អង្គភាព Miss Universe បានសម្រេចបញ្ចប់អាជ្ញាប័ណ្ណសម្រាប់ការរៀបចំប្រកួត Miss Universe នៅប្រទេសឥណ្ឌូណេស៊ី ក្រោយពេលមានបេក្ខនារីជាច្រើនបានចោទប្រកាន់ថារងនូវការបង្ខំឱ្យថតរូបភាពសិចស៊ីនៅមុនពេលការប្រកួតផ្ដាច់ព្រ័ត្រស្វែងរកម្ចាស់មកុដប្រចាំឆ្នាំនៅទីក្រុង ហ្សកាតា។
បេក្ខនារីបានលើកឡើងថាបេក្ខនារីដែលជាប់ឈ្មោះទៅដល់វគ្គផ្ដាច់ព្រ័ត្រត្រូវបានបង្ខំឱ្យស្រាតសម្លៀកបំពាក់ដើម្បីពិនិត្យមើលស្នាមឬមានជំងឺរលាកស្បែកឬអត់ ដោយមានបេក្ខនារីខ្លះបាននិយាយថាខ្លួនត្រូវគេឱ្យដោះអាវដើម្បីថតរូបថែមទៀតផង។
អង្គភាពដែលមានមូលដ្ឋាននៅសហរដ្ឋអាមេរិកបានចេញមកនិយាយថាអ្នកកាន់ License នៅប្រទេសឥណ្ឌូណេស៊ីមិនបានគោរពទៅតាមស្ដង់ដារ គោលការណ៍សីលធម៌ និងក្ដីរំពឹងរបស់កម្មវិធីនោះឡើយ។ ខណៈនេះមន្ត្រីនគរបាលទីក្រុងហ្សាកាតា កំពុងតែស៊ើបអង្កេតទៅលើករណីនេះ។ អង្គភាពប្រកួតដ៏ធំនេះបានបន្តទៀតថាឆ្នាំនេះអង្គភាពទើបតែបានដកសិទ្ធិចេញពីក្រុម PT Capella Swaskita Karya ដែលទទួលបានសិទ្ធិនៅប្រទេសម៉ាឡេស៊ី ហើយជាក្រុមហ៊ុនតែមួយដែលទទួលបានសិទ្ធិគ្រប់គ្រងនិងរៀបចំនៅប្រទេសឥណ្ឌូណេស៊ី។ អង្គភាព MUO បានថ្លែងអំណរចំពោះបេក្ខនារីទាំងអស់ដែលក្លាហានហ៊ានចេញមកទាមទារនិងប្ដឹងដើម្បីស្វែងរកការពារក៏ដូចជាផ្ដល់ជូនការគាំពារនិងទីតាំងមានសុវត្ថិភាពជូនដល់ស្ត្រីជាអាទិភាព។ អង្គភាពនេះបានបញ្ជាក់ថាក្រុមហ៊ុនខ្លួនមិនមាននយោបាយដូចការលើកឡើងខាងលើថែមទាំងមិនមានតម្រូវឱ្យវាស់ស្ទង់ឬពិនិត្យរាងកាយរបស់បេក្ខនារីដែលចូលរួមនៅទីតាំងណានោះឡើយ។
ដោយឡែកនាយកគ្រប់គ្រងដែលកាន់អាជ្ញាប័ណ្ណនៅប្រទេសឥណ្ឌូណេស៊ីលោកស្រី Poppy Capella បានលើកឡើងនៅលើបណ្ដាញសង្គម Instagram ថា លោកស្រីមិនបានដឹង បញ្ជា សំណូមពរ ឬអនុញ្ញាតឱ្យបុគ្គលិកឬអ្នកពាក់ព័ន្ធណាម្នាក់ប្រព្រឹត្តិហិង្សាឬការបៀតបៀនផ្លូវភេទតាមរយៈការពិនិត្យរូបរាងកាយបេក្ខនារីចូលរួមប្រកួតនោះឡើយ ហើយលោកស្រីថែមទាំងនិយាយទៀតថាលោកស្រីប្រឆាំងគ្រប់ទំរង់ហិង្សានិងការបៀតបៀនផ្លូវភេទ។
នៅក្នុងឆ្នាំ២០២៣ នេះ កញ្ញា Fabienne Nicole Groeneveld ដែលជាម្ចាស់មកុដនឹងតំណាងឱ្យប្រទេសឥណ្ឌូណេស៊ីចេញទៅប្រកួតនៅលើឆាកអន្តរជាតិ។
សូមជម្រាបជូនថាកម្មវិធីប្រកួត Miss Universe លើកទី៧៣ មានការពេញនិយមខ្លាំងនៅតំបន់អាស៊ីអាគ្នេយ៍ជាពិសេស ឥណ្ឌូណេស៊ី ហ្វីលីពីន និង ថៃ ជាប្រទេសកំណើតរបស់មហាសេដ្ឋីកែភេទថៃ Anne Jakrajutatip ម្ចាស់ថ្មីនៃអង្គភាពមួយនេះ ហើយក៏ជាអ្នកដែលបានកែប្រែល័ក្ខខណ្ឌ អនុញ្ញាតឱ្យស្ត្រីរៀបការ ស្ត្រីកែភេទ និងអ្នកម្ដាយអាចមានសិទ្ធិដាក់ពាក្យចូលរួមប្រកួតប្រជែងដណ្ដើមមកុដបាន៕
ប្រភព៖ BBC