អតីតនាយកគ្រប់គ្រងវិទ្យុបារាំងអន្តរជាតិ rif ជាខេមរភាសា ស្ថិតក្នុងចំណោមឥស្សរជនចំនួន២៩រូបដែលត្រូវបានព្រះមហាក្សត្រ ព្រះករុណាព្រះបាទ សម្ដេចព្រះបរមនាថ នរោត្តម សីហមុនី ត្រាស់បង្គាប់តែងតាំងជារដ្ឋមន្រ្តីប្រតិភូអមនាយករដ្ឋមន្រ្តី ក្នុងរាជរដ្ឋាភិបាល នីតិកាលទី៧នៃរដ្ឋសភា។
ឯកឧត្តម តាន់ ហ្សង់ហ្រង់ស័រ បានប្រកាសលាឈប់ពីមុខតំណែងនាយកគ្រប់គ្រងវិទ្យុបារាំងអន្តរជាតិ នាប៉ុន្មានសប្ដាហ៍បន្ទាប់ពីការបោះឆ្នោតជ្រើសតាំងតំណាងរាស្រ្ត។ ថ្មីៗនេះ ឯកឧត្តម ក៏បានបង្ហោះរូបភាពជួបជាមួយឥស្សរជនជាតិ និងអន្តរជាតិមួយចំនួន រួមទាំងជំនួបជាមួយសម្ដេចតេជោផងដែរ។
ជាការកត់សម្គាល់ មុនបង្ហោះខ្លឹមសារ ភ្ជាប់ដោយរូបភាពជួបសម្ដេចតេជោ នាយករដ្ឋមន្រ្តី ឯកឧត្តម តាន់ ហ្សង់ហ្វ្រង់ស័រ បានបង្ហោះរូបភាពមួយសន្លឹកដោយភ្ជាប់នឹងខ្លឹមសារក្នុងន័យដើមថា«ប្តូរ, ប្តូរដើម្បីចុះសម្រុងនឹងខ្លួនឯង, យឺតៗប្រសើរជាងអន្ទះអន្ទែង, ទិសដៅសំខាន់ជាងល្បឿន…»។
ការទទួលបានមុខតំណែងរដ្ឋមន្រ្តីប្រតិភូអមនាយករដ្ឋមន្រ្តីរបស់អតីតអ្នកវិភាគជំនាញភូមិសាស្រ្តនយោបាយរូបនេះ ជារឿងដ៏គួរឱ្យចាប់អារម្មណ៍មួយហើយ ក៏ប៉ុន្តែសម្រាប់អ្នកតាមដានរបត់នៃការបន្តវេននៅកម្ពុជានោះ រឿងកាន់តែពិសេស គឺថាតើឯកឧត្តមកិត្តិទេសាភិបាលបណ្ឌិត ហ៊ុន ម៉ាណែត នឹងប្រគល់ភារកិច្ចអ្វីឱ្យឥស្សរជនរូបនេះ?
លោក តាន់ ហ្សង់-ហ្រ្វង់ស័រ កើតនៅស្រុកមោងឫស្សីខេត្តបាត់ដំបង ក្នុងឆ្នាំ១៩៦៦ មានឪពុកជាថៅកែម៉ាស៊ីនកិនស្រូវ និងម្ដាយជាស្ត្រីមេផ្ទះ។ លោកធ្លាប់ផ្ដល់ទស្សនាទានថា«មនុស្សម្នាក់ៗត្រូវយល់ដឹងពីសភាពការណ៍នៃប្រទេស តំបន់ និងពិភពលោក ឱ្យបានច្បាស់ លាស់ ដើម្បីកុំឲ្យចាញ់បោកភាពច្រំ ដែលនៃប្រវត្តិសាស្រ្ត»៕