យោងតាមការឲ្យដឹងពីពិធីករភេទទី៣ Moddam បានថ្លែងនៅក្នុងកម្មវិធីរបស់ខ្លួនថាខណៈនេះស្ថាបនិក Miss Grand លោក Nawat Itsaragrisil ដែលបានឆ្លងជំងឺកូវីដ ត្រូវបានគ្រូពេទ្យបញ្ជូនចូល ICU ដោយសារតែមេរោគវាយលុកចូលក្នុងសួត ៥០ភាគរយហើយ។
កាលពីថ្ងៃទី ៩ ខែកក្កដា ម្សិលមិញនេះ សារព័ត៌មានថៃបានធ្វើសេចក្ដីរាយការណ៍ពាក់ព័ន្ធនឹងលោក Nawat អ្នកគ្រប់គ្រងនិងជាស្ថាបនិកការប្រកួតបវរកញ្ញា Miss Grand International ថាបានឆ្លងជំងឺកូវីដ-១៩ រហូតដល់ថ្នាក់ប្រើអុកស៊ីសសែនជួយដង្ហើម ប៉ុន្តែក្នុងនោះក៏មានអ្នកសង្ស័យឆ្ងល់ថាតើលោក ឆ្លងពី Kohtee Aramboy តារាកំប្លែងល្បីពីភាពយន្តខ្មោចត្រឡោកបែក (ឆ្លងកូវីដ ទាំងដែលបានចាក់ Astrazeneca ដូសទីមួយរួចរាល់ហើយ) ឬ ក៏ឆ្លងពីវេទិកាប្រកួតបវរកញ្ញា។
មានដំណឹងចចាមអារាមលេចឮថា នៅក្នុងការរៀបចំកម្មវិធី Miss Grand សាមុតសាខន នៅ Milin Theather RCA មិនបានប្រើប្រាស់ម៉ាស់ រហូតចុងក្រោយរកឃើញថាមានបវរកញ្ញា និងអ្នករៀបចំបានឆ្លងកូវីដជាង២០នាក់ ខណៈមានអ្នកប៉ះពាល់ផ្ទាល់និងប្រយោលជាង១០០នាក់ទៀត។
ថ្មីៗនេះ ពិធីករ Kachapa Toncharoen បានបង្ហើបឱ្យដឹងនៅក្នុងកម្មវិធីទូរទស្សន៍មួយដែលខ្លួនជាពិធីករថា លោកបានព្យាយាមទំនាក់ទំនងទៅកាន់លោក Nawat ដើម្បីសាកសួរនិងចង់ឱ្យលើបំភ្លឺពាក់ព័ន្ធនឹងករណីដែលថាមានអ្នកចូលរួមប្រកួតវេទិកា Miss Grand សាមុតសាខន ចំនួន១៣ នាក់ហើយ និងអ្នករៀបចំកម្មវិធី៩នាក់ទៀត បានឆ្លងជំងឺកូវីដ-១៩ តែបានទទួលចម្លើយមកវិញថាពេលនេះ អាការៈរបស់ស្ថាបនិកវេទិកាស្រីស្អាតរូបនេះកំពុងធ្ងន់ធ្ងន់ ហើយត្រូវបានបញ្ជូនចូលបន្ទប់ ICU រួចរាល់ហើយ ដោយសារតែសាច់សួត៥០ ភាគរយត្រូវបានមេរោគកូវីដ-១៩ វាយលុក ការដកដង្ហើមនៅប្រក្រតី ប៉ុន្តែនៅទាបជាងការរំពឺងទុក។
លោក Nawat Itsaragrisil គឺជាស្ថាបនិកដែលបានផ្ដួចផ្ដើមបង្កើតកម្មវិធីប្រកួត Miss Grand International ដែលអនុញ្ញាតឱ្យប្រទេសនានាដែលទិញសិទ្ធិបញ្ញារបស់លោក អាចរៀបចំការប្រកួតនៅតាមប្រទេសរៀងខ្លួន បន្ទាប់មកស្វែងរកបេក្ខនារីចំណាត់ថ្នាក់លេខ១ ដើម្បីបញ្ជូនទៅប្រកួតនៅក្នុងប្រទេសថៃដែលជាម្ចាស់ផ្ទះរៀបចំការប្រកួត៕