សិល្បៈអន្តរជាតិ៖ តារាសម្ដែង-ពិធីការិនីល្បីឈ្មោះ Aff Taksaorn បានចេញមកផុស Story នៅលើបណ្ដាញសង្គម Instagram ក្រោយពេលដែលតារាសម្ដែង Tye Chutima បានបង្ហោះរូបភាពផ្លែប៉ោមដែលត្រូវខាំមួយចំណិតព្រមទាំងភ្ជាប់ Caption ដែលធ្វើឱ្យអ្នកលេងបណ្ដាញសង្គមយល់ថាការលើកឡើងនេះអាចសំដៅដល់នាង Aff ក៏ថាបាន។
ក្រោយពេលដែលផេកផុសរឿងតារារបស់ថៃមួយបានចេញមកទម្លាយ Caption ធ្វើឱ្យគ្រប់គ្នាសង្ស័យថា៖«យកការងារផ្ទះទៀតអត់? ឬមួយចង់សម្រាក? មានរឿងរបស់ (Emoji ផ្លែប៉ោម) និង (Emoji ទន្សាយ)»។ ការបង្ហោះរបស់ផេកនេះធ្វើឱ្យសាធារណជននឹកដល់ការបង្ហោះ របស់ Tye Chutima នៅលើ Story ជារូបភាពកញ្ចក់ដែលមានផ្លែប៉ោមនៅពីមុខព្រមជាមួយនឹងស្រមោល ដែលមើលពីកញ្ចក់ទៅឃើញដូចជាផ្លែប៉ោមពេញផ្លែ តែបើមើលពីផ្លែប៉ោមវាត្រូវបានគេខាំអស់មួយដុំធំ ហើយភ្ជាប់នឹងសំណេរជាភាសាអង់គ្លេស៖ «Online isnt’t real» ហើយបានបន្ថែមជាភាសាថៃទៀតថា៖ «មិនដឹងថាចង់បញ្ជាក់ពីអ្វីប៉ុន្តែមើលទៅឃើញថាព្យាយាមគ្រាន់បើ ផុសហើយលុបធ្វើអី ខ្ញុំឆ្ងល់មែនទែន» ព្រមជាមួយនឹង Emoji ស្រក់ទឹកភ្នែក។
បន្ទាប់ពីរឿងនេះត្រូវបានចែករំលេកបន្តគ្នាអ្នកលេងបណ្ដាញសង្គមម្នាក់ៗទាយថាអ្វីដែលផេកតាមដានរឿងរ៉ាវតារាផុសនោះប្រហែលជាសំដៅដល់ Aff និង Tye ប៉ុន្តែមួយក្រុមទៀតបែរជាយល់ថាប្រហែលជាអតីតភរិយានាយករដ្ឋមន្ត្រីក្រៅបញ្ជីរូបនេះចង់ដាស់តឿនឱ្យអ្នកលេងបណ្ដាញសង្គមស្វែងយល់និងចេះគិតគូរវិនិច្ឆ័យថាគ្រប់រឿងរ៉ាវនៅលើអនឡាញមិនមែនសុទ្ធតែជារឿងពិតនោះទេ។
ប៉ុន្តែបើងាកទៅមើល Aff Taksaorn ដែលត្រូវគេយល់ថា Tye កំពុងសំដៅដល់នោះ បែរជាមិនមានអ្វីថ្មីក្រៅពីបង្ហោះរូបភាពរបស់ខ្លួននៅលើ Story តែប៉ុណ្ណោះ។ ដូច្នេះសម្រាប់អ្នកតាមដានមានតែរង់ចាំមើលបន្តទៀតថាអ្វីដែលផេកតាមដានតារាផុសនោះលើកឡើងពី Tye និង Aff ឬក៏ជាតារាណាផ្សេង។
ការដែលមហាជនយល់ថាតារាស្រីមកពីទូរទស្សន៍និងផលិតកម្មផ្សេងគ្នាទាំងពីរ អាចមិនចុះសម្រុងគ្នាដោយសារតែ Tye អតីតភរិយារបស់ Tim Pitha ដែលបានលែងលះគ្នានិងបន្សល់ទុកចំណងដៃកូនស្រីមួយជាមួយគ្នានោះចង់វិលត្រលប់មកត្រូវគ្នាវិញ ចំណែកឯ Aff គឺជាតារាស្រីអ្នកតាមដានសង្ស័យថាកំពុងតែបង្កាត់ភ្លើងស្នេហ៍ថ្មីជាមួយប្រធានគណបក្សឆ្ពោះទៅមុខរូបនេះ។
យ៉ាងណាមិញកន្លងមក Aff តែងតែប្រាប់បណ្ដាញសារព័ត៌មាននានាថារវាងនាងនិង Tim Pitha បានស្គាល់គ្នាយូរមកហើយ ថ្វីត្បិតនាងមិនដែលរំលឹកដល់រឿងដែលមហាជនចង់ដឹងគឺរឿងទំនាក់ទំនងស្នេហារបស់ខ្លួននិងលោក Tim Pitha តែតារាស្រីរូបនេះទទួលស្គាល់ថាខ្លួនកំពុងមើលចិត្តមើលថ្លើមជាមួយនឹងបុរសម្នាក់តែមិនបានបញ្ជាក់ពីអត្តសញ្ញាណនោះឡើយ៕
ប្រភព៖ line
