សិល្បៈជាតិៈ ភាពយន្ត «KTV: KILLING TIME VIOLENTLY» គឺជាប្រភេទរឿងបែបវាយប្រហារ លាយនឹងឈុតឆាកកំប្លែងដែលធ្វើឱ្យអ្នកទស្សនាភ័យប្រហោងពោះផង និងផ្ទុះសំណើចពេញរោងកុនផង។ ភាពយន្តនេះត្រូវបានដឹកនាំរឿងដោយ Jimmy Henderson ពីអ្នកដឹកនាំរឿងល្បី «Jailbreak» កាលពីឆ្នាំ ២០១៧។
ភាពយន្តប្រភេទ Action មួយនេះបានប្រកាសបញ្ចាំងជាផ្លូវការហើយនៅរាត្រីថ្ងៃទី ២៣ ខែមិថុនា ឆ្នាំ ២០២៣ ដោយមានសម្ដែងដោយកំពូលតារាសម្តែងដ៏មានទេពកោសល្យផ្នែក គុនល្បុក្កតោដូចជា លោក អ៊ួ តារា, កញ្ញា សម ថារ័ត្ន , លោក រស់ មុន្នី លោក តារា នាយពែកមី Dj-ស្ដី កញ្ញា Hinano Kurosaki ជា Influencerមកពីប្រទេសជប៉ុន និងតារាសម្ដែងប្រុសស្រីជាច្រើនដួងទៀត។
យ៉ាងការចូលរួមសម្ដែងភាពយន្តថ្មីសន្លាងនេះ កញ្ញា សំ ថារ័ត្ន បានបង្ហាញចំណាប់អារម្មណ៍ថា ភាពយន្តនេះបានផ្លាស់ប្ដូរអត្តចរិតការសម្ដែងរបស់កញ្ញាពីមុនមក ដោយកញ្ញាសម្ដែងជាតួអ្នកជូនសំអាត ក៏ប៉ុន្តែការសម្ដែងរបស់កញ្ញានៅតែបង្ហាញពីក្បាច់គុនវាយតប់ដូចគ្នា។
ក្នុងនោះដែរ នាយពែកមី ក៏បានចូលរួមសម្ដែងក្នុងរឿងនេះ ហើយបានប្រាប់ទៅអ្នកគាំទ្រថា នេះជាលើកដំបូងដែលលោកបានចូលរួមការងារសម្ដែងជាមួយអ្នកដឹកនាំរឿងល្បីគឺលោក Jimmy Henderson ។ លោកបានសម្ដែងជាតួរងការឈឺសាច់បន្តិចពីក្រុមអ្នកលេងនៅ KTV។ ហើយភាពយន្តនេះលោករំពឹងថា អ្នកគាំទ្រនឹងជក់ចិត្តពេលបានទស្សនាហើយ។
ដោយឡែក កញ្ញា Hinano Kurosaki ជា Influencer មកពីប្រទេសជប៉ុន និងជាតួសម្ដែងសិចស៊ីនៅក្នុងរឿងនេះដែលត្រូវបានមហាជនជាច្រើនចោលក្រសែភ្នែកចាប់អារម្មណ៍ខ្លាំងជាងគេ បាននិយាយពីការសម្ដែងភាពយន្តនេះថា ការលំបាកក្នុងការសម្ដែងភាពនេះ គឺត្រង់កញ្ញាព្យាយាមនិយាយភាសាខ្មែរឱ្យច្បាស់។ ការសម្ដែងជាតួសិចស៊ី គឺជាចំណង់ចំណូលចិត្តមួយរបស់កញ្ញាស្រាប់តែម្ដង។
សម្រាប់ Dj-ស្ដី ក៏បានបង្ហាញចំណាប់អារម្មណ៍ថា លោកបានចូលរួមសម្ដែងភាពយន្តជាលើកទី២ហើយ និងការងាកពីអ្នកចម្រៀងរ៉េបមកសម្ដែងភាពយន្តគឺលោកពិតជាចូលចិត្ត។ លោកសម្ដែងជាតួអង្គប៉ូលិស ដែលពិតជាត្រូវជាមួយនឹងវ័យរបស់លោកផង និងជាចំណូលចិត្តរបស់លោកផង។
សូមជម្រាបផងដែរថា ភាពយន្ត «KTV: KILLING TIME VIOLENTLY» មានបញ្ចាំងឱ្យមហាជនទិញសំបុត្រចូលទស្សនានៅថ្ងៃទី ៣០ ខែមិថុនា ឆ្នាំ ២០២៣ នេះតទៅនៅគ្រប់រោងភាពយន្ត៕
