កាលពីពេលថ្មីៗនេះ លោក ប៊ិន ប៊ុណ្ណា អគ្គនាយកសារព័ត៌មានត្រយង ត្រូវបានអញ្ចើញចូលរួមក្នុងកិច្ចប្រជុំតុមូលព័ត៌មានសប្តាហ៍សោតទស្សន៍ ឡានឆាង-មេគង្គលើកទី៤ បានប្រារព្ធឡើងនៅទីក្រុងគុនមីង ខេត្តយូណាន ប្រទេសចិន។
កិច្ចប្រជុំតុមូលព័ត៌មានសប្តាហ៍សោតទស្សន៍ ឡានឆាង-មេគង្គលើកទី៤ មានការអញ្ចើញចូលរួមពីលោក Yan Ni អនុប្រធាននាយកដ្ឋានសហប្រតិបត្តិការអន្តរជាតិនិងទូរទស្សន៍ នៃប្រទេសចិន និងលោក He Yaning ប្រធានស្ថានីយ៍វិទ្យុ និងទូរទស្សន៍ខេត្តយូណាន បានចូលរួមកិច្ចប្រជុំ និងថ្លែងសុន្ទរកថា។
ក្នុងនោះដែរក៏មានការអញ្ចើញចូលរួមពីបណ្ដាលស្ថាប័នក្រសួងព័ត៌មាន និងទូរទស្សន៍ជាតិកម្ពុជា, សារព័ត៌មានត្រយង, ទូរទស្សន៍ជាតិមីយ៉ាន់ម៉ា, ទូរទស្សន៍ជាតិស្រីលង្កា, មជ្ឈមណ្ឌលប្រតិបត្តិការវេទិកាទូរទស្សន៍ Mango, ស្ថានីយ៍វិទ្យុ និងទូរទស្សន៍ Jiangsu, Migu Video, ទូរទស្សន៍ផ្កាយរណប Phoenix, Shenzhen Qianhai Hand-painted Technology and Culture Co., Ltd., Yunnan អ្នកទទួលបន្ទុកទូរទស្សន៍ផ្កាយរណបអន្តរជាតិ Lanmei ដែលជាស្ថានីយ៍វិទ្យុ និងទូរទស្សន៍ បានធ្វើសុន្ទរកថាផ្លាស់ប្តូរនៅក្នុងកិច្ចប្រជុំ។
កិច្ចប្រជុំតុមូលព័ត៌មានសប្តាហ៍សោតទស្សន៍ ឡានឆាង-មេគង្គលើកទី៤ លោក ប៊ិន ប៊ុណ្ណា អគ្គនាយកសារព័ត៌មានត្រយង បានលើកឡើងពីចំណុចពិសេសរបស់សារព័ត៌មានត្រយងដែលធ្វើឲ្យខ្លួនអាចឈរជើងក្នុងចំណោមស្ថាប័នសារព័ត៌មានធំៗនៅកម្ពុជា ព្រោះតែការប្រមូលផ្ដុំ ធនធានមនុស្សដែលមានបទពិសោធខ្ពស់លើវិស័យសារព័ត៌មានមិនក្រោម ២០ឆ្នាំ នោះទេ។ ទន្ទឹមនឹងនេះ សារព័ត៌មានត្រយងមានចក្ខុវិស័យវែងឆ្ងាយ និងច្បាស់លាស់រួមផ្សំដោយសាមគ្គីភាព ធ្វើឲ្យអង្គភាពមួយនេះទទួលបានការចាប់ខ្ពស់ពីមហាជន។
លោកបន្តថា ដើម្បីពង្រឹងប្រព័ន្ធផ្សព្វផ្សាយព័ត៌មានឲ្យកាន់តែមានប្រសិទ្ធភាពនិងទាក់ទាញប្រជាប្រិយ ភាពក្នុងចំណោមសាធារណជន លោកយល់ឃើញថា អ្នកសារព័ត៌មានអាជីពត្រូវបង្កើនការផ្សព្វផ្សាយព័ត៌មានពិតឲ្យ បានច្រើន ត្រូវតែពង្រឹងនិងពង្រីកសមត្ថភាពបន្ថែម ដើម្បីដើរឲ្យទាន់សម័យកាលបច្ចេកវិទ្យាទំនើប។ ស្នើឲ្យមាន ការការផ្លាស់ប្តូរព័ត៌មានគ្នាទៅវិញទៅមកតាមរយៈការចុះ MOU ហើយកាត់បន្ថយការលួចចម្លង រួមទាំងពង្រឹង ក្រមសីលធម៌ និងវិជ្ជាជីវៈអ្នកសារព័ត៌មាន។
លោកបានបង្ហាញការជឿជាក់ថា៖ «បន្ទាប់ពីកិច្ចពិភាក្សាតុមូល មេង្គ ឡានឆាននេះ ខ្ញុំសង្ឃឹមយ៉ាងមុតមាំថា ព័ត៌មានជាវិជ្ជមានអំពីទំនាក់ទំនងរវាង ប្រទេសចិននិងបណ្តាប្រទេសក្នុងតំបន់និងជាពិសេសរវាងកម្ពុជានិងចិននឹងត្រូវបានផ្សព្វផ្សាយកាន់តែច្រើន ថែមទៀតតាមរយៈបណ្តាញផ្សព្វផ្សាយនានាដែលមានថ្នាក់ដឹកនាំឬតំណាងចូលរួមនៅទីនេះ ក្នុងនោះមានទាំង សារព័ត៌មានត្រយងផងដែរ។ខ្ញុំសូមប្រកាសស្វាគមន៍និងរង់ចាំកិច្ចសហការពីបណ្ដាអង្គភាពសារព័ត៌មាននានាទាំងនៅអាស៊ាន និងអាស៊ីខាងត្បូង ដើម្បីធ្វើការផ្លាស់ប្តូរព័ត៌មានគ្នាទៅវិញទៅមក រួមទាំងដំណើរទស្សនកិច្ច សិក្សាស្វែងយល់អំពីគ្នាទៅវិញទៅមក»។
ចំណែកតំណាងភ្ញៀវសារព័ត៌មានចិន និងបរទេសក្នុងកិច្ចប្រជុំបានផ្លាស់ប្តូរ និងពិភាក្សាលើប្រធានបទនៃក្តីកង្វល់រួម ដូចជាការអភិវឌ្ឍន៍ប្រព័ន្ធផ្សព្វផ្សាយក្នុងប្រទេសផ្សេងៗ កិច្ចសហប្រតិបត្តិការ និងការផ្សព្វផ្សាយខ្លឹមសារ សោតទស្សន៍ ការអនុវត្តបច្ចេកវិទ្យា និងឧស្សាហកម្មថ្មី។ ស្ថានីយ៍វិទ្យុ និងទូរទស្សន៍ខេត្តយូណាន ទូរទស្សន៍ជាតិមីយ៉ាន់ម៉ា ទូរទស្សន៍ជាតិកម្ពុជា និងក្រុមហ៊ុនព័ត៌មានត្រយង កម្ពុជា បានរៀបចំពិធីចុះហត្ថលេខាលើកិច្ចសហប្រតិបត្តិការនៃគម្រោង “Lanmei Audiovisual APP” និងពិធីចុះហត្ថលេខាលើកិច្ចសហប្រតិបត្តិការផលិតភាពយន្តឯកសារ «អ្នកជិតខាងល្អ ជាមួយទូរទស្សន៍ជាតិកម្ពុជា»។
គួរបញ្ជាក់ថា សប្តាហ៍សោតទស្សន៍ Lancang-Mekong លើកទី៤ ត្រូវបានរៀបចំឡើងដោយរដ្ឋបាលនៃវិទ្យុ និងទូរទស្សន៍នៃប្រទេសចិន ក្រសួងព័ត៌មានកម្ពុជា និងរដ្ឋាភិបាលប្រជាជននៃខេត្តយូណាន។ វាត្រូវបានរួមបញ្ចូលនៅក្នុងពិព័រណ៍ចិន-អាស៊ីខាងត្បូងជាលើកដំបូងក្នុងឆ្នាំនេះ។ ជាមួយនឹងប្រធានបទ ការចែករំលែក ឡានឆាង-មេគង្គ សោតទស្សន៍៕
