សិល្បៈជាតិ៖ ជាការពិតណាស់ដែលករណីថតរូបភាព និង រូបវីដេអូនៅតំបន់ប្រាសាទអង្គរវត្ត បានក្លាយជាប្រធានបទក្ដៅ និងជាសាច់រឿងសំខាន់ដែលសាធារណជន ផ្ដោតការចាប់អារម្មណ៍ជាពិសេស ព្រោះតែហេតុនេះទើបធ្វើឱ្យរាល់ករណីដែលពាក់ព័ន្ធនឹងបញ្ហានេះរមែងត្រូវបានលើកមកជជែកវែកញែកយ៉ាងសម្បើម ឧទាហរណ៍ដូចជាថ្មីៗនេះក្រុមចម្រៀងក្មេងខ្មែរ ក៏បានចេញមកដង្ហោយរកជំនួយ ឱ្យជួយអន្តរាគមន៍ក្រុមខ្លួនលើករណីមានឯកសារគ្រប់គ្រាន់ហើយនៅតែត្រូវបានហាមឃាត់ មិនឱ្យថត MV នៅប្រាសាទ បឹងមាលា។ យ៉ាងណាមិញងាកមកចាប់អារម្មណ៍ អ្នកនាង គង់ ចាន់ស្រីមុំ នៅថ្ងៃទី៧ ខែតុលា ឆ្នាំ២០២៣ អ្នកម្ដាយកូនមួយ (ម៉ាក់ៗរបស់ម៉ូម៉ូ) តារាស្រី ពូកែតុបតែងខ្លួនបែបហ្វេសសិនមិនច្រំដែល ទើបតែបញ្ចេញអាល់ប៊ុមរូបភាពប្រមាណ២១សន្លឹក ក្នុងកាយវិការប្លែកៗ និងផ្សេងៗគ្នា នៅគ្រប់ជ្រុងនៃប្រាសាទ បឹងមាលា រហូតទទួលបាននូវការគាំទ្រចុច Like និង Share នៅលើប្រព័ន្ធទំនាក់ទំនងសង្គមហ្វេសប៊ុក។
អ្នកតាមដានជីវិតរបស់តារាស្រីរូបនេះបានដឹងហើយថាអ្នកនាង និងស្វាមី គឹម សីហា ព្រមទាំងកូនស្រីបណ្ដូលចិត្ត ម៉ូម៉ូ បានទៅដើរកម្សាន្តនៅខេត្តសៀមរាប មុននឹងបញ្ចេញរូបភាពជាច្រើនសន្លឹកនៅប្រាសាទបឹងមាលាតារារូបនេះបានបង្ហោះរូបភាពដើរកម្សាន្តនៅ Pub street ព្រមទាំងនិយាយថាខ្លួនទៅនឹងទៅដល់ខេត្តសៀមរាប ស្អែកបើសិនជាបានជួបខ្លួននៅកន្លែងណាមួយក្នុងខេត្តសៀមរាបសូមឱ្យអ្នកគាំទ្រហៅខ្លួនផង។ មែនទែនទៅរូបភាពជាច្រើនសន្លឹកដ៏ស្រស់ស្អាតនេះ បានធ្វើឱ្យមហាជនបានចូលមកលើកសរសើរពីសម្រស់ប្រាសាទក៏ដូចជាសម្រស់ របស់តារាសម្ដែងកម្ពុជារូបនេះមិនដាច់ពីមាត់ ដោយមានអ្នកខ្លះទៀតបានស្នើឱ្យតារារូបនេះទៅថតរូបឬទៅកម្សាន្តនៅប្រាសាទកោះកេរ ដែលទើបនឹងត្រូវបានចុះក្នុងបញ្ជីជាសម្បត្តិបេតិកភណ្ឌ ពិភពលោកផងដែរ។
ការបង្ហាញរូបភាពទេសភាពដ៏ស្រស់ត្រកាលនៃប្រាសាទ បឹងមាលា ដោយសិល្បការិនីល្បីនេះ ត្រូវបានគេសម្លឹងឃើញថាជាផលវិជ្ជមាន ព្រមទាំងជះឥទ្ធិពលខ្លាំងមួយក្នុងចំណែកចូលរួមផ្សព្វផ្សាយពីគោលដៅទេសចរណ៍បែបប្រវត្តិសាស្ត្រ ជួយភ្ញោចឱ្យសាធារណជនងាកមកចាប់អារម្មណ៍ដើរកម្សាន្តក្នុងស្រុក ដើម្បីជំរុញកំនើនសេដ្ឋកិច្ច ក៏ដូចជាជួយដល់ជីវភាពបងប្អូនប្រជាជនដែលកំពុងបម្រើសេវាកម្មក្នុងវិស័យនេះ ជាជាងហោះទៅដើរលេង ឬចាយប្រាក់ទេសចរណ៍ស្រុកគេ។
អ្នកនាង គង់ ចាន់ស្រីមុំ គឺជាតារាសម្ដែងដ៏មានប្រជាប្រិយភាព និងជាពិធីការនីដ៏លេចធ្លោនៃកម្មវិធី 3FUN ដោយចាប់ដៃគូជាមួយលោក អៀ វិឆ័យ និងកញ្ញា ផេនខេក ផងដែរ៕
