អតីតគ្រូបង្រៀនចូលនិវត្តន៍ លោក Matt Mauser វ័យ ៥១ គឺជាបុរសពោះម៉ាយកូន៣នាក់ បានចូលរួមប្រកួតនៅក្នុងកម្មវិធី America’s Got Talent 2021 ដោយការបង្ហាញសមត្ថភាពច្រៀងចម្រៀង ប៉ុន្តែលើសពីសមត្ថភាពរបស់លោក លោកបាននាំយករឿងរ៉ាវឈឺចាប់មកចែករំលែកនៅលើឆាកប្រកួត។
លោក Matt Mauser បានរៀបរាប់ឱ្យដឹងថាលោក បានបាត់បង់ឧត្តមភរិយាជាទីស្រលាញ់ស្មើកែវភ្នែក នៅក្នុងគ្រោះថ្នាក់ធ្លាក់ឧទ្ធម្ភាគចក្រមួយកាលពីថ្ងៃទី២៦ ខែមករា ឆ្នាំ២០២១ ដែលហេតុការណ៍នោះបានសម្លាញ់តារាបាល់បោះពិភពលោកដ៏ល្បីល្បាញរបស់អាមេរិក Kobe Bryant និងកូនស្រី ព្រោះតែភរិយារបស់លោកគឺជាគ្រូបង្វឹកក្មេងស្រីៗក្នុងក្រុមរបស់ Kobe។
បេក្ខជនកូន៣ នាក់ បានរៀបរាប់ឱ្យដឹងដែរថា លោកនិងភរិយាបានស្រលាញ់គ្នាចំនួន១៥ ឆ្នាំ លោកបានពិពណ៌នាពីចំណុចល្អរបស់ភរិយាលោកជាច្រើន ដែលក្នុងនោះចំណុចសំខាន់គឺអ្នកស្រីតែងតែគាំទ្រលោកចំពោះការស្រលាញ់តន្ត្រី លោកថែមទាំងនិយាយទៀតថាម្ដាយរបស់លោកថ្ងៃមួយបានប្រាប់លោកថា បើសិនលោកមិនរៀបការជាមួយនឹងប្រពន្ធលោកទេ លោកគឺជាបុរសដែលល្ងង់ជាទីបំផុត។
បទចម្រៀងដែលបុរសពោះម៉ាយកូន៣រូបនេះលើកយកមកបកស្រាយ មានចំណងជើងថា «Against All Odds (Take a Look at me Now)» ដែលជាសំនៀងដើមរបស់ Phil Collins ដោយនៅរវាងការបកស្រាយបទចម្រៀងរបស់លោក មានសំឡេងស្រែកហោរអបអរសាទរលោកបន្លឺឡើងជាអន្លឺៗ។ ថ្វីត្បិតតែនៅចុងបញ្ចប់នៃបទចម្រៀងលោក Matt អួលដើមកមិនអាចច្រៀងបញ្ចប់ឃ្លាបាន តែគណៈកម្មការទាំង៤រូប និងអ្នកគាំទ្របានក្រោកឈរឡើងទះដៃអបអរសាទរជូនលោកគ្រប់ៗគ្នា។
ទីបំផុត លោក Matt Mauser នៅក្នុងវគ្គ Judge Auditions ត្រូវបានគណៈកម្មការទាំង៤ រូបរបស់កម្មវិធី America’s Got Talent ផ្ដល់ «Yes» ចំនួន៤ ឱ្យលោកឡើងទៅកាន់វគ្គជាបន្តទៀត។
ទស្សនាការបង្ហាញសមត្ថភាពដែលធ្វើឱ្យអ្នកទស្សនាទប់ទឹកភ្នែកមិនជាប់ខាងក្រោមនេះ៖