សិល្បៈជាតិ៖ កំពូលអ្នកច្នៃម៉ូដ និងគ្រូដើរម៉ូដដ៏ល្បីឈ្មោះ អូលីវ៉ា គង់ ទើបតែបញ្ចប់កម្មវិធី Fashion Show ដ៏ធំរបស់ខ្លួន ប្រកបដោយជោគជ័យកាលពីពេលថ្មីៗនេះ។ ប៉ុន្តែភារកិច្ចលើកស្ទួយវិស័យដើរម៉ូដនិងច្នៃម៉ូដរបស់លោកមិនទាន់បញ្ចប់នៅឡើយទេ ព្រោះបុរសដ៏មានឥទ្ធិពលក្នុងវិស័យ Fashion រូបនេះកំពុងតែត្រៀមខ្លួន ដើម្បីចេញទៅបង្ហាញស្នាដៃខ្លួននៅលើឆាកអន្តរជាតិជាបន្តបន្ទាប់ទៀត។
អ្នកគាំទ្រវិស័យបង្ហាញម៉ូដ ដើរម៉ូដ និងច្នៃម៉ូដ នៅមិនទាន់ភ្លេចនៅឡើយពីភាពអស្ចារ្យនៃកម្មវិធីដើរបង្ហាញម៉ូដបែបសហសម័យផ្សារភ្ជាប់ជាមួយនឹងវប្បធម៌ អរិយធម៌ខ្មែរជាង១០០ឈុត របស់លោក អូលីវ៉ា គង់ ដោយសិល្បកររៀមច្បងជាច្រើនដួង និងហ្វេនៗ បានកោតសរសើរយ៉ាងស្មោះចំពោះគំនិតច្នៃប្រឌិតរបស់លោក។
យ៉ាងណាមិញជាមួយនឹងស្នាដៃដ៏លេចធ្លោរបស់លោក ពិតណាស់មិនត្រឹមតែធ្វើឱ្យកក្រើកនៅក្នុងស្រុកខ្មែរនោះឡើយ ព្រោះលោក អូលីវ៉ា គង់ កំពុងតែត្រៀមខ្លួននាំយកនូវសិល្បៈ វប្បធម៌ និងអរិយធម៌ ក្រោមទឹកដៃច្នៃប្រឌិតរបស់ខ្លួនទៅបង្ហាញនៅលើឆាកអន្តរជាតិជាបន្តបន្ទាប់ទៀត។
ក្នុងនោះប្រទេស ២ដែលសាមីខ្លួនបានបញ្ជាក់យ៉ាងច្បាស់ពីកាលបរិច្ឆេទទៅចូលរួម គឺនៅថ្ងៃទី៥ ខែសីហា ក្នុងកម្មវិធី International Junior Fashion Week នៅសារមន្ទីរក្រុងហាណូយ លោកនឹងនាំ Collection ចំនួន ២០ឈុត ជាមួយនឹង Concept ម៉ាក់-កូនដើរជាគូនឹងគ្នា។ សម្រាប់ Collection ទាំង២០ឈុតនេះដែរ លោកអូលីវ៉ា បានទម្លាយថាលោកបានស្នើទៅអ្នករៀបចំកម្មវិធីយកម៉ូដែលខ្មែរ១០រូបនិងវៀតណាម១០រូប។
ចំណែកឯនៅទីក្រុង Milan ប្រទេសអ៊ីតាលីវិញក្នុងកម្មវិធី Milan Fashion Week លោកក៏បានឱ្យដឹងដែរថាលោកត្រៀមឈុតចំនួន១៦ ចំណែកកាលបរិច្ឆេទនៃកម្មវិធី គឺនឹងដើរបង្ហាញនៅថ្ងៃទី២៤ ខែកញ្ញា ឆ្នាំ២០២៣ ខាងមុខនេះ។ ចំពោះកម្មវិធី Miland Fashion Week គេរៀបចំឡើងជារៀងរាល់ឆ្នាំ ដោយ ១ឆ្នាំ ធ្វើឡើងពីរដងដោយលើកទីមួយធ្វើឡើងរវាងខែ មករា-កុម្ភៈ និងលើកទីពីររវាងខែ កញ្ញា-តុលា។
កម្មវិធីដ៏ធំនេះនឹងមានការចូលរួមពី Designer ល្បីៗមកពីបណ្ដាប្រទេសក្នុងតំបន់អាស៊ានជាច្រើនទៀតដូចជា ប្រទេសថៃ ម៉ាឡេស៊ី ហ្វីលីពីន និងប្រទេសកម្ពុជាជាដើម។
ការសម្រេចបាននូវសមិទ្ធិផលដ៏ធំធេងនេះ គឺជាសក្ខីភាពមួយបញ្ជាក់យ៉ាងច្បាស់ថា កូនខ្មែរមានសមត្ថភាពមិនចាញ់បរទេសនោះឡើយ សំខាន់ប្រសិនបើមានកំហុសឆ្គងណាមួយកើតឡើងនោះ យើងគួរតែត្រូវបានណែនាំនិងកែតម្រូវ ហើយលុបបំបាត់វប្បធម៌ បន្ទោសបង្អាប់ ជាន់ពន្លិច តែគួរលើកទឹកចិត្ត លើកសរសើរចំពោះអ្នកដែលខិតខំកសាងប្រយោជន៍រួមដើម្បីប្រជាជាតិខ្មែរទាំងមូល៕
