សិល្បៈជាតិ៖ ថ្មីៗនេះតារាចម្រៀងចាស់វស្សានៃផលិតកម្ម Town Production គឺលោក សុគន្ធ ថេរ៉ាយុ បានបញ្ចេញបទចម្រៀងថ្មីរបស់ខ្លួន ដើម្បីជាចំណងដៃសម្រាប់អ្នកគាំទ្រដែលនៅតែស្រលាញ់និងពេញចិត្តរូបលោក។ ប៉ុន្តែក្នុងចំណោមអ្នកដែលចូលមកបញ្ចេញមតិយោបល់ចំពោះបទចម្រៀងថ្មីនេះមានម្នាក់បានលើកជាមតិឡើងដែលធ្វើឱ្យតារាចម្រៀងរូបនេះផ្ទុះកំហឹង។
បទចម្រៀង «100K» គឺជាបទចម្រៀងនិពន្ធថ្មី ដែលបានបង្ហោះចែកចាយនៅលើបណ្ដាញសង្គមហ្វេសប៊ុកកាលពីថ្ងៃទី២៩ ខែកក្កដា ឆ្នាំ២០២៣។ បទចម្រៀងថ្មីនេះទទួលបានការសរសើរនិងសាទរយ៉ាងច្រើនពីសំណាក់អ្នកដែលគាំទ្រលោក ដោយម្នាក់ៗបានបញ្ចេញមតិដូចៗគ្នាថា ពីរោះណាស់ អាយដល។ យ៉ាងណាមិញក្នុងចំណោមអ្នកសរសើរទាំងអស់នោះគេសង្កេតឃើញមានម្នាក់បានបញ្ចេញ មតិដែលធ្វើឱ្យម្ចាស់បទ «មហារីកបេះដូង» ខឹងឆេះដុំយ៉ាងខ្លាំង។ «សំឡេងកែមិនឡើង។ ទុកឱកាសឱ្យក្មេងជំនាន់ក្រោយទៅប្អូន»។
ឆ្លើយតបចំពោះការលើកឡើងខាងលើនេះ សុគន្ធ ថេរ៉ាយុ បានរៀបរាប់នៅលើបណ្ដាញសង្គមវិញថា៖ «អរគុណណាស់បងដែលបានចូល comments ក្នុងបទចម្រៀងរបស់ខ្ញុំ ខ្ញុំអត់ចង់ច្រៀងដើម្បីចង់ឈ្នះចាញ់ប្អូនៗជំនាន់ក្រោយនោះទេ ហើយក៏អត់គិតថាខ្លួនឯងត្រូវតែល្បីល្បាញជាងអ្នកណាៗដែរ កាលដែលខ្ញុំចូលមកច្រៀងវិញពេលនេះខ្ញុំគ្រាន់តែបំពេញបំណងអ្នកដែលគាំទ្រខ្ញុំមួយចំនួនតូចដែលគាត់បាត់មុខខ្ញុំយូរ ព្រោះពួកគាត់មិនដែលឃើញខ្ញុំចេញចម្រៀងដូចមុនយូរហើយ ទោះអ្នកគាំទ្រខ្ញុំមានតែមួយរយនាក់ក៏ដោយក៏ខ្ញុំសប្បាយចិត្ដដែរ ព្រោះវាជាការស្រលាញ់ចេញពីចិត្តពីបេះដូងពិតរបស់ពួកគាត់ ខ្ញុំចង់បញ្ជាក់ប្រាប់បងបន្តិចថា ខ្ញុំមកច្រៀងវិញនេះព្រោះទីមួយខ្ញុំចង់បំពេញបំណងអ្នកគាំទ្រខ្ញុំមួយចំនួនតូចតែប៉ុណ្ណោះ មួយទៀតខ្ញុំគ្រាន់តែចង់បំពេញបំណងការស្រលាញ់សិល្បៈរបស់ខ្ញុំតាំងពីក្មេងមកខ្ញុំមិនចង់បោះបង់វា» ហើយមួយទៀតខ្ញុំគ្រាន់តែច្រៀងឬថតដើម្បីអោយខ្លួនឯងសប្បាយចិត្តឬរវល់តែប៉ុណ្ណោះដើម្បីកុំអោយគិតច្រើនមិនបានចង់ឈ្នះចង់ប្រជែងជាមួយអ្នកណាម្នាក់ឡើយក្នុងពិភពសិល្បៈនេះ បងអាចមិនស្គាល់ខ្ញុំច្បាស់តែបងអាចស៊ើបសួរអ្នកនៅក្នុងរង្វង់សិល្បៈបានថាតើខ្ញុំជាមួយមនុស្សបែបណា? ឈ្នានីសច្រណែនខ្លាចប្អូនជំនាន់ក្រោយល្បីជាងឬយ៉ាងណា? ជាមនុស្សចង់មានមុខមាត់ខ្ពស់ជាងគេជាងឯងឬយ៉ាងណា ខ្ញុំមានតែអោយតំលៃប្អូនជំនាន់ក្រោយ ជួបពួកគាត់មានតែរាក់ទាក់ណែនាំនិយាយលេងពីនេះពីនោះ មិនដែលគិតថាគាត់ល្បីលើសខ្ញុំ ខ្ញុំត្រូវតែច្រណែនពួកគាត់ទេ ព្រោះខ្ញុំដឹងច្បាស់ណាស់ក្នុងវិស័យនេះពិតណាស់រលកក្រោយត្រូវតែច្រានរលកមុខ តែខ្ញុំសុំអោយបងនិយាយរិះគន់អីសូមបងយកខួររបស់បងមកគិតសិនចាំនិយាយចេញមកព្រោះការនិយាយរបស់បងអាចធ្វើខ្ញុំឬអ្នកសិល្បៈមួយចំនួនមិនសប្បាយចិត្ត ព្រោះសម្ដីដែលមិនបានឆ្លងកាត់ខួរក្បាលរបស់បង ចុងក្រោយអរគុណដែលចំណាយពេលតាមដានជីវិតផ្ទាល់ខ្លួនខ្ញុំនឹងរិះគន់សំឡេងរបស់ខ្ញុំ 
។»
ពាក្យរិះគន់បែបនេះ មែនទែនទៅ មិនមែនទើបតែកើតឡើងចំពោះ សុគន្ធ ថេរ៉ាយុ នោះឡើយ រាល់តារាដែលជាមនុស្សសាធារណៈ រមែងនូវការរិះគន់ ជារឿយៗ ទាំងទៅលើសមត្ថភាព សំឡេង ការសម្ដែង ការតុបតែង ឬ រូបសម្រស់ជាដើម។
បន្ទាប់ពីតារាចម្រៀងរូបនេះបានឆ្លើយតបរួចគេមើលឃើញថាមានអ្នកគាំទ្រជាច្រើនរបស់តារាចម្រៀងរូបនេះបានចូលមកលើកទឹកចិត្តព្រមទាំងអះអាងថាពួកគេនៅតែបន្តលោកជានិច្ច ខណៈដែលអ្នកខ្លះទៀតបានផ្ដល់យោបល់ឱ្យតារាចម្រៀងរូបនេះកុំចាយពេលវេលាជាមួយនឹងរឿងឥតប្រយោជន៍បែបនេះ ព្រោះពួកគេចាត់ទុកសុគន្ធ ថេរ៉ាយុគឺជាអាយដលខ្លួនជានិច្ច៕
