សិល្បៈជាតិ៖ តាំងពីប្រកាសផុតកុងជាមួយផលិតកម្ម រាម គេសម្គាល់ឃើញថា អ្នកនាង មាស សុខសោភា ហាក់ស្ងប់ស្ងាត់ក្នុងការបញ្ចេញបទចម្រៀង ហើយសូម្បីតែបទចម្រៀងបែបប្រពៃណីអបអរពិធីបុណ្យចូលឆ្នាំខ្មែរ នោះក៏មិនបានបញ្ចេញផ្សាយចេញដូចឆ្នាំសព្វដងដែរ។
មានការលើកឡើងពីអ្នកនាង មាស សុខសោភា ផ្ទាល់ថា អ្នកអាចនឹងរយាលដៃបន្តិចពីការងារចម្រៀងរបស់អ្នកនាង ដោយអ្នកផ្ដោតលើការជំរុញផលិតផលថ្មីឱ្យមានទីផ្សារមួយជំហ៊ានសិន។ យ៉ាងណាមិញ អ្នកនាង មាស សុខសោភា ទើបតែចាកចេញពីផលិតកម្ម រាម ថ្មីៗពេក ជាហេតុនាំឱ្យអ្នកផ្ដើមផលិតបទចម្រៀងថ្មីៗដើម្បីវាយឡុកទីផ្សារចម្រៀងឡើងវិញតាមរយៈផលិតកម្មផ្ទាល់ខ្លួន មិនទាន់ពេលវេលា។
ថ្មីៗនេះដែរ តាមរយៈការបង្ហោះរបស់លោក ដាភ្លេង ដែលគ្រប់គ្នាស្គាល់ថាជាអ្នកធ្វើភ្លេង និងបទចម្រៀងល្បីឱ្យផលិតកម្មថោនពីមុននេះ បានឱ្យឃើញថា ទាំងលោក ដាភ្លេង ពូឃ្លាំង និងអ្នកនាង មាស សុខសោភា កំពុងសម្ងំផលិតបទចម្រៀងដែលជាស្នាដៃរួមគ្នា។
លោក ដាភ្លេង បានបង្ហោះរូបភាពនេះ នៅថ្ងៃទី ២៣ ខែមេសា ឆ្នាំ ២០២៣នេះ ដោយសរសេរសារថា ៖ «ពូ និង បងស្រី មកញាំអាហារសាមគ្គីនៅផ្ទះខ្ញុំបាទ ដា ភ្លេង ល្ងាចនេះ»។
រីឯ ពូឃ្លាំង វិញបានបង្ហោះរៀបរាប់ឱ្យដឹងថា លោកកំពុងត្រៀមបទចម្រៀងសម្រាប់ស៊ីហ្កេមជាមួយនិងអ្នកនាង មាស សុខសោភា ។ ពូឃ្លាំង ៖ «បទថ្មី ពូ នឹង កំពូលតារាចំរៀងសំលេងផ្អែម រាងតូចច្រលឹង មាស សុខសោភា នឹងត្រៀមបញ្ចេញឆាប់ៗនេះ សំរាប់អបអរកម្មវិធី ស៊ីហ្គេម ….។ រៀបចំភ្លេងដោយកវីលេងសក់ Voch beat និងអ្នកភ្លេងចិត្តស្មោះ ដាភ្លេង ឆ្នាំនេះ ពូ ឃ្លាំង នឹងចែ ភា សុំហើយ…..»។
សូមជម្រាប ទន្ទឹមនឹងត្រៀមស្នាដៃថ្មីនេះ សម្រាប់ហ្វេនរបស់អ្នកនាង មាស សុខសោភា វិញ ពួកគេនៅតែមានការជឿរជាក់លើនាងថា ជាកំពូលតារាចម្រៀងសំនៀងផ្អែម Top 1 ទៅហើយ ទោះជាទៅដល់ផលិតកម្មណាក៏នៅតែល្បី ព្រោះតែសម្ថភាពរបស់អ្នកនាង។ ដោយឡែក គ្រប់គ្នាក៏នៅចាំអ៊ុតមើលទៀតថា បទថ្មីដែលជាស្នាដៃជាមួយ ពូឃ្លាំង នឹងប្លែកអារម្មណ៍ខ្លាំងកម្រិតណា? មានតែចាំតាមដានបន្តទៀត។
