កីឡាករ ឡេង ណូរ៉ា ក្មេងកំព្រាឪពុកតាំងពីវ័យ៦ឆ្នាំ និងរស់នៅជាមួយអង្គការកុមារកំព្រាមួយក្នុងសង្កាត់ភ្នំពេញថ្មី រាជធានីភ្នំពេញ បានតស៊ូក្រាញននៀលនឹងជីវិតជាពិសេសក្នុងការហ្វឹកហាត់បាល់ទាត់ រហូតដល់ធ្វើឱ្យរូបគេទទួលបានឱកាសល្អៗ នៅក្នុងក្លិបបាល់ទាត់វិសាខា និងក្លាយជាសមាជិកក្រុមជម្រើសជាតិបាល់ទាត់កម្ពុជា។
ឡេង ណូរ៉ា បានបាត់បង់ឪពុកជាជនជាតិហ្គាណា និងមានម្តាយជាជនជាតិខ្មែរ ដោយកំព្រាឪពុកតាំងពីរូបគេទើបមានអាយុ៦ឆ្នាំ។ នៅអង្គការកុមារកំព្រានោះ ណូរ៉ា ទទួលបានការមើលថែ រៀនសូត្រ និងផ្តើមលេងបាល់ទាត់រហូតវិវត្តន៍ខ្លួនមកជាប់ក្រុមយុវជនក្រោយអាយុ១៥ឆ្នាំ នៅក្លិបបាល់ទាត់វិសាខា កាលពីឆ្នាំ២០១៩។
ណូរ៉ា បានរួមចំណែកជួយដល់ក្រុមឈ្នះពានមួយចំនួននៅទីនោះដូចជា ពានជើងឯកវិទ្យាល័យ, Soccer League, ការប្រកួតជម្រើសជើងឯកយុវជនរបស់សហព័ន្ធកីឡាបាល់ទាត់កម្ពុជា, ពានរង្វាន់ KMH CUP អាយុក្រោម១៨ឆ្នាំ មុនផ្ទេរទៅក្លិបព្រៃវែង នៅឆ្នាំ២០២១ និងទើបត្រឡប់មកក្រុមឈុតធំរបស់ក្លិបវិសាខា នៅឆ្នាំ២០២២នេះ ក្នុងដំណែងជាខ្សែការពារស្លាប។
យុវជនលេចធ្លោរបស់កម្ពុជា ឡេង ណូរ៉ា ដែលទើបបានជាប់ជម្រើសជាតិក្រោមអាយុ២០ឆ្នាំ បានបង្ហើបពីក្ដីស្រមៃរបស់ខ្លួន ក្នុងការជាប់ក្រុមបាល់ទាត់ជម្រើសជាតិកម្ពុជាអាយុក្រោម២៣ឆ្នាំសម្រាប់ព្រឹត្តិការណ៍កីឡាស៊ីហ្គេម លើកទី៣២ ឆ្នាំ២០២៣។
ឡេង ណូរ៉ា បានលើកឡើងដូច្នេះថា៖«វាជាក្ដីស្រមៃរបស់ខ្ញុំដ៏ធំមួយ ប្រសិនបើបានជាប់ជម្រើសជាតិបានលេងស៊ីហ្គេមនៅទឹកដីកម្ពុជាយើង។ ខ្ញុំបានប្ដេជ្ញាថា នឹងប្រឹងប្រែងលេងឲ្យបានល្អបំផុតនៅក្លិប ដើម្បីឲ្យគ្រូជម្រើសជាតិមើលឃើញ ដើម្បីអាចបានជាប់ជម្រើសជាតិក្នុងពេលនោះ»។
យុវជនដែលធ្លាប់បានជាប់ជម្រើសជាតិក្រុមធំរូបនេះបានប្ដេជ្ញាចិត្តថា រូបគេនឹងខំប្រឹងឲ្យអស់លទ្ធភាពដែលមាន ដើម្បីបានបង្ហាញទម្រង់លេងឲ្យបានល្អបំផុតក្នុងក្រុម ដើម្បីឲ្យគ្រូជម្រើសជាតិបានមើលឃើញខ្លួន។ ការខកខានស៊ីហ្គេមនៅវៀតណាមជារឿងស្ដាយបំផុតមួយសម្រាប់រូបគេ ក្នុងការក្រេបយកបទពិសោធពីព្រឹត្តិការណ៍ដ៏សំខាន់ប្រចាំតំបន់អាស៊ីអាគ្នេយ៍ ប៉ុន្តែលើកនេះស៊ីហ្គេមនៅកម្ពុជារូបគេនឹងប្រឹងប្រែង ជាមួយការប្ដេជ្ញាចិត្ត ដើម្បីសម្រេចក្ដីស្រមៃមួយនេះឲ្យខាងតែបាន។
ការបានជាប់ជម្រើសជាតិក្រោមអាយុ២០ឆ្នាំជាលើកដំបូងនេះរបស់ ណូរ៉ា គឺត្រៀមចូលរួមប្រកួតពានរង្វាន់ AFC U20 CHAMPIONSHIP 2022 ដែលនឹងធ្វើឡើងពីថ្ងៃទី១៤ ដល់ទី១៨ ខែកញ្ញា ឆ្នាំ២០២២ នៅប្រទេសតាជីគីស្ថាន។
ខណ:ក្រុមម្ចាស់ផ្ទះកម្ពុជា បានយកឈ្នះលើក្រុមទីម័រខាងកើត ដោយលទ្ធផល៤-០ ខណៈប្រកួតនេះចាប់ផ្តើមពីវេលាម៉ោង៧ល្ងាចតទៅ ខណៈលោកអាជ្ញាកណ្ដាល Abdullah Jamali ជនជាតិគុយវ៉ែត។ កីឡាករ ជូ ស៊ីនទី រកបានគ្រាប់បាល់២គ្រាប់បើកឆាកអោយក្រុមកម្ពុជា នៅនាទី៣៩ និង៤៥+២ ខណៈកីឡាករ ស រតនា រកបានគ្រាប់ទី៣នៅនាទី៧៣ និងកីឡាករ លឹម ពិសុទ្ធ រកបានគ្រាប់ចុងក្រោយនៅនាទី៨២។
សម្រាប់ការប្រកួតបន្តនឹងដល់វេនបើកឆាកពូល B វិញម្តង នៅល្ងាចថ្ងៃទី៣០ ខែមេសា ឆ្នាំ២០២៣ លើទីលានកីឡដ្ឋានព្រីនស៍ ដោយ៖
-ម៉ោង៤ល្ងាច ថៃ ប៉ះ សិង្ហបុរី
-ម៉ោង៧ល្ងាច វៀតណាម ប៉ះ ឡាវ៕