អត្តពលិកហែលទឹកកម្ពុជា ២រូបមានឈ្មោះចេញទៅប្រកួតក្នុងព្រឹត្តិការណ៍កីឡាអូឡាំពិកនៅប្រទេសជប៉ុន នៅសប្ដាហ៍ក្រោយ ខណៈ ឯកឧត្តម ស៊ុន ចាន់ថុល ទេសរដ្ឋមន្រ្តី រដ្ឋមន្រ្តីក្រសួងសាធារណការ និងដឹកជញ្ជូន និង ជាប្រធានសហព័ន្ធខ្មែរកីឡាហែលទឹក ផ្ដាំផ្ញើលើកទឹកចិត្តដល់ ព្រមទាំងផ្ដល់ជាថវិកា និងសម្ភារៈ ជូនដល់គ្រូបង្វឹក និងកីឡាករ កីឡាការិនី មុនចេញដំណើរទៅផងដែរ។
លោក ហែម គីរី អគ្គលេខាធិការ តំណាង ឯកឧត្តម ស៊ុន ចាន់ថុល បានធ្វើការជួបសំណេះសំណាល ជាមួយនឹងគ្រូបង្វឹក និងកីឡាករ កីឡាការិនី ហែលទឹកជម្រើសជាតិ ដែលត្រៀមចេញទៅការប្រកួតកីឡាអូឡាំពិករដូវក្ដៅ នៅក្នុងទីក្រុង តូក្យូ ប្រទេសជប៉ុន ដោយបានធ្វើការផ្តែផ្តាំ ពាំនាំនូវអនុសាសន៍របស់ ឯកឧត្តមប្រធានសហព័ន្ធ សូមថែរក្សាសុខភាព ត្រូវតែ ប្រឹងប្រែងប្រកួតឲ្យអស់ពីសមត្ថភាព និងគោរពតាមលក្ខខណ្ឌនៃការប្រកួតឲ្យបាន និងគោលការណ៍កីឡា។ នេះបើតាមការបញ្ជាក់នៅលើហ្វេសប៊ុករបស់សហព័ន្ធ ព្រឹកថ្ងៃសុក្រ នេះ។
អត្ថបទពាក់ព័ន្ធ៖អត្តពលិកកម្ពុជា ចេញទៅប្រកួតអូឡាំពិកនៅប្រទេសជប៉ុន នៅថ្ងៃអង្គារ សប្ដាហ៍ក្រោយ
អត្តពលិកកម្ពុជា ២រូបដែលមានឈ្មោះចូលរួមប្រកួតមាន កីឡាការិនីហែលទឹក ឃឿន ប៊ុនពេជ្រមរកត ហែលក្នុងវិញ្ញាសាហែលទឹក៥០ម៉ែត្រសេរីនារី។ កីឡាករហែលទឹក ហែម ប៉ុច ក្នុងវិញ្ញាសាហែលទឹក៥០ម៉ែត្រសេរីបុរស។ ចំណែកលោក ហែម ពន្លឺ ជាគ្រូបង្វឹកដឹកនាំក្រុម។
ឯកឧត្តមបានផ្តាំផ្ញើរជូនពរ និងលើកទឹកចិត្តដល់ កីឡាករ កីឡាការិនី ព្យាយាមប្រកួតឲ្យបាន លទ្ធផលល្អនៅក្នុងការប្រកួតកីឡាអូឡាំពិក ឆ្នាំ២០២០ លើកនេះ ហើយ ឯកឧត្តម បានផ្ដល់នូវ ថវិកាផ្ទាល់ខ្លួនក្នុងមួយនាក់ ៥០០$ រួមជាមួយសំភារៈប្រើប្រាស់សម្រាប់ ចូលរួមប្រកួត និងថ្នាំការពារជំងឺផ្ដាសាយ ដើម្បីទុកសម្រាប់កីឡាករ កីឡាការិនី ហែលទឹកជម្រើសជាតិប្រើប្រាស់នៅពេលធ្វើដំណើរទៅចូលរួមការប្រកួតនាពេលខាងមុខនេះ៕
