សិល្បៈជាតិ៖ លោក អូលីវ៉ា គង់ កំពូលអ្នករចនាម៉ូដ និងជាគ្រូបង្វឹកដើរម៉ូដដ៏លេចធ្លោមួយរូបនៅក្នុងវិស័យហ្វេសសិន កំពុងតែមមាញឹកយ៉ាងខ្លាំង ព្រោះក្រោយសម្រេចបានយ៉ាងជោគជ័យនៃកម្មវិធីដើរបង្ហាញម៉ូដ បែបសហសម័យផ្សារភ្ជាប់ជាមួយនឹង វប្បធម៌ អរិយធម៌ខ្មែរ ១០០ឈុត កាលពីពេលថ្មីៗនេះ លោក កំពុងត្រៀមស្នាដៃច្នៃម៉ូដថ្មីជាបន្តទៀត ដើម្បីទៅចូលរួមក្នុងកម្មវិធី Milan Fashion Week 2023 តបតាមការអញ្ជើញនៃកម្មវិធី។
កម្មវិធីបង្ហាញម៉ូដ ដើរម៉ូដ និងច្នៃម៉ូដកម្រិតអន្តរជាតិដ៏ធំ International Fashion Show នៅទីក្រុង Milan ប្រទេសអ៊ីតាលី ដែលលោក អូលីវ៉ា គង់ ត្រូវបានអញ្ជើញឱ្យចូលរួមនោះ នឹងរៀបចំឡើងចាប់ពីថ្ងៃទី24 ខែ កញ្ញា រហូតដល់ថ្ងៃទី២៨ ខែកញ្ញា ឆ្នាំ២០២៣ ខាងមុខនេះ។
ឆ្លើយតបមកកាន់សារព័ត៌មានត្រយងតាមរយៈសារអេឡិចត្រូនិក អ្នកច្នៃម៉ូដនិងគ្រូបង្វឹកដើរម៉ូដដ៏មានឥទ្ធិពលរូបនេះបានទម្លាយឱ្យដឹងថា លោកបានត្រៀមស្នាដៃច្នៃឈុតបែបហ្វេសសិនចំនួន ១៦ឈុតយកទៅបង្ហាញនាឱកាសនោះ។ លោក អូលីវ៉ាគង់ ឬមានឈ្មោះកំណើត ម៉ែន សីហា បានបង្ហាញពីក្ដីរំភើបដែលរូបលោកត្រូវបានកម្មវិធីអញ្ជើញឱ្យចូលរួមក្នុងនាមជា Designer មួយរូបតំណាងឱ្យប្រទេសកម្ពុជា។ ការចូលរួមលើកនេះត្រូវបានសាមីខ្លួនគូសបញ្ជាក់ថាគឺជារឿងដ៏រីករាយនិងជាមោទនភាពមួយសម្រាប់ប្រជាជាតិទាំងមូល ដែលវិស័យហ្វេសសិននៅកម្ពុជា កំពុងតែមានការអភិវឌ្ឍទៅមុខ អាចបញ្ជ្រាបខ្លួននៅលើឆាកអន្តរជាតិបាន។
លោក អូលីវ៉ា គង់ ក្រៅពីចូលរួមនៅក្នុងកម្មវិធី Milan Fashion Week នាប្រទេសអ៊ីតាលីហើយនោះ លោកក៏ត្រូវចូលរួមនៅក្នុងកម្មវិធីការច្នៃម៉ូដនិងដើរហ្វេសសិននៅប្រទេសវៀតណាមនាថ្ងៃទី៥ ខែសីហា ឆ្នាំ២០២៣ ខាងមុខនេះផងដែរ៕
