តារាចម្រៀងថៃដ៏ល្បីម្នាក់បានប្រកាសសុំដកខ្លួនចេញពីផេក យើងត្រូវតែរស់ ដែលជាផេកមួយជួយទំនាក់ទំនង និងជួយដល់អ្នកជំងឺកូវីដ-១៩ ដែលខ្វះខាត ដោយបង្ហើបថាចិត្តមិនរឹងមាំ ត្រូវប្រើថ្នាំគេងលក់រាល់យប់។
ស្ថានការណ៍ការឆ្លងរីករាលដាលនៃជំងឺកូវីដ-១៩ នៅក្នុងប្រទេសថៃ កាន់តែកើនឡើងមានចំនួនអ្នកឆ្លងជំងឺនេះយ៉ាងច្រើនរាល់ថ្ងៃ ហើយមិនមានសញ្ញាណណាមួយថានឹងថយចុះក្នុងរយៈពេលដ៏ខ្លីនេះ ព្រោះអ្នកជំងឺភាគច្រើនមិនអាចរកកន្លែងឬគ្រែសម្រាប់សំរាកព្យាបាលបាន រហូតធ្វើឱ្យមិត្តសម្លាញ់ទាំងពីរមាន Diana និង Ja Nongpanee បានសហការគ្នាបង្កើតផេកហ្វេសប៊ុកមួយមានឈ្មោះថា «យើងត្រូវតែរស់» ជាផេកមួយដែលជួយទំនាក់ទំនងរកមន្ទីរពេទ្យ ឬគ្រែសម្រាប់អ្នកជំងឺដែលឆ្លងកូវីដ ឱ្យបានទៅសំរាកព្យាបាលបានទាន់ពេលវេលា។
យ៉ាងណាមិញថ្មីៗនេះ តារាចម្រៀងស្រី JA បានចេញមកបង្ហោះសំណេរនៅលើគណនី IG របស់ខ្លួនថា «មានបងប្អូនជាច្រើនបានផ្ញើករណីឈឺជំងឺកូវីដមកឱ្យខ្ញុំ Tag មកឱ្យខ្ញុំ ដើម្បីឱ្យខ្ញុំជួយរកគ្រែឱ្យបានចូលទៅសំរាកព្យាបាល សូមជំរាបត្រង់នេះថា ខ្ញុំជួយមិនបានទេ សូមទំនាក់ទំនងទៅកាន់ផេក យើងត្រូវតែរស់ ដោយផ្ទាល់ ព្រោះនៅក្នុងផេកមាន អេដមីន ចាំឆ្លើយតប និងជួយទំនាក់ទំនងឱ្យបាន ប៉ុន្តែអាចនឹងត្រូវរង់ចាំបន្តិច ព្រោះមានករណីឆ្លងច្រើនខ្លាំងណាស់»
ខ្ញុំលែងកាន់ជា អេដមីនផេក ប្រហែលជា១ខែហើយ ព្រោះទៅមិនរួចពិតមែន ចិត្តខ្ញុំមិនរឹងមាំនោះទេ ថប់ក្នុងចិត្តខ្លាំងរហូតត្រូវញ៉ាំថ្នាំគេងលក់រាល់ថ្ងៃ ទើបសុំឱ្យបង Diana ដកចេញពីអេដមីនផេក តែស្ថិតក្នុង Line Group ដដែលហើយបានឃើញថា គ្រប់គ្នាខិតខំធ្វើការណាស់ ដើម្បីជួយសម្រួលដល់បងប្អូនដែលបានឆ្លងកូវីដ គ្រប់ពេលវេលា សុំផ្ញើជាកម្លាំងចិត្តដល់អ្នកស្ម័គ្រចិត្តនិងអ្នកគ្រប់គ្នា នៅក្បែរជានិច្ច៕
ប្រភព៖ Khaosod