រឿងរ៉ាវដ៏កក្ដៅគគុកមួយដែលមហាជនកម្ពុជាបានផ្ដោតការចាប់អារម្មណ៍ខ្លាំង ថែមទាំងបានចោទសួរច្រើន ទៅលើករណីកសាងប្រាសាទថ្មមួយ ដែលមានឈ្មោះថាសីហនគរ នៅក្នុងខេត្តបុរីរម្យ ម្ដុំបរិវេណវត្ត ភូម៉ានហ្វា ព្រោះតែប្រាសាទនេះមានរូបរាង និង គំរូប្លង់ស្រដៀង ទៅនឹងប្រាសាទអង្គរវត្ត អច្ឆរិយៈវត្ថុ និង ជាមរតកបេតិកភណ្ឌពិភពលោករបស់កម្ពុជា។
សូមចុចអាន កម្ពុជារកឃើញព័ត៌មានសំខាន់ចំនួន ៣ ជុំវិញការកសាងប្រាសាទអង្គរវត្តនៅលើទឹកដីថៃ!
បន្ទាប់ពីមានការចាប់អារម្មណ៍ច្រើន ក្រសួងវប្បធម៌និងវិចិត្រសិល្បៈកម្ពុជាបាន សហការជាមួយនឹងអគ្គរាជទូតកម្ពុជាប្រចាំនៅប្រទេសថៃ បានធ្វើការស្រាវជ្រាវទៅលើករណីនេះ។ យោងតាមលិខិតប្រកាសពីក្រសួងវប្បធម៌ និង វិចិត្រសិល្បៈដែលបានចេញកាលពីថ្ងៃទី៧ ខែ កក្កដា ឆ្នាំ ២០២១ ភាគីថៃបានច្រានចោលថាប្រាសាទដែលកំពុងដំណើរការសាងសង់នេះ មិនបានចម្លងតាមរចនាបទប្រាសាទណាមួយនៅក្នុងព្រះរាជាណាចក្រកម្ពុជាឡើយ តែជាការសាងសងើតាមគំនូសប្លង់ដោយខ្លួនឯង និងរចនាទៅតាមស្ថាបត្យកម្មប្រាសាទមួយចំនួនដែលមាននៅក្នុងតំបន់នោះ។
ក្រោយលិខិតរបស់ក្រសួងត្រូវបានចែកចាយជាសាធារណៈកញ្ញា លីវ ជីលី Miss Grand កម្ពុជាដែលបានចេញទៅប្រកួតកញ្ញាឯកនៅប្រទេសថៃនោះបានចេញមកប្រតិកម្មចំពោះការលើកឡើងរបស់ភាគីថៃ ដោយស្រីស្អាតរូបនេះបានបង្ហាញនូវការយល់ឃើញថា មនុស្សមួយចំនួនហ៊ានក្បត់ឧត្តមគតិ ព្រោះតែភាពលោភលន់ចង់បានរបស់អ្នកដទៃ ហ៊ានទាំងបំពានសច្ចភាព បំភ្លេចចោលនូវបណ្ដាំរបស់ព្រះពុទ្ធជាម្ចាស់នៃយើង។ ស្រីស្អាតមកពីខេត្តជាប់ជាយដែនរូបនេះ ក៏បានសង្កត់ធ្ងន់ដែរថាអង្គរវត្តមានតែ១លើពិភពលោកដែលជាសម្បត្តិបេតិកភណ្ឌពិភពលោក៖
«មនុស្សជាអ្នកបង្កើត ចំណេះដឹង វប្បធម៌ ទំនៀមទម្លាប់និងស្ថាបត្យកម្មផ្សេងៗ ទៅនឹងរចនាបថនៃប្រទេសនីមួយៗទន្ទឹមនឹងនោះ ចំណេះដឹងមួយចំនួនបានធ្វើឲ្យមនុុស្ស មួយចំនួនក្បត់ឧត្ដមគតិដោយសារតែ ភាពលោភលន់ ចង់មានចង់បានដែលអ្វីមិនមែនជារបស់ខ្លួន ហ៊ានបំពាន សច្ចភាពភ្លេចនូវបណ្តាំរបស់ព្រះពុទ្ធជាម្ចាស់នៃយើង អង្គរវត្តមានតែ១លើពិភពលោកដែលជាសម្បត្តិបេតិកភណ្ឌពិភពលោក! ក្នុងសេចក្តីប្រកាសថាមិនមែន តែជាក់ស្តែងគម្រោងប្លង់នៃការសាងសង់ ជួយមើលថាដូចប៉ុន្មានភាគរយ? សូមបងប្អូនមើលហើយវិភាគឲ្យមែនទែន»។
យោងតាមរយៈផេក Universe Pageant បានបង្ហោះកាលពីថ្ងៃទី៨ ខែកក្កដា ឆ្នាំ ២០២១ កញ្ញា លីវ ជីលី Miss Grand Cambodia ឆ្នាំ២០២០ បានទទួលការកោតសរសើរយ៉ាងខ្លាំងចំពោះកញ្ញាព្រមទាំងលើកទៀតថាក្នុងចំណោមបវរកញ្ញារបស់កម្ពុជាទាំងអស់មានតែកញ្ញា លីវ ជីលី មួយរូបគត់ដែលបានចេញមកឈឺឆ្អាល និង សម្ដែងការមិនពេញចិត្តចំពោះការបកស្រាយរបស់ភាគីថៃ។
«នៅក្នុងចំណោមបវរកញ្ញាទាំងអស់របស់ប្រទេសកម្ពុជាយើង គឺមានតែកញ្ញាលីជីវលី Miss Grand Cambodia 2020 តែម្នាក់គត់ ដែលបានធ្វើការPost មិនពេញចិត្ត ក្រោយក្រសួងចេញសេចក្ដីប្រកាស ពីការបកស្រាយររបស់ថៃ រឿងកសាងប្រាសាទដូចអង្គរវត្តរបស់ខ្មែរ»។
បន្ទាប់ពីផុសរបស់ផេក Universe Pageant បង្ហោះអ្នកគាំទ្រកញ្ញា និង មជ្ឈដ្ឋានមហាជនបានចូលមកបញ្ចេញមតិកោតសរសើរចំពោះកញ្ញា លីវ ជីលី Miss Grand Cambodia 2020 ព្រមទាំងធ្វើការចែករំលែកការផ្សព្វផ្សាយខាងលើយ៉ាងផុសផុលផងដែរ៕
