សិល្បៈអន្តរជាតិ៖ នាង Rikkie Valerie Kollé គឺជាស្ត្រីកែភេទទីមួយដែលបានឈ្នះមកុដបវរកញ្ញាហូឡង់ យ៉ាងណាមិញជ័យជំនះរបស់នាង មានទាំងអ្នកចាំអបអរសាទរ និងអ្នកមិនពេញចិត្តផងដែរ។
នាង Kollé បានឈ្នះមកុដបវរកញ្ញាចក្រវាឡតំណាងប្រទេសហូឡង់យកឈ្នះលើបេក្ខនារី៩រូបផ្សេងទៀតនៅក្នុងវគ្គផ្ដាច់ព្រ័ត្រកាលពីថ្ងៃអាទិត្យសប្ដាហ៍មុន។ នៅពេលដែលអង្គភាពរៀបចំកម្មវិធីប្រកួតបានចេញសេចក្ដីប្រកាសស្ដីពីជ័យជំនះរបស់នាងនៅលើបណ្ដាញសង្គម ព្រមជាមួយនឹងរូបភាពរបស់នាងក្រោយបានបំពាក់មកុដជា បវរកញ្ញាប្រចាំប្រទេសហូឡង់ ដោយបវរកញ្ញាចក្រវាឡពិភពលោកបច្ចុប្បន្នកញ្ញា R’Bonney Gabriel។
ជ័យជំនះរបស់នារីកែភេទវ័យ២២ឆ្នាំរូបនេះត្រូវបានគេលើកឡើងថាដោយសារតែនាងមានភាពលេចធ្លោព្រមទាំងធ្វើបានយ៉ាងល្អនូវគ្រប់វិញ្ញាសារប្រកួត ខណៈដែលនាង R’Bonney Gabriel ក៏បានចែករំលែកពាក្យអបអរសាទរចំពោះការឈ្នះមកុដឆ្នាំ២០២៣របស់នាង Kollé នៅលើបណ្ដាញសង្គម Instagram ថា៖ «ស្វាគមន៍មកកាន់ថ្នាក់ប្រកួតប្រចាំឆ្នាំ២០២៣»
យោងតាមប្រព័ន្ធផ្សព្វផ្សាយរបស់ប្រទេសហូឡង់បានរាយការណ៍ថា Kollé គឺជាស្ត្រីកែភេទទី២ ដែលបានចុះឈ្មោះប្រកួតនៅក្នុងកម្មវិធីប្រកួតបវរកញ្ញាចក្រវាឡបន្ទាប់ពីនាង Angela Ponce ដោយនាង Angela គឺជាបវរកញ្ញាចក្រវាឡតំណាងឱ្យប្រទេសអេស្ប៉ាញ ចូលរួមប្រកួតបវរកញ្ញាចក្រវាឡពិភពលោកកាលពីឆ្នាំ២០១៨។
បណ្ដាញសារព័ត៌មានដដែលនេះបានរៀបរាប់ដែរថា Kollé ធ្លាប់ចូលរួមប្រកួតក្នុងកម្មវិធី Holland’s Next Top Model កាលពីឆ្នាំ២០១៨ ដោយកាលណោះនាងបានឡើងដល់ Top4។
ឈានមកដល់បច្ចុប្បន្ននេះអង្គភាពរៀបចំការប្រកួត Miss Universe បានប្រឹងប្រែងយ៉ាងខ្លាំងដើម្បីធ្វើយ៉ាងណាឱ្យកម្មវិធីកាន់តែមានភាពទូលំទូលាយ ដោយកាលពីខែសីហា ឆ្នាំ២០២២ កម្មវិធីបានកែទម្រង់ថ្មីដោយអនុញ្ញាតឱ្យស្ត្រីមេម៉ាយ ស្ត្រីរៀបការរួច និងអ្នកម្ដាយអាចចូលរួមប្រកួតប្រជែងបាន។ ស្ត្រីកែភេទជាសេដ្ឋិនីថៃ និងស្ត្រីកែភេទដែលមានទ្រព្យសម្បត្តិច្រើនជាងគេលំដាប់លេខ៣ពិភពលោកនាង Anne Jakapong Jakrajutatip បានទិញសិទ្ធិគ្រប់គ្រងអង្គភាពមួយនេះកាលពីខែតុលា ឆ្នាំ២០២២ ហើយនាងគឺជាស្ត្រីដំបូងដែលបានទិញសិទ្ធិធ្វើជាម្ចាស់កម្មវិធីជាប្រវត្តិសាស្ត្ររយៈពេល៧០កន្លងមក។