ប្រទេសកូរ៉េខាងជើង បានចុះឈ្មោះត្រៀមបញ្ជូនអត្តពលិកចូលរួមប្រកួតព្រឹត្តិការណ៍កីឡាអាស៊ីលើកទី១៩ Asian Games 2022 លើកទៅធ្វើក្នុងខែកញ្ញា ឆ្នាំ២០២៣ ខាងមុខនៅទីក្រុង Hangzhou របស់ប្រទេសចិន ដែលមាន៤០ប្រភេទកីឡា។
បើយោងតាមការបញ្ជាក់ពីគណៈកម្មាធិការរៀបចំការប្រកួត លើកឡើងថាសមាជិកនៃគណៈកម្មាធិការកីឡាអូឡាំពិកប្រចាំទ្វីបអាស៊ីទាំង៤៥ប្រទេសបានចុះឈ្មោះចូលរួមទាំងអស់ បូកបញ្ជូលទាំងប្រទេសកូរ៉េខាងជើង ផងដែរ។
សម្រាប់កូរ៉េខាងជើង បានចុះឈ្មោះហត្ថពលិក គ្រូបង្វឹក និងប្រតិភូ ប្រមាណ២០០នាក់ ចូលរួមក្នុងព្រឹត្តិការណ៍កីឡាអាស៊ី នេះបើទោះជារដ្ឋបាលក្រុងព្យុងយ៉ាង នៅបន្តរិតត្បិតវិធានការជំងឺកូវីដ-១៩ ក្តី។ ៣ឆ្នាំមកហើយដែលកូរ៉េខាងជើង មិនបញ្ជូនអត្តពលិកគ្រប់ប្រភេទកីឡារបស់ខ្លួនទៅប្រកួតលើឆាកអន្តរជាតិ ដែលចាត់ទុកថាជាផ្នែកមួយនៃការបង្ការជំងឺឆ្លងកូវីដ-១៩។
កាលពីខែឧសភា កន្លងទៅ កូរ៉េខាងជើងបានបញ្ជូនអត្តពលិកការ៉ាត់តេដូ របស់ខ្លួនទៅចូលរួមប្រកួតអន្តរជាតិជាលើកដំបូង ក្នុងការប្រកួតជើងឯកការ៉ាត់តេដូអាស៊ីបូព៌ា នៅទីក្រុង Taizhou ខេត្ត Zhejiang ក្នុងប្រទេសចិន ផងដែរ។
លោក Zhou Jinqiang រដ្ឋមន្ត្រីក្រសួងកីឡារបស់ប្រទេសចិន បានប្រាប់អ្នកសារព័ត៌មាននៅរដ្ឋធានីប៉េកាំង ពីព្រឹត្តិការណ៍កីឡាប្រចាំទ្វីបដែលលើកពេលអស់រយៈពេល៣ឆ្នាំមកនេះ ដោយសារតែការរាតត្បាតនៃជំងឺកូវីដ-១៩ ថា៖«នេះជាកម្មវិធីប្រកួតដ៏ធំ និងស្តង់ដារអន្តរជាតិខ្ពស់មួយ ដែលរៀបចំនៅប្រទេសចិន ក្រោយមហាសន្និបាតរបស់បក្សដែលធ្វើឡើងនៅខែតុលា ឆ្នាំ២០២២ កន្លងទៅ»។
ប្រភពបន្តថាគ្រប់កីឡដ្ឋាន និងទីលានប្រកួតសុទ្ធតែត្រៀមខ្លួនរួចរាល់ ដើម្បីស្វាគមន៍បណ្តាអត្តពលិកមកពីគ្រប់ច្រកល្ហកក្នុងទ្វីបអាស៊ី ទៅកាន់ទីក្រុង Hangzhou ស្របពេលដែលចិន ត្រៀមអត្តពលិកប្រមាណ៩០០នាក់ ដើម្បីចូលរួមប្រជែងមេដាយ។
មេដាយមាសចំនួន៤៨២គ្រឿង ក្នុងចំណោម៤០ប្រភេទកីឡានឹងប្រគល់ជូនអត្តពលិកជ័យលាភីនៅក្នុងព្រឹត្តិការណ៍កីឡា Asian Games នៅ Hangzhou ឆ្នាំនេះ។ ការប្រកួតធ្វើឡើងពីថ្ងៃទី២៣ខែកញ្ញា ដល់ថ្ងៃទី៨ ខែតុលា ឆ្នាំ២០២៣ ខាងមុខ។
កីឡាអាស៊ី Asian Games រៀបចំលើកដំបូងនៅឆ្នាំ១៩៥១ នៅទីក្រុង New Delhi ប្រទេសឥណ្ឌា ដោយបង្កើតឡើងរាល់៤ឆ្នាំម្តង ខណៈជាង៧០ឆ្នាំមកនេះអត្តពលិករបស់កូរ៉េខាងជើង ធ្លាប់ដណ្តើមបានមេដាយរហូតដល់៤៣៣គ្រឿង ក្នុងនោះមេដាយមាស១១០ គ្រឿង មេដាយប្រាក់ ១៤៤គ្រឿង និងមេដាយសំរឹទ្ធិ១៧៩គ្រឿង៕
