សហគ្រាសទឹកត្រី លាង ឡេង ជាក្រុមហ៊ុនក្នុងស្រុកឈានមុខគេនៅកម្ពុជាលើការផ្គត់ផ្គង់ ទឹកត្រី ទឹកស៊ីអីវ ទទួលបាន ISO900 នៅក្នុងឆ្នាំ២០១៥ និង ISO22000 ក្នុងឆ្នាំ២០១៨ និង វិញ្ញាបនប័ត្រ HACCP សហគ្រាសផលិត និងចែកចាយផលិតផលទឹកត្រីមានការទទួល ស្គាល់គុណភាព ស្របតាមស្ដង់ដារជាតិ និងអន្តរជាតិស្តីពីសុវត្ថិភាពម្ហូបអាហារ។
លោក លាង ឡេង នាយកគ្រប់គ្រងសហគ្រាស លាង ឡេង បានមានប្រសាសន៍ថា៖«ផលិតផលសំខាន់ៗរបស់សហគ្រាសទឹកត្រី លាង ឡេង រួមមាន ដូចជាទឹកត្រី ទឹកស៊ីអីវ ទឹកម្ទេស ប្រេងខ្យង ទឹកសៀង និងទឹកខ្មេះ។ ផលិតផលទឹកត្រីគឺជាផលិតគោលរបស់សហគ្រាសស្មើ ៣០% នៃផលិតផលសរុប។ លក្ខណៈពិសេសរបស់ទឹកត្រី លាង ឡេង គឺប្រើត្រីទឹកសាបស្រស់ៗ (ត្រីរៀល) ពេញ១ឆ្នាំ និង បច្ចេកទេសផ្អាប់និងស្លទឹកត្រីពិសេសដែលពុំបង្កប្រតិកម្មឬអាលាកហ្សីដល់អ្នកប្រើប្រាស់»។
លោកបន្តថា៖ សហគ្រាស លាង ឡេង អាចមានលទ្ធភាពផលិតបានចំនួន ២ម៉ឺនដបក្នុងមួយថ្ងៃ ដោយក្រុមការងារផ្នែកផលិតកម្មរបស់សហគ្រាសលាង ឡេង បាន ទទួលការបណ្ដុះបណ្ដាលផ្នែកវិជ្ជាជីវៈស្តីពីស្តង់ដារសុវត្ថិភាពម្ហូបអាហារ សហគ្រាសមាន អ្នកចែកចាយផ្តាច់មុខចំនួន ០៣ អ្នកចែកចាយរាយចំនួន ៧០០កន្លែង និងដេប៉ូចែកចាយបន្ត នៅទូទាំងប្រទេសចំនួន ២០ ស្មើនឹង ១០% សម្រាប់ទីផ្សារក្នុងស្រុក។ ទឹកត្រីលក់ជាមធ្យមគឺ ២០០០០ប្រអបក្នុងមួយខែ ឬ ប្រហែល ៦០០តោន។
លោក លាង ឡេង បានបញ្ជាក់ថា៖ «បច្ចុប្បន្នទឹកត្រី ដែលផលិតដោយសហគ្រាស លាង ឡេង បាននាំចេញទៅកាន់ទីផ្សារប្រទេសកូរ៉េខាងត្បូង ដោយមានឈ្មួញកណ្ដាលនាំចេញ និងកមពុងសិក្សាជាមួយក្រុមហ៊ុននៅសហរដ្ឋអាមេរិកដើម្បីនាំចេញទឹកត្រី និងទឹកម្ទេស ផ្ទាល់ទៅកាន់ទីផ្សារអាមេរិក និងសហគមនអឺរ៉ុបផងដែរ។ ចំពោះការត្រៀមខ្លួនរបស់សហគ្រាសសម្រាប់ការនាំចេញផ្ទាល់ទៅកាន់ទីផ្សារទាំងនេះ លោកថាសហគ្រាប់ត្រៀមបុគ្គលិក ក៏ដូចជាបង្កើនការប្រមូលទិញវត្តុធាតុដើមបន្ថែម ប៉ុន្តែអ្វីដែលជាបញ្ហាប្រឈមនេះគឺ ដើមទុន»។
សម្រាប់វត្ថុធាតុដើមផលិតនៅក្នុងសហគ្រាស លោកបានប្រមូលទិញពីប្រជាកសិករដាំដុះ និងអ្នកនេសាទដែលស្របច្បាប់ ដោយប្រមូលទិញត្រីណាដែលរកបាននៅវដូវបើកឡូនេសាទតែប៉ុណ្ណេះ មិនប្រមូលទិញបីអ្នកនេសាទខុសរដូវឡើយ។ ដោយឡែកសម្រាប់ផលិតផលកសិកម្មដូចជា ម្ទេស ប៉ែងប៉ោះ គឺប្រមូលទិញតែកសិករដែលដាំដុះនៅលើដីដែលបានកាន់កាប់ជាយូឆ្នាំប៉ុណ្ណេះ។
បន្ទាប់ពីទទួលបានកិច្ចគាំទរបស់គម្រោង CAPFish ដល់សហគ្រាសកាលពីឆ្នាំ២០២០ សហគ្រាសបានចុះកិច្ចព្រមព្រៀងផ្គត់ផ្គង់ផលិតផលទឹកត្រីមានគុណភាព សុវត្ថិភាពជាមួយនឹងរដ្ឋាភិបាល។ ឆ្លើយតបទៅនឹងកំណើនតម្រូវការអតិថិជន សហគ្រាស ទឹកត្រីលាង ឡេង គ្រោងនឹងវិនិយោគលើខ្សែសង្វាក់ផលិតកម្មថ្មី កែលម្អរោងចក្រស្លទឹកត្រីមានស្រាប់ បង្កើនចំណេះដឹងបុគ្គលិកស្តីពីតម្រូវការសុវត្ថិភាពម្ហូបអាហារ ស្នើសុំវិញ្ញាបនប័ត HACCP ថ្មី និងនិមិត្តសញ្ញាបញ្ជាក់គុណភាពកម្ពុជា (CQS)។
លទ្ធផលរំពឹងទុកពីកម្មវិធីពន្លឿន (FTS)តាមរយៈកិច្ចឧបត្ថម្ភគាំទ្រពីគម្រោង CAPFISH សហគ្រាសផលិតទឹកត្រី លាង ឡេង នឹងអាចពង្រីកទៅកាន់១៦ខេត្តផ្សេងទៀតនៅទូទាំងប្រទេស និងបង្កើតប្រព័ន្ធមួយដែលអាច ឆ្លើយតបទៅនឹងតម្រូវការរបស់ទីផ្សារសហភាពអឺរ៉ុប និងទីផ្សារក្រៅស្រុក។ សហគ្រាសរំពឹងថាការលក់ផលិតផលទឹកត្រីមានបញ្ជាក់គុណភាពកើនឡើងដល់ ២៨២០០កេស ក្នុងមួយខែ។ កិច្ចគាំទ្រនេះ ជួយឱ្យក្រុមហ៊ុនធានបាននិរន្តភាពកិច្ចប្រតិបត្តិការ និងបង្កើនភាពប្រកួតប្រជែង បង្កើតការងារនិងអត្ថប្រយោជន៍បន្ថែមដល់តួអង្គពាក់ព័ន្ធក្នុងខ្សែសង្វាក់តម្លៃ។
សហគ្រាសទឹកត្រី លាង ឡេង ត្រូវបានចុះបញ្ជីពាណិជ្ជកម្ម ទៅក្រសួងពាណិជ្ជកម្ម (MoC), ក្រសួង ឧស្សាហកម្ម វិទ្យាសាស្ត្រ បច្ចេកវិទ្យា និង នវានុវត្តន៍ (MISTI)។ ចំនួនបុគ្គលិកបច្ចុប្បន្នមាន ៤៨នាក់ (ស្រី ៣១នាក់) ផលិតផលសំខាន់របស់សហគ្រាសមាន ទឹកត្រី ទឹកស៊ីអីវ ទឹកម្ទេស ទឹកប្រេងខ្យង ទឹកសៀង និងទឹកខ្មេះ ដែលអាចផលិតបាន ទឹកត្រី ២០ ០០០ប្រអប់ក្នុងមួយខែ។ ដៃគូអាជីវកម្មសំខាន់ៗមាន អ្នកនេសាទ អ្នកចែកចាយ និងអ្នកលក់រាយ មានទីតាំងនៅផ្ទះលេខ 254GA ផ្លូវទន្លេមេគង្គ សង្កាត់ជ្រោយចង្វារ ខណ្ឌជ្រោយចង្វារ រាជធានីភ្នំពេញអាសយដ្ឋានទំនាក់ទំនង លោក លាង ឡេង ០១២ ៨៨០ ៣៣៦៕
