អត្តពលិកកម្ពុជា ចំនួន៣រូប គ្រូបង្វឹកនិងថ្នាក់ដឹកនាំក្រុម នឹងចេញដំណើរទៅប្រកួតក្នុងព្រឹត្តិការណ៍កីឡាអូឡាំពិក The Summer Olympics នៅក្នុងទីក្រុងតូក្យូ ប្រទេសជប៉ុន នៅថ្ងៃអង្គារ សប្ដាហ៍ក្រោយ នេះ ពោលគឺមុនពិធីបើករយៈពេល៣ថ្ងៃ។
សម្រាប់គ្រូបង្វឹក និងកីឡាករ កីឡាការិនីហែលទឹក និងអត្តពលកម្ម ជម្រើសជាតិកម្ពុជា និងធ្វើដំណើរចាកចេញពីព្រះរាជាណាចក្រកម្ពុជា នៅព្រឹកថ្ងៃអង្គារ ទី២០ ខែកក្កដា ឆ្នាំ២០២១ វេលាម៉ោង ០៩:៣៥ នាទីព្រឹក ឆ្ពោះទៅកាន់ប្រទេសជប៉ុន។
អត្តពលិកកម្ពុជាទាំង៣រូបនោះមាន កីឡាការិនីហែលទឹក ឃឿន ប៊ុនពេជ្រមរកត ហែលក្នុងវិញ្ញាសាហែលទឹក៥០ម៉ែត្រសេរីនារី។ កីឡាករហែលទឹក ហែម ប៉ុច ក្នុងវិញ្ញាសាហែលទឹក៥០ម៉ែត្រសេរីបុរស។ កីឡាករអត្តពលកម្ម ប៉ែន សុគង់ នឹងរត់ល្បឿនចម្ងាយ១០០ម៉ែត្របុរស។
ព្រឹត្តិការណ៍កីឡាអូឡាំពិករដូវក្តៅ ដែលធ្វើនៅរាជធានីតូក្យូ នេះមានការចូលរួមពីកីឡាករកីឡាការិនី ពីប្រទេស/តំបន់ចំនួន២០៦ផ្សេងគ្នា សរុបប្រមាណជា១១,០០០នាក់ លើប្រភេទ៣៣កីឡានិង៣៣៩វិញ្ញាសា។ ការប្រកួតគ្រោងចាប់ធ្វើពីថ្ងៃទី២៣ ខែកក្កដា ដល់ថ្ងៃទី៨ ខែសីហា ឆ្នាំ២០២១។ ការប្រកួតនេះបានលើកពេលពីឆ្នាំ២០២០ កន្លងមកដោយសារការឆ្លងនៃជំងឺកូវីដ-១៩ ជុំវិញពិភពលោក៕
