សិល្បៈជាតិ៖ ថ្មីៗនេះមានការប្រកាសជាហូរហែពីការផលិតរឿងប្រភេទ BL និង GL ដាក់បញ្ចាំងនៅលើកញ្ចក់ទូរទស្សន៍ និងរោងភាពយន្ត។ តើរឿងប្រភេទត្រូវបានក្រសួងអនុញ្ញាតឱ្យផលិតហើយ ឬយ៉ាងណា?
ងាកមកដឹងបន្តិចថា តើប្រភេទភាពយន្ត BL និង GL គឺជាភាពយន្តអ្វី? សម្រាប់ភាពយន្តបែប BL គឺត្រូវបានគេសំដៅទៅដល់ភាពយន្តបែបរ៉ូមែនទិក ស្នេហា ការតស៊ូក្នុងជីវិត ដំណើរជីវិតបែបស្នេហាភេទដូចគ្នារវាង បុរស និងបុរស។ មហាជនជាប្រិយមិត្តមួយចំនួនធ្លាប់បានទស្សនាប្រភេទរឿងនេះតាមរយៈការផលិតរបស់ប្រទេសនានាដូចជា ថៃ ហ្វីលីពីន ចិន អាមេរិក និងថ្មីៗឈានដល់ប្រទេសកូរ៉េ។ ចំណែកឯវណ្ណកម្ម BL នៅក្នុងស្រុកកន្លងមកនេះ គេឃើញមានការផលិតដូចជារឿង «សួស្ដីអ្នកជិតខាង» រឿងខ្លី «ព្រោះគេគ្មានបេះដូង» និងរឿងមួយចំនួនទៀតដែលមានបញ្ចាំងក្នុង App មិនបង្ហាញជាសាធារណៈឡើយ។
ចំពោះភាពយន្ត GL វិញក៏មិនខុសគ្នានោះដែរ ប៉ុន្តែជាដំណើររឿងជីវិតនិងស្នេហារវាងស្រីនិងស្រី។ កន្លងមកគេធ្លាប់ឃើញស្នាដៃរបស់លោកស្រី ពាន់ ភួងបុប្ផា ធ្លាប់បានផលិតដូចជារឿង «ខ្ញុំជាអ្នកណា» និងរឿង «រសជាតិអ្នកមាន»។ ដំណើររឿងនីមួយៗ សុទ្ធតែបង្ហាញពីហេតុនិងផល មិនខុសអីពីស្នេហាមនុស្សប្រុសនិងស្រីទូទៅឡើយ។
តើក្រសួងវប្បធម៌ និងវិចិត្រសិល្បៈអនុញ្ញាតឱ្យភាពយន្តបែបនេះមានផលិត ឬបញ្ចាំងក្នុងស្រុកហើយឬយ៉ាងណា នៅពេលដែលពីមុនមានការរឹតបន្តឹងខ្លាំង? សម្រាប់បញ្ហានេះ លោក ប៉ុក បូរក្ស ប្រធាននាយកដ្ឋានសិល្ប:ភាពយន្ត និងផ្សព្វផ្សាយវប្បធម៌ បានឆ្លើយថា «ការស្រឡាញ់ភេទដូចគ្នាដ្បិតមិនមែនជាការលើកទឹកចិត្ត នៅក្នុងសង្គមក៏ប៉ុន្តែយើងក៏មានច្បាប់ណាហាមឃាត់ដែរ អ៊ីចឹងជាទូទៅផលិតករដែលស្នើសុំផលិតសម្រាប់ការដាក់បញ្ចាំងតាមរោងភាពយន្តក្ដីឬក៏ តាម App មួយចំនួនដែលមាននៅក្នុងប្រទេសយើងដែលស្ថិតក្រោមការគ្រប់គ្រង មានន័យថាគឺយើងតែងតែផ្ដល់នូវមតិយោបល់ជូនពួកគាត់ ព្រោះយើងអត់ចង់លើកទឹកចិត្តទេ ប៉ុន្តែដូចខ្ញុំជម្រាបអ៊ីចឹង គឺការមិនលើកទឹកចិត្តក៏មិនមែនមានន័យថា ហាមឃាត់ដែរ ព្រោះវាអត់មានច្បាប់ណាដែលចង្អុលហាមឃាត់លើបញ្ហាហ្នឹង អ៊ីចឹងហើយបានជាយើងមានការអនុញ្ញាតឲ្យផលិតដែលដាក់បញ្ចាំងតាមរោងភាពយន្តកន្លងមក»។
យ៉ាងណាមិញ កន្លងមកគេឃើញមានការបញ្ចាំងរឿងបែបនេះក្នុងរោងភាយន្ត និងមានខ្លះដាក់ទស្សនាតែក្នុង App តើរឿងទាំងនេះបានឆ្លងកាត់ការត្រួពិនិត្យពីក្រសួងដែរឬទេ? សំនួរនេះលោក ប៉ុក បូរក្ស លើកឡើងថា «ជាទូទៅការផលិតកុនដាក់នៅក្នុងរោង គឺយើងបានកំណត់អាយុអ្នកទស្សនា អាយុអ្នកទស្សនាដោយការធ្វើ Rating បើរូបភាពដែលវាប៉ះពាល់ខ្លាំង យើងកម្រិតអ្នកមើលទៅចាប់ពី១៨ឆ្នាំឡើងទៅអីចឹង គឺយើងមាន Rating ដែលជាគោលការណ៍កំណត់របស់ក្រសួង។ បើរឿងប៉ះពាល់តិចតួចយើងកំណត់ត្រឹម ១៥ ឆ្នាំ ឬក៏មិនប៉ះពាល់ទេ យើងឱ្យទស្សនាទូទៅ។ អីចឹង ! នេះក៏ជាការការពារមួយសម្រាប់ដល់ផលប៉ះពាល់ដល់កុមាររបស់យើងដែរ»។
លោកបន្តថា «ការផលិតដាក់តាម App ពីមុនជារបៀបរឿងខ្លីអីគឺគាត់ធ្វើអត់បានឆ្លងទេ ប៉ុន្តែឥឡូវនេះយើងតម្រូវឲ្យគាត់យកមកឆ្លង ហើយជាទូទៅការផលិតដាក់តាម App ឥឡូវខ្ញុំបានន័យថា ពេលបច្ចុប្បន្ន ក្រោយមានប្រតិកម្មហើយ គឺយើង កំណត់ថា រាល់រឿងដែលមាន Rating ខ្ពស់ មានន័យថា ១៨+ គឺមិនអាចដាក់តាម App បានទេ ដាក់តាម App បានលុះត្រាតែ App គាត់នឹងកម្រិតអាយុអ្នកមើល តែបើ App គាត់អត់មានកម្រិតអាយុទេ មានន័យថាអ្នកណាក៏ចូលមើលបាន បង់លុយចូល អ៊ីចឹង យើងមិនឱ្យរឿងដែលមាន Raiting ខ្ពស់ដាក់ក្នុង App ទេ ពីព្រោះមិនអាចគ្រប់គ្រងអ្នកមើលបាន»។
ដោយឡែក បន្ទាប់ពីឃើញមានការប្រកាសប្រភេទរឿង BL និង GL ជាហូរហែពីផលិតកម្មនឹងត្រៀមបញ្ចាំងនៅលើទូរទស្សន៍ តើកម្រិតត្រឹមណាក្រសួងអនុញ្ញាតឱ្យផលិត? លោក ប៉ុក បូរក្ស និយាយថា «និយាយពីថា តើកម្រិតណា ខ្ញុំមិនអាចផ្តល់គោលការណ៍ទេ ព្រោះការ Rating នៅលើរឿង ការធ្វើនៅលើរឿង ការពិនិត្យទៅលើរឿង គឺយើងមើលនៅលើ កម្រិតរឿងនោះ។ ខ្ញុំមិនអាចនិយាយបានដូចគណិតវិទ្យា ១+១ ស្មើ ២ ទេ។ ឧទាហរណ៍និយាយពីការលេចលើលេចក្រោម ឬក៏ការបញ្ចេញបំបៅកូនដោយទឹកដោះ រូបភាពហ្នឹងគឺបញ្ចេញ សុដន់ដូចគ្នា ក៏ប៉ុន្តែមានន័យផ្សេង អ៊ីចឹងហើយបើនិយាយពីការកម្រិតថាយ៉ាងម៉េច? គឺយើងមិនអាចឆ្លើយថាអត់កម្រិតម៉េចបានទេ ក៏ប៉ុន្តែវាស៊ីសងលើការមើល ថាតើការផ្តល់រូបភាព ការដាក់រូបភាពទាំងនោះនៅលើសាច់រឿងហ្នឹង តើវាបានជះឥទ្ធិពលឬក៏គេផ្តល់គេហៅថា ចំណង់ឬក៏អារម្មណ៍ផ្លូវភេទយ៉ាងដូចម្ដេចដែរ? អ៊ីចឹងអ្នកមើលគឺគាត់មើលលើចំណុចអស់ហ្នឹង បើគាត់ធ្វើការពិនិត្យលើ Rating »។
ជាចុងក្រោយ តើរឿង BL និង GL ក្រសួងមានការព្រួយបារម្ភចំពោះអ្នកទស្សនាក្រោមអាយុពេញវ័យទេ ដោយសារតែរឿងទាំងអស់នេះអាចនឹងដឹកនាំពួកគេឱ្យធ្វើតាមបានដែរ? ប្រធាននាយកដ្ឋានសិល្ប:ភាពយន្តរូបនេះលើកឡើងថា «ដោយសារមានការព្រួយបារម្ភពីផលប៉ះពាល់ហ្នឹងហើយ បានយើងបង្កើតជាកម្រិត Rating សម្រាប់អ្នកមើល រឿងណាដែលមនុស្សពេញវ័យមិនបាន រឿងណាត្រឹម១៥ឆ្នាំមើលបាន រឿងណាសម្រាប់មនុស្សទូទៅ។ អ៊ីចឹង! គោលការណ៍នេះយើងបានកំណត់ច្បាស់នៅក្នុងរោងកុន ហើយការធ្វើតាមApp ក៏យើងមិនអនុញ្ញាតឲ្យរឿងដែលមាន Rating ខ្ពស់នឹងដាក់ផ្សព្វផ្សាយដែរ»។