សិល្បៈអន្តរជាតិ៖ បណ្ដាញសារព័ត៌មាន TMZ បានចេញសេចក្ដីរាយការណ៍ថាតារាចម្រៀង-តារាសម្ដែង Ariana Grande និងស្វាមី Dalton Gomez កំពុងតែត្រៀមលែងលះគ្នា ក្រោយមួយរយៈចុងក្រោយតារាស្រីរូបនេះមិនដែលពាក់ចិញ្ចៀនរៀបការរបស់ខ្លួនទៀតនោះឡើយ។ តើមានរឿងអ្វីទើបធ្វើឱ្យស្នេហាដែលមានរសជាតិផ្អែមត្រឹមរយៈពេល២ឆ្នាំសោះ ប្រែជាល្វីង?
ចំពោះរឿងនេះមានប្រភពចំនួន៣ផ្សេងគ្នាបានប្រាប់ពីមូលហេតុដែលធ្វើឱ្យរឿងរ៉ាវរបស់អ្នកទាំងពីរធ្លាក់ទៅដល់ដំណាក់កាលយ៉ាប់យឺនស្រោចស្រង់លែងបានថា ៖ «Ariana Grande និងស្វាមី Dalton Gomezបានព្យាយាមផ្សះផ្សាគ្នា ប៉ុន្តែពួកគេរកឃើញថាពួកគេមិនស័ក្តិសមនឹងគ្នា។ Dalton បានព្យាយាមលាក់បាំងនិងរក្សាទំនាក់ទំនងរបស់ពួកគេពីមជ្ឈដ្ឋានខាងក្រៅនិងមិត្តរួមការងារ ហើយលោកមិនដែលនិយាយរឿងរ៉ាវប្រេះឆារបស់ខ្លួននោះឡើយ។
ចំណែកប្រភពទីពីរបានបន្ថែមថា៖ «មិត្តភក្ដិរបស់ Ariana និង Dalton ខ្វល់ខ្វាយខ្លាំងពីទំនាក់ទំនងដែលប្រៀបដូចជាទឹកលើស្លឹកឈូករបស់អ្នកទាំងពីរហើយមានអារម្មណ៍ថាទំនាក់ទំនងនេះច្បាស់ជាមានអាយុកាលខ្លី។ទំនាក់ទំនងរបស់អ្នកទាំងពីរកន្លងមកជួបរឿងមិនយល់ចិត្តគ្នាហើយអ្នកទាំងពីរបានព្យាយាមយ៉ាងខ្លាំងដើម្បីរកច្រកចេញឱ្យរឿងរបស់ខ្លួន។ ដោយឡែកប្រភពទីបីបានលើកឡើងថា៖ «មិត្តភក្ដិជិតស្និទ្ធរបស់ Ariana និង Dalton បានដឹងពីរឿងប្រេះឆារបស់អ្នកទាំងពីរហើយបានព្យាយាមជួយផ្សះផ្សាដែរប៉ុន្តែមិនអាចទៅរួច។ បច្ចុប្បន្ននេះ Ariana កំពុងតែមមាញឹកថតភាពយន្ត Wicked នៅក្រៅប្រទេស ហើយតារាងការងាររបស់នាងពិតជាមមាញឹកខ្លាំងដូច្នេះ ទើបគូស្វាមីភរិយាអាយុកាល២ខួបបានសម្រេចចិត្តបញ្ចប់ចំណងប្រាំប្រការរបស់ខ្លួន។»
បណ្ដាញសារព័ត៌មាន TMZ បានផ្សាយថា Ariana និង Dalta បានចែកផ្ទះគ្នារស់នៅតាំងពីខែមករាឆ្នាំ២០២៣មកម្ល៉េះ ហើយពេលនេះដែរ កំពុងតែដំណើរការលើនីតិវិធីលែងលះគ្នា។ បណ្ដាញសារព័ត៌មានដដែលនេះបានទម្លាយទៀតថា កាលពីប្រមាណ៣ខែមុន ពួកគេបានព្យាយាមផ្សះផ្សាគ្នាដែរប៉ុន្តែគួរឱ្យសោកស្ដាយមិនបានសម្រេច។ យ៉ាងណាមិញពួកគេនៅរក្សាចំណងមិត្តភាពក្នុងនាមជាមិត្តភក្ដិហើយនិយាយទូរស័ព្ទជាមួយគ្នាជាធម្មតា។
ប្រភពជិតស្និទ្ធបានបង្ហើបទៀតថា «ពួកគេបានសម្រេចចិត្តរួមគ្នាចំពោះការចែកផ្លូវគ្នាដើរនេះ។ ពួកគេចាប់ផ្ដើមមានបញ្ហាតាំងពីមុនខែមករាមកម្ល៉េះ ប៉ុន្តែពួកគេចង់រក្សាចំណងមិត្តភាពក្នុងឋានៈមិត្តភក្ដិ។ មែនទែនទៅអ្នកទាំងពីរគឺជាមិត្តភក្ដិល្អនឹងគ្នាតាំងពីដំបូង ចំណែកមិត្តភក្ដិនិងគ្រួសាររបស់ពួកគេបានព្យាយាមការពារពួកយ៉ាងអស់ពីសមត្ថភាពផងដែរ»។
សូមរំលឹកឡើងវិញថា តារាចម្រៀងស្រីល្បីឈ្មោះរបស់អាមេរិក និងជាម្ចាស់ពានរង្វាន់ Grammy Awards នោះ នៅពេលនេះបានសម្រេចចិត្តរៀបការជាមួយបុរសម្នាក់ឈ្មោះថា Dalton Gomez ដែលត្រូវគេស្គាល់ថា ជាភ្នាក់ងារអចលនទ្រព្យ កាលពីថ្ងៃទី១៥ ខែឧសភា ឆ្នាំ២០២១ យ៉ាងសាមញ្ញាដោយមានភ្ញៀវចូលរួមត្រឹម២០នាក់ប៉ុណ្ណោះនា Montecito រដ្ឋ California៕
