើញ Top Fan ទាំងអស់គ្នា ទៅទស្សនាខ្សែភាពយន្ត ទេពហត្ថា នាថ្ងៃនេះដោយឥតគិតថ្លៃ ជាមួយខ្ញុំបាទ។ ទីតាំង៖ Legend Cinema Noro Mall ម៉ោង៖ ៦ និង ៣០នាទីល្ងាច បញ្ជាក់: សម្រាប់អ្នកចង់ចូលរួមទស្សនា អាចទៅយកសំបុត្រជាមុន ចាប់ពីម៉ោង ៤ល្ងាចនៅទីតាំងរោងកុនតែម្តង! ចំនួនមានកំណត់ត្រឹមតែមួយ Hall តែប៉ុណ្ណោះ »៕