បើនិយាយដល់តួឯកស្រីកូរ៉េប្រាកដណាស់ Song Hye Kyo ឬ ទស្សនិកជនខ្មែរនិយមហៅថា ហាន់ ជីអ៊ុន ប្រាកដជាស្ថិតនៅលំដាប់ជួរមុខ ថ្វីត្បិតតែបច្ចុប្បន្នមានវ័យ៤០ឆ្នាំក្ដី តែនារីដែលមានសមត្ថភាពសម្ដែងឆ្នើមរូបនេះនៅតែមានរូបសម្រស់ស្អាត និងក្មេងដដែល។ និយាយដល់រូបសម្បត្តិមិនអាចមិននិយាយពីស្នាដៃសម្ដែងរឿងល្បីៗជាច្រើនរបស់ Song Hye Kyo បានឡើយ ព្រោះសុទ្ធសឹងជារឿងល្បីកម្រិតអន្តរជាតិ ដូចជា «Autumn in my heart និទាឃរដូវក្នុងបេះដូង» «Full House បំណុលផ្ទះជំពាក់ស្នេហ៍» «That winter the wind blow» «World Winthin» «Descendants of the Sun ម្ចាស់ព្រះអាទិត្យ» និងរឿង «Encounter» ។ល។
ប្រាកដណាស់និយាយពីការងារ Song Hye Kyo សម្ដែងរឿងណារឿងនោះប្រាកដជាល្បីនិងមានការពេញនិយមគ្រប់រឿង ប៉ុន្តែសម្រាប់ស្នេហាវិញស្រីស្អាតរូបនេះហាក់អភ័ព្វ ព្រោះមិនថាជួបស្នេហាជាមួយនឹងបុរសរូបណារមែងតែបែកបាក់គ្នានៅទីបំផុត។
ថ្ងៃនេះត្រយងសូមរំលឹកប្រវត្តិស្នេហ៍របស់ Song Hye Kyo ជាមួយនឹងបុរសសង្ហា ៣រូបដែលជាតួឯកប្រុសល្បីល្បាញប្រចាំប្រទេសកូរ៉េ ប៉ុន្តែស្នេហានេះនៅសល់ត្រឹមការចងចាំមួយសម្រាប់អ្នកគាំទ្រប៉ុណ្ណោះ។
១. Lee Byung Hun
ចាប់ផ្ដើមដំបូងដោយតារាសម្ដែង A-List លោក Lee Byung Hun តារាសម្ដែងដែលធ្លាប់សម្ដែងក្នុងរឿងហូលីវូដ កាលពីឆ្នាំ២០០៣ Song Hye Kyo និង Lee Byung Hun បានសម្ដែងជាតួឯកប្រុសស្រីក្នុងរឿង «All In» ដែលក្រោយៗមកទំនាក់ទំនងអ្នកទាំងពីរបានក្លាយជាស្នេហា តាមរយៈការចេញទៅប្រូម៉ូតរឿងនេះនៅកោះតៃវ៉ាន់ ដោយអ្នកទាំងគូបានប្ដូរចិញ្ចៀនបញ្ចាំចិត្ត (ព័ត៌មានខ្លះថាជាចិញ្ចៀនភ្ជាប់ពាក្យ) ថែមទាំងសាមីខ្លួនខាងប្រុសថែមទាំងប្រកាសទៀតថាចង់រៀបការជាមួយនឹង Son Hye Kyo ឱ្យលឿនជាទីបំផុតបើរៀបចំការងារបានស្រួលបួល អ្នកទាំងពីរទទួលការងារថតពាណិជ្ជកម្មរួមគ្នា មានរូបភាពគ្រួសារទៅដើរកម្សាន្តជុំគ្នា អាចនិយាយបានថាជាពេលវេលាផ្អែមល្ហែមជាទីបំផុត តែចុងក្រោយក្នុងពេលវេលាបន្តមកទៀត អ្នកទាំងពីរក៏បានបែកគ្នា ដោយហេតុផល ម្នាក់ៗមិនមានពេលវេលាផ្ដល់ឱ្យគ្នាទៅវិញទៅមក។
២. Hyun Bin
បន្ទាប់ពីបែកបាក់គ្នាជាមួយនឹង Lee Byung Hyun តារាសម្ដែងរូបនេះបានរក្សាទុកបេះដូងឱ្យនៅទំនេរស្អាត រហូតមានព័ត៌មានលេចឮថាតារារូបនេះរាងចាលនឹងរឿងស្នេហា លុះដល់ឆ្នាំ២០០៨ Song Hye Kyo បានរួមសម្ដែងជាមួយនឹង Hyun Bin ក្នុងរឿងភាគ «Worlds Within» ស្រាប់តែស្នេហាបានកើតម្ដងទៀតក្នុងបេះដូងរបស់ Song Hye Kyo ព្រោះក្រោយថតរឿងនេះចប់មិនយូរ អ្នកទាំងពីរក៏បានចាប់ផ្ដើមទាក់ទងគ្នា ប៉ុន្តែនៅឆ្នាំ២០១១ ទំនាក់ទំនងបានបញ្ចប់ ហើយរឿងនេះបានលាតត្រដាងត្រឹមតែ១ថ្ងៃមុន Hyun Bin ចូលបំរើកាតព្វកិច្ចយោធា ដោយមូលហេតុព្រោះតែតារាការងារដ៏មមាញឹកទាំងថតភាពយន្ត ទាំងថតរឿងភាគ ទើបមិនសូវបានជួបគ្នាធ្វើឱ្យសម្រេចចិត្តបញ្ចប់គ្នាត្រឹមនេះតែម្ដង។
៣. Song Joong Ki
បើសង្កេតឃើញថាតារាស្រីល្បីឈ្មោះរបស់កូរ៉េ ដូចជារាងចាលនឹងស្នេហាផ្ដើមឡើងក្នុងពេលថតរឿងហើយ ព្រោះទោះជា Song Hye Kyo នៅសម្ដែងរឿងដូចមុន ប៉ុន្តែមិនមានព័ត៌មានស្នេហាក្នុងពេលសម្ដែងលេចឮទៀតនោះទេ រហូតដល់ឆ្នាំ២០១៦ ពេលបានរួមសម្ដែងក្នុងរឿង «Descendants of the Sun ម្ចាស់ព្រះអាទិត្យ» ជាមួយនឹងតារាសម្ដែងអាយុប្អូន Song Joong Ki បានធ្វើឱ្យកំណើតស្នេហ៍ក្នុងពេលថត ចាប់ផ្ដើមលេចចេញជារូបរាងម្ដងទៀត។ យោងតាមបណ្ដាញសារព័ត៌មានបានរាយការណ៍ថា មុននឹងប្រកាសសេពគប់គ្នា Song Hye Kyo មិនសប្បាយចិត្តប៉ុន្មាននោះទេដែលខ្លួនមានស្នេហាជាមួយនឹងបុរសក្នុងរង្វង់សិល្បៈ តែភាគីខាងប្រុសម្ចាស់រហស្សនាម «ស្វាមីតំណាងជាតិ» មិនបានបោះបង់ចោលការព្យាយាមក្នុងការសាងសម្ព័ន្ធភាព រហូតទីបំផុត Song Hye Kyo ក៏ព្រមបើកចិត្ត តែគួរឱ្យស្ដាយ ព្រោះគូស្នេហាដែលអ្នកគាំទ្ររឿង «ម្ចាស់ព្រះអាទិត្យ» ចូលរួមអបអរសាទរទាំងជាតិ និង អន្តរជាតិ ដោយអ្នកទាំងពីរបានរៀបអាពាហ៍ពិពាហ៍នៅថ្ងៃទី៣១ ខែ តុលា ឆ្នាំ ២០១៧ តែស្ថិតក្នុងជិវិតគូបានត្រឹម ២០ ខែ អ្នកទាំងពីរបានប្រកាសលែងលះគ្នានៅថ្ងៃទី ២៩ ខែមិថុនា ឆ្នាំ២០១៩៕
បច្ចុប្បន្ន Song Hye Kyo មានវ័យ៤០ ឆ្នាំ ថ្មីៗនេះតារាស្រីដ៏ឆ្នើមរបស់កូរ៉េខាងត្បូងរូបនេះកំពុងថតរឿងភាគថ្មី «Now We are breaking Up» ជាមួយនឹងតួឯកប្រុសវ័យក្មេង Jang Ki Young ៕
