សិល្បៈអន្តរជាតិ៖ ក្រោយភាពយន្តខ្នាតធំ២គឺរឿង Oppenheimer របស់ផលិតករ Christopher Nolan និងរឿង Barbie របស់ Greta Gerwig កាលពីថ្ងៃសុក្រកន្លងទៅ ដែលធ្វើឱ្យមជ្ឈដ្ឋានសាធារណជនមានការចាប់អារម្មណ៍យ៉ាងខ្លាំងនៅលើបណ្ដាញសង្គម ថាតើរឿងមួយណាគឺជាអ្នកឈ្នះនៃសង្គ្រាមផ្ទាំងសំពត់សនេះ។ ជាលទ្ធផលភាពយន្តជាប្រវត្តិសាស្ត្រស្ដែងពីជីវិតបិតាអាវុធគ្រាប់បែកអាតូមិចបានយកឈ្នះភាពយន្ត Barbie ហើយនៅលើ Box Office។
យោងតាមរបាយការណ៍របស់សារព័ត៌មាន Indian Express បានឱ្យដឹងថា Oppenheimer ទទួលបានការចាប់អារម្មណ៍ខ្លាំងនៅថ្ងៃចាក់បញ្ចាំងដំបូងនៅប្រទេសឥណ្ឌា ខណៈដែល Barbie ទទួលបានចំនួនទស្សនាត្រឹមពាក់កណ្ដាលប៉ុណ្ណោះ។ ឆ្នាំនេះភាពយន្តហូលីវូដដែលសម្ដែង Cillian Murphy បានក្លាយជាភាពយន្តខ្នាតធំហូលីវូដដែលឆក់បានចំណាប់អារម្មណ៍ខ្លាំងជាងគេបំផុតយកឈ្នះលើភាពយន្ត Tom Cruise រឿង Mission Impossible-Dead Reckoning Part One ថែមទៀតផង។
បើងាកទៅប្រទេសអាមេរិកឯណោះវិញ ភាពយន្ត Barbie របស់លោក Warner Bros រកបានចំណូល ៦៨-៧០ លានដុល្លារនៅថ្ងៃបើកសម្ពោធ ហើយកំពុងសម្លឹងរកមើលកំណត់ត្រាជាភាពយន្តដែលបើកសម្ពោធដោយទឹកប្រាក់១៥០លានដុល្លារ ចំណែកឯ Oppenheimer នៅអាមេរិកបើកសម្ពោធការចាក់បញ្ចាំងដោយកំណត់ត្រា ៧៥លានដុល្លារ គឺអាចនិយាយបានថាតាមយ៉ាងប្រកៀកប្រកិតពីក្រោយ។
គួរដឹងថាភាពយន្ត Oppenheimer គឺជាភាពយន្តដែលឆ្លុះបញ្ចាំងពីប្រវត្តិរបស់រូបវិទូដ៏ល្បីល្បាញមួយរូបគឺលោក J Robert. Oppenheimer ដែលជាអ្នកដឹកនាំគម្រោង Manhattan នៅក្នុងអំឡុងសង្គ្រាមលោកលើកទីពីរ ចំណែកឯរឿង Barbie គឺជារឿងដែលស្ដែងចេញពីការតុបតែងខ្លួនរបស់តុក្កតានៅក្នុងពិភពលោករបស់ Barbie បានសម្រេចចិត្តមកកាន់ពិភពពិតប្រាកដនៅពេលដែលពិភពលោករបស់ខ្លួនជួបនឹងវិបត្តិ។ តួឯកស្រីរឿងនេះសម្ដែងដោយ Margot Robbie ចំណែកតួឯកប្រុសជាសង្សាររបស់ Barbie គឺ Ken សម្ដែងដោយ Ryan Gosling៕
ប្រភព៖ The Week
