សិល្បៈជាតិ៖ តារាសម្ដែងភាពយន្តជើងចាស់អ្នកនាង អម្ពរ ទេវី កំពុងតែជួបទុក្ខធ្ងន់នៅឯនាយសមុទ្រ ដោយសារតែអ្នកម្ដាយជាទីគោរពស្រលាញ់បានលាចាកលោកនេះកាលពីពេលថ្មីៗនេះ។
អ្នកម្ដាយរបស់អ្នកនាង អម្ពរ ទេវី លោកយាយ ហោ សុខា បានទទួលអនិច្ចកម្ម កាលពីថ្ងៃទី២៨ ខែកក្កដា ឆ្នាំ២០២៣ នៅសហរដ្ឋអាមេរិក ក្នុងជន្មាយុ ៨៣ ឆ្នាំ (១៩៤០-២០២៣) ដោយជរាពាធ។
តារាសម្ដែងភាពយន្តដ៏ល្បីល្បាញនាទស្សវត្សរ៍ទី៩០ អ្នកនាង អម្ពរ ទេវីបានឃ្លាតឆ្ងាយពីរង្វង់សិល្បៈទៅរស់នៅសហរដ្ឋអាមេរិកហើយយូរម្ដងៗអ្នកនាងបានត្រលប់មកស្រុកកំណើត ដែលជាឱកាសឱ្យផលិតករដែលនៅតែស្ដាយសមត្ថភាពអ្នកនាងមានឱកាសទាញអ្នកនាងមកចូលរួមសម្ដែងដើម្បីបម្រើឱ្យអារម្មណ៍អ្នកទស្សនា ដូចជាភាពយន្ត «ទឹកចិត្តអ្នកម្ដាយសម័យថ្មី» ដែលជារឿងដែលឆ្លុះបញ្ចាំងពីទឹកចិត្តម្ដាយដែលរស់នៅឋានៈ និងជីវភាពខុសគ្នា ប៉ុន្តែក្ដីស្រលាញ់ និងទំហំទឹកចិត្តជាម្ដាយធំធេងជាងមហាសមុទ្រដូចគ្នា៕