ក្លិបបាល់ទាត់ភ្នំពេញក្រោន នឹងត្រូវបើកទ្វារពហុកីឡាដ្ឋានជាតិ (ស្តាតអូឡាំពិក) ទទួលក្រុម Shan United របស់មីយ៉ាន់ម៉ា នៅថ្ងៃព្រហស្បតិ៍ ទី៥ ខែតុលា ឆ្នាំ២០២៣ ម៉ោង ៧:០០នាទីយប់ វគ្គជម្រុះពូល F នៃពានរង្វាន់ AFC Cup 2023/24។
ស្របពេលដែលខ្សែការពារភ្នំពេញក្រោន កីឡាករ Soe Moe Kyaw ថ្លែងក្នុងសន្និសីទសារព័ត៌មានមុនការប្រកួតដូច្នេះថា៖«សម្រាប់ខ្ញុំគិតថាកីឡាករលេខ១០ និងលេខ២៩ របស់ Shan United ពួកគេគ្រោះថ្នាក់ ប៉ុន្តែខ្ញុំគិតថាវាមិនពិបាកពេកនោះទេ»។
កីឡាករលេខ១០ របស់ Shan United សមាជិកលីគកំពូលមីយ៉ាន់ម៉ា ឈ្មោះថា Myat Kaung Khant លេងតំណែងជាខ្សែបម្រើ ស្របពេលកីឡាករលេខ២៩ របស់ Shan United ឈ្មោះថា Ye Yint Aung ជាខ្សែប្រយុទ្ធកណ្តាល។
គួរដឹងថាប្រកួតទី១ ក្លិបបាល់ទាត់ភ្នំពេញក្រោន បានយកឈ្នះក្រុម Dynamic Herb Cebu របស់ហ្វីលីពីន ក្នុងលទ្ធផល ៣-០ កាលពីរាត្រីថ្ងៃទី២១ ខែកញ្ញា នៅកីឡដ្ឋាន Rizal Memorial នៅប្រទេសហ្វីលីពីន។
តារាងចំណាត់ថ្នាក់ពូល F៖
- Macarthur FC របស់អូស្ត្រាលី ឈ្នះ១ មាន៣ពិន្ទុ
- ភ្នំពេញក្រោន ឈ្នះ១ មាន៣ពិន្ទុ
- Dynamic Herb Cebu របស់ហ្វីលីពីន ចាញ់១ សូន្យពិន្ទុ
- Shan United របស់មីយ៉ាន់ម៉ា ចាញ់១ សូន្យពិន្ទុ។
ក្នុងពានរង្វាន់ AFC Cup 2023/24 ក្លិបបាល់ទាត់ភ្នំពេញក្រោន របស់កម្ពុជា ស្ថិតពូលជា F ជាមួយក្រុម Macarthur FC របស់ អូស្ត្រាលី Dynamic Herb Cebu របស់ហ្វីលីពីន និង Shan United របស់មីយ៉ាន់ម៉ា វគ្គចែកពូល AFC Cup 2023/24 តំបន់អាស៊ាន៕