ទេសចរណ៍៖ រដូវកាលភ្ជុំបិណ្ឌ ក្រៅពីទៅធ្វើបុណ្យដាក់បាតឧទ្ទិសកុសលដល់បុព្វការីជនដែលបានចែកឋានទៅកាន់លោកខាងមុខហើយនោះ ប្រាកដណាស់ចេញពីវត្តវិញ រមែងតែងបបួលគ្នាជួបជុំគ្រួសារញ៉ាំអាហារ ក៏ដូចជាថតរូបលេងកម្សាន្តទុកជាអនុស្សាវរីយ៍ ដូច្នេះត្រយងសូមណែនាំទីតាំងស្អាតៗ ប្រាសាទបុរាណប៉ុន្មានកន្លែងនេះ៖
១. ប្រាសាទបាខែង៖ ប្រាសាទបាខែងទីតាំងល្អបំផុតសម្រាប់ទស្សនាថ្ងៃហៀបអស្តង្គត។ ប្រាសាទដែលសង់លើកំពូលភ្នំនេះ បានកសាងឡើងនៅចុងសតវត្សរ៍ទី៩ និងដើមសតវត្សរ៍ទី១០ នៅក្នុងរជ្ជកាលរបស់ព្រះបាទយសោវរ្ម័នទី១ ដើម្បីឧទ្ទិសដល់ព្រហ្មញ្ញសាសនា។ ក្រៅអាចផ្ដិតយកទេសភាពពណ៌ក្រហមឆ្អិនឆ្អៅនៃដួងព្រះអាទិត្យដ៏ធំលិចបាត់នៅឯជើងមេឃហើយនោះ អ្នកទេសចរណ៍ក៏មើលឃើញកំពូលប្រាសាទអង្គវត្ត និងទេសភាពវាលស្រែក្បែរៗនោះផងដែរ។
២. ប្រាសាទបាពួន៖ តំណាងឱ្យភ្នំសុមេរុ បែរមុខទៅទិសខាងកើត តំណាងឱ្យសិរីសួស្ដី ជាស្ថាបត្យកម្មដ៏ល្អ មានស្ពានមួយប្រវែង ២០០ម៉ែត្រ ទទឹងប្រវែង ២.៥ ម៉ែត្រ ទ្រដោយសសរចំនួន ៥៤៧ដើម តម្រៀបគ្នាជាជួរយ៉ាងស្មើគ្នា។ ប្រាសាទបាពួន ឬបាភួន ជាសំណង់សង់ដោយថ្មភក់ ស្រោបពីខាងក្រៅ ចំណែកពំនូតដី និងថ្មបាយក្រោមត្រូវបានសង់ជាខឿនស្ថិតនៅខាងក្នុង។ រដូវភ្ជុំចំខែវស្សាទៀត ភ្ញៀវទេសចរណ៍ដែលទៅទស្សនាប្រាកដជាបានគយគន់ទេសភាពបៃតងខៀវខ្ចីស្រងាត់។ ដូច្នេះបងប្អូនដែលស្រលាញ់និងចង់បានរូបថតជាមួយនឹងទេសភាពកុំភ្លេចកត់បាពួនដាក់ក្នុងបញ្ជីដើរកម្សាន្តសម្រាប់រដូវភ្ជុំ។
៣. ប្រាសាទនាគព័ន្ធ៖ សម្រាប់ភ្ញៀវទេសចរណ៍ដែលចូលចិត្តគយគន់ធម្មជាតិដ៏ស្រស់ស្អាត អមដោយទិដ្ឋភាពថ្ងៃលិច ច្បាស់ជាជ្រើសរើសយកទីតាំងប្រាសាទនាគព័ន្ធ ព្រោះស្ថិតនៅក្នុងតំបន់វង់ធំ ដែលនៅជុំវិញនោះសម្បូរទៅដោយទឹក និងស្រឡះល្អងាយស្រួលថតរូបទេសភាពបានយ៉ាងងាយស្រួល។
នេះគ្រាន់តែជាទីតាំងខ្លះៗដែលសារព័ត៌មានលើកយកមកជម្រាបជូនទុកជាគំនិតប៉ុណ្ណោះ ប៉ុន្តែបើមានឱកាសសំរាកហើយទៅលេងបុណ្យភ្ជុំបិណ្ឌនៅខេត្តសៀមរាប នៅមានតំបន់រមណីយដ្ឋានស្អាត កន្លែងកម្សាន្ត និងប្រាសាទបុរាណជាច្រើនកន្លែងទៀតដែលភ្ញៀវទេសចរណ៍ទាំងជាតិ និងអន្តរជាតិអាចទៅទស្សនាកម្សាន្ត ហើយផ្ដិតយកទេសភាពស្អាតៗទុកជាអនុស្សាវរីយ៍បាន៕
