សិល្បៈជាតិ៖ ទិវាលោកឪពុកកាន់តែខិតជិតមកដល់ ជា សុជាតិ តារាចម្រៀងពីក្រុម «ក្មេងខ្មែរ» បានបញ្ចេញបទចម្រៀងចាក់ដោតអារម្មណ៍កូនៗដែលកំព្រាមេបា «ឱកាសទី២» រហូតធ្វើឱ្យអ្នកមានសាច់រឿងស្រដៀងគ្នាស្រក់ទឹកភ្នែកដោយមិនដឹងខ្លួន។
សូមអាន៖ អាណិតណាស់! ជា សុជាតិ (ក្មេងខ្មែរ) កំព្រាឪពុកហើយពេលនេះបាត់បង់អ្នកម្ដាយថែមទៀត…
«មិនទាន់ទាំងបានសងគុណពុកផង ពុកលាចាកលោក...» នេះគឺឃ្លាខ្លីដែលដកស្រង់ចេញពីបទ «ឱកាសទី២» របស់តារាចម្រៀង ជា សុជាតិ។ បទនេះបានបញ្ចេញឱ្យអ្នកគាំទ្របានស្ដាប់ហើយនៅ App Pleng កាលពីថ្ងៃទី១១ ខែមិថុនា ឆ្នាំ២០២៣ ម្សិលមិញ។
បន្ទាប់ពីបទចម្រៀងដ៏ពីរោះ និង មានអត្ថន័យរៀបរាប់ពីការឈឺចាប់របស់កូនម្នាក់ដែលមិនមានឱកាសបានសងគុណចំពោះអ្នកមានគុណ ហើយចង់សុំឱ្យមានឱកាសទីពីរបានសងគុណ បានមើលថែទាំ បានតបស្នងរាល់ការលះបង់របស់អ្នកមានគុណមកលើខ្លួន បានបញ្ចេញឱ្យអ្នកគាំទ្របានស្ដាប់ភ្លាម សន្ទុះគាំទ្រមានចំនួនច្រើនគួរឱ្យកត់សម្គាល់។
បទចម្រៀងថ្មីអបអរទិវាលោកឪពុកនាពេលខាងមុខរបស់ ជា សុជាតិ ត្រូវបានអ្នកគាំទ្របានបញ្ចេញចំណាប់អារម្មណ៍ពេញចិត្តខ្លាំងទាំងការប្រើប្រាស់ភាសាក្នុងបទចម្រៀង និងការប្រើប្រាស់សំឡេងច្រៀងដែលស្ដែងចេញពីអារម្មណ៍សោកសៅ សោកស្ដាយ និងដង្ហើយអង្វរសុំឱកាសទី២ របស់ ជា សុជាតិ នៅក្នុងបទចម្រៀងថ្មីនេះ។
មែនទែនទៅ សុជាតិ មិនត្រឹមតែកំព្រាឪពុកនោះឡើយ ព្រោះបើគេចាំមិនភ្លេចនោះទេកាលពីអំឡុងឆ្នាំ២០២២ នាពាក់កណ្ដាលឆ្នាំ លោកបានប្រកាសដំណឹងមរណទុក្ខបានបាត់បង់ អ្នកម្ដាយ ដោយសារតែជំងឺ។
សូមជំរាបជូនថានៅឆ្នាំ២០២៣ នេះ ទិវាលោកឪពុកអន្តរជាតិ គឺត្រូវនឹងថ្ងៃអាទិត្យទី១៨ ខែមិថុនា ខាងមុខនេះ ពោលគឺនៅសល់ត្រឹមតែ ៦ថ្ងៃទៀតប៉ុណ្ណោះ៕