ក្រសួងសន្តិសុខសាធារណៈបាននិយាយកាលពីថ្ងៃសុក្រថា ជនសង្ស័យជាង ៥០នាក់ ដែលជាប់ពាក់ព័ន្ធក្នុងការវាយប្រហារដ៏សាហាវទៅលើការិយាល័យគណៈកម្មាធិការប្រជាជនចំនួន២ នៅក្នុងខេត្ត Dak Lak ត្រូវបានចាប់ខ្លួន រួមទាំងចាប់បានមេខ្លោងភាគច្រើនផងដែរ។ នេះបើយោងតាមការចេញផ្សាយដោយសារព័ត៌មាន VN Express កាលពីថ្ងៃ សុក្រ ទី១៦ ខែមិថុនា ឆ្នាំ២០២៣។
តំណាងក្រសួងសន្តិសុខសាធារណៈបាននិយាយថា ជនសង្ស័យភាគច្រើនជាយុវជននៃជនជាតិភាគតិចនៅក្នុងខេត្ត Central Highlands។ អ្នកតំណាងរូបនេះបានបន្ថែមថា ពួកគេត្រូវបានញុះញង់ និង បង្ខិតបង្ខំឲ្យធ្វើអ្វីដែលពួកគេបានធ្វើកាលពីកន្លងទៅ ជាមួយនឹងសន្យាថា ពួកគេនឹងត្រូវបាននាំយកទៅក្រៅប្រទេស។
មេខ្លោងម្នាក់ដែលមានឈ្មោះ Y Tho Ayun អាយុ ៣៥ឆ្នាំ ត្រូវបានគេស្គាល់ថា Ama Kzruh បានប្រាប់អាជ្ញាធរថា គាត់បានញុះញង់អ្នកភូមិនៅ Dak Lak ឲ្យធ្វើការបាញ់ប្រហារលើការិយាល័យគណៈកម្មាធិការប្រជាជននៅឃុំ Ea Ktur និង Ea Tieu ។ មេខ្លោងរូបនេះបាននិយាយថា គាត់បានចុះឈ្មោះមនុស្សដែលគាត់ទុកចិត្តប៉ុណ្ណោះ។
កាលពីព្រឹកថ្ងៃ អាទិត្យ សប្ដាហ៍មុន ក្រុមក្មេងទំនើងមិនស្គាល់អត្ថសញ្ញាណមួយក្រុមប្រដាប់ដោយកាំភ្លើងបានវាយប្រហារទីស្នាក់ការប៉ូលីស ដោយបណ្ដាលឲ្យមន្រ្តីប៉ូលីស ៤នាក់ មន្រ្តីឃុំ ២នាក់ និងជនស៊ីវិល ៣នាក់ ត្រូវបានសម្លាប់ ខណៈមន្រ្តី ២នាក់ផ្សេងទៀតបានរងរបួស។
ការបាញ់ប្រហារនេះ បានចាប់ផ្តើមនៅម៉ោងប្រហែល ០ និង ៣៥នាទីព្រឹកឈានចូលថ្ងៃអាទិត្យ នៅពេលដែលជនសង្ស័យប្រដាប់អាវុធ ១០នាក់ បានចូលទៅកាន់ការិយាល័យគណៈកម្មាធិការប្រជាជននៃឃុំ Ea Tieu។
បន្ទាប់មកក្រុមបានឈប់រថយន្តភីកអាប់លើផ្លូវជាតិលេខ២៧ ចម្ងាយប្រហែល១,៥គីឡូម៉ែត្រ ពីការិយាល័យនោះ ហើយបានសម្លាប់អ្នកបើកបរម្នាក់ទៀត។ ក្នុងពេលជាមួយគ្នានោះ មនុស្សប្រដាប់អាវុធចំនួន៣០នាក់ផ្សេងទៀតបានវាយប្រហារការិយាល័យគណៈកម្មាធិការប្រជាជននៅឃុំ Ea Ktur បន្ដទៀត។ ពួកគេបានគំរាមអ្នកបើកឡានដឹកដី និងបង្ខំឱ្យបិទផ្លូវជាដើម ហើយពួកគេបានបោះស្រាក្រឡុក ចូលទៅក្នុងរថយន្ដនោះ បន្ទាប់មកចូលទៅក្នុងការិយាល័យ ហើយបានដុតបំផ្លាញឯកសារ និងរថយន្ត។
ក្នុងអំឡុងពេលរត់គេចខ្លួន ជនសង្ស័យក៏បានសម្លាប់លេខាបក្សឃុំ Ea Ktur លោក Nguyen Van Kien និង ចាប់ជនស៊ីវិល ៣នាក់ ធ្វើជាចំណាប់ខ្មាំង ប៉ុន្ដែជនស៊ីវិលទាំងនោះត្រូវបានជួយរំដោះចេញដោយសុវត្ថិភាព។
យ៉ាងណាម៉ិញ ក្រោយកើតមានរឿងសោកនាដកម្មនេះហើយ ក្រសួងសន្តិសុខសាធារណៈបាននិយាយថា ខ្លួននឹងចាត់វិធានការចាំបាច់ទាំងអស់ ដើម្បីស្វែងរកជនសង្ស័យផ្សេងទៀតនៅក្នុងការវាយប្រហារនោះ៕
ចុចអាន៖ ចាប់ឃាត់ខ្លួនមនុស្ស ២៦នាក់ ក្រោយសម្លា.ប់់ប៉ូលីសវៀតណាម៤នាក់ និងរបួសជាច្រើននាក់