សិល្បៈជាតិ៖ កាន់តែជិតដល់ថ្ងៃផ្ទេរមកុដនិងរកឃើញម្ចាស់ជ័យលាភីថ្មីមែនទែនហើយ សម្រាប់កម្មវិធី Miss Grand Cambodia ឆ្នាំ២០២៣ ជាមួយគ្នានោះកញ្ញា សោម សារ៉ាពេជ្រ ដែលជានាយករងគ្រប់គ្រងកម្មវិធីនេះ បានចេញមកបង្ហោះសារក្រើនរំលឹកក៏ដូចជាដាស់តឿនដល់បេក្ខនារីទាំងអស់ យកទៅត្រិះរិះពិចារណា ដើម្បីអភិវឌ្ឍសមត្ថភាពរបស់ខ្លួន ធ្វើយ៉ាងណាអាចឈ្នះក្លាយជាម្ចាស់មកុដថ្មីនៃកម្មវិធីប្រកួតសម្រស់កម្រិតអន្តរជាតិមួយនេះ។
នៅសល់ត្រឹម៣វគ្គ ឬ៣ថ្ងៃទៀតប៉ុណ្ណោះ កម្មវិធី Miss Grand Cambodia 2023 នឹងរកឃើញម្ចាស់មកុដ ដែលនឹងត្រូវមកទទួលតំណែង ក៏ដូចជាបេសកកម្មបន្តពីកញ្ញា ពេជ្រ វត្តីសារ៉ាវឌ្ឍី ម្ចាស់តំណែងឆ្នាំចាស់ ទៅប្រកួតប្រជែងដណ្ដើមមកុដកម្រិតពិភពលោកនៅប្រទេសវៀតណាមនាចុងខែតុលាឆ្នាំ២០២៣ ខាងមុខនេះ។ ជាមួយនឹងភាពល្បីល្បាញ និងសន្ទុះគាំទ្រដ៏ច្រើនលើសលប់ដែលបេក្ខនារីនីមួយៗបានទទួលតាមរយៈការ Vote ក្ដី តាមរយៈការចែករំលែកលើបណ្ដាញសង្គម Facebook Instagram ឬ Tiktok ក្ដី មិនបានសបញ្ជាក់ថាបេក្ខនារីរូបនោះនឹងអាចមានសង្ឃឹមជាម្ចាស់មកុដ១០០ភាគរយនោះឡើយ។ បើយោងតាមអ្វីដែលនាយករងគ្រប់គ្រងកម្មវិធីខាងលើ បានលើកឡើងនៅលើបណ្ដាញសង្គមកាលពីពេលថ្មីៗនេះ កញ្ញា សោម សារ៉ាពេជ្រ បានបញ្ចេញសារយ៉ាងខ្លីថា៖ «កុំទាន់អួតលើភាពល្បីល្បាញ អំនួតមានការគាំទ្រពីនរណាម្នាក់ ហើយអ្នកជឿជាក់ថាអ្នកអាចឈ្នះ។ បើអ្នកចង់ឈ្នះ គឺអ្នកជាមនុស្សងាយស្រួលបំផុត ត្រៀមខ្លួនល្អបំផុត ប្អូនៗចង់ឈ្នះគួរយល់ វាជាការទាមទារដ៏ជាក់លាក់ពិតប្រាកដមិនថាកម្មវិធីអ្វីឡើយ»។
ក្រោយពេលឃើញ Vice President រូបនេះ បង្ហោះសារបែបនេះធ្វើឱ្យមតិជាច្រើនមានការចាប់អារម្មណ៍ ហើយជជែកវែកញែកគ្នាថាតើកញ្ញាចង់សំដៅលើបេក្ខនារីរូបណាទេដឹង? យ៉ាងណាមិញ កញ្ញា សារ៉ាពេជ្រ បានបញ្ជាក់បន្ថែមថាអ្វីដែលខ្លួនបានលើកឡើងនោះមិនបានសំដៅដល់បេក្ខនារីមួយរូបណានោះឡើយ ប៉ុន្តែកញ្ញាចង់ដាស់តឿនឱ្យអនាគតម្ចាស់មកុដ ប្រព្រឹត្តិខ្លួនបានល្អពេលទទួលបានតំណែងជា Miss Grand Cambodia 2023។ «បងផុសចង់ដាស់តឿន មិនសំដៅនរណាទេ ចង់ឱ្យពេលនរណាជាប់ទៅធ្វើខ្លួនបានល្អ»។
សូមជម្រាបជូនថា កម្មវិធី Miss Grand Cambodia 2023 នៅសល់ត្រឹម៣វគ្គប្រកួតទៀតប៉ុណ្ណោះ គឺ នៅថ្ងៃពុធ ទី១៦ ខែសីហា នឹងប្រកួតឈុតតំណាងជាតិ នៅថ្ងៃសុក្រ ទី១៨ ខែសីហា ប្រកួតវគ្គបឋម និងនៅថ្ងៃទី១៩ ខែសីហា ត្រូវនឹងថ្ងៃសៅរ៍ នឹងប្រកួតវគ្គផ្ដាច់ព្រ័ត្រ។ ការប្រកួតទាំង៣វគ្គនេះនឹង ប្រារព្ធឡើងនាសាលមហោស្រពកោះពេជ្រ ហើយផ្សាយផ្ទាល់លើផេក Miss Grand Cambodia និង ស្ថានីយទូរទស្សន៍ PNN៕
